Kristian Louis Erni Jensen qajartorluni mikroplastinik katersisartoq

Kristian Louis Erni Jensen meeraalluni qajartortalerami arni annilaangatippaa.

Arnaa Narsarmijini, Kalaallit Nunaanni nunaqarfinni kujasinnerpaami, inunngorlunilu peroriartorpoq, meeraaneranilu inuit qajartorlutik imaatigut aallaraangamik tammartarnerat pisarpoq.

- Taamaammat aallaqqaammut qularuteqaqaaq, Kristian Louis Erni Jensen oqaluttuarpoq.

Allatulli iliortoqarsinnaanngilaq. Aqqusaagassat aalajangigaareertarnerat upperigaanni Kristian Louis Erni Jensenip qajamut amitsumut ingilluni paariarnerani siullermili aqqusaagassai aalajangerneqarput.

Kristian Louis Erni Jensen ilisimatuujulluni, immap avatangiitaanik illersuisuullunilu qajartortartuuvoq. Norgep avannaani Lofotenimi najugaqarpoq, tassanilu immap avatangiisaasa iluarsaanneqarnissaannut suliniaqatigiiffimmi aqutsisutut sulillunilu qajartortitsinermik suliffeqarfiutini Purpose Paddling ingerlappaa.

Sermitsiamit Nuummi naapikkatsigu arni peqatigalugu piviusulersaarusiaq ’Black Carbon’ ukiuni sisamani immiunneqartoq naammassiniarlugu sapaatip-akunnerini pingasuni Kalaallit Nunaanniissimavoq. Tassani pingaarnertut inuttaavoq.

Kristian Louis Erni Jensen arlaleriarluni Kalaallit Nunaanniittarsimavoq, maannakkulli angalanera immikkut ittuuvoq, taanna oqaluttuarpoq.

- Tamatumuuna anaanama ilagaanga, illoqarfimminit nooreernerata kingorna Narsarmijit siullerpaamik tikipparput, taanna oqarpoq.

- Nuummullu nuunniarlunga aalajangerpunga.

Anaanaasoq sapiitsoq

Nuup Saavani sissami Sassuma Arnaata niaqua nuisalaarpoq.

Ulissimavoq, mallillu sissamut Kristian Louis Erni Jensenip qimaqqammisaanut aporaapput. Qajartornermut peqatigiiffiup ilisiviata eqqaani unippoq.

Kristian Erni Louis Jensen ulloq taanna sioqqullugu illoqarfimmi qaannamik attartortitsisinnaanersoq neriuutigalugu Facebookimi allappoq, iluatsitsinngilarli.

- Piffissaq kingulleq aperalunga nalunngilara, kisiannili qaannamik attartornissamut piumasaqaatit qanoq qaffasitsiginerat tupaallaatigaara, taanna oqarpoq.

Kristian Louis Erni Jensenip qajartoqqaarnermini qassinik ukioqarsimanerluni eqqaamanngilaa. Toqqissisimasutulli misigisimalluni eqqaamavaa.

Qaannamik silittumik uppissinnaanngitsumillu aallartippoq. Nunamiit suli nakkutilliisoqartoq sissaq sinerlugu siumut utimullu ingerlavoq.

Qajartoqqinniarluni angajoqqaani piinnaaffigiuarpai. Aatsaalli inersimasunngorami pikkorissarnernut sungiusarnernullu peqataanissamut periarfissaqalerpoq. Kingorna qajartorneq Kristian Louis Erni Jensenip inuuneranut ilaalluinnalerpoq.

- Taamaalillunga immap qanoq ittuunera pillugu paasinngisakka qanimut paasiniarsinnaalerpakka, taanna oqaluttuarpoq.

Kristian Louis Erni Jensen 1988-imi apriilip ulluisa 29-anni ilaqutariiaqqaniinunngorpoq, taakkulu pissakillioraluarlutik ajornartorsiutinik tamanik ajugaaffiginninnissamut piumassuseqarluarput.

Tamanna aamma pisariaqartinneqarpoq, naak meeraanermini angerlarsimaffimmini asanninneqangaaraluartoq Kristian Louis Erni Jensenip ilaqutaasa kinguaariit akornanni misigissutsikkut anniaatinik assigiinngitsunik erloqissutaat ingerlateqqinneqarput, tamannalu sunniuteqartarpoq. Arnaa niviarsiaqqanut arnanullu 1960-ikkunni piumassuserinngisaminnik nakorsanit danskinit naartunaveersaaserneqarsimasunut ilaavoq.

Taamaakkaluartoq marlunnik ernertaarnera, Kristian Louis Jensenip nukaatalu Kasper Angut Jensenip ullumikkut tupinnartuliaasutut isigaat, arnaatami meerartaarsinnaanani ilimagilluinnarsimavaa.

Kristian Louis Erni Jensenip arni ullumikkut ullut tamaasa isumassarsiorfigisarpaa, arnilu eqqartoramiuk qungujuttarpoq.

- Sorpassuit marluulluta anigornikuuagut, tassanngaanniillu allamik nuannaartunarneqanngitsoq eqqarsartarpunga, taanna oqarpoq.

Ilaannikkulli arni 74-inik ukiulik internetteqannginnerup, facetimeqannginnerup ChatGPT-qannginnerullu nalaani, illullu issunik ujaqqanillu sananeqartarnerata nerisassallu nammineq pisarineqartarnerisa nalaani peroriartornikuusoq imminut eqqaasittariaqartarpoq.

- Ilaannikkut soorlu iPhoneni atorsinnaanngikkaangagu uanga isumalulertarnera ilaannikkut kanngusuutigisarpara.

Kristian Louis Erni Jensen qamanngaanneersuaq illarpoq.

Kristian Louis Erni Jensen arni aqqutigalugu kalaallinik naggueqartup saniatigut norskinik danskinillu angunni aqqutigalugu naggueqarpoq.

- Imminut skandal-navitut taasarpunga, qungujulluni oqaluttuarpoq.

Kristian Louis Erni Jensen meeraalluni sumiikkaluaruniluunniit imarsuaq pinngortitarlu pingaartingaarpai. Imarsuup qanittuaniikkaangami sissamut arpattartarpoq. Tassani eqqissisimasarpoq.

Ilinniagasserineq ilaqutariittullu sammisaqaqatigiittarneq silami pinerusarput. Ikinngutini skateboardeqatigilluartarpai.

- Taava qajaq nassaaraa, taanna oqarpoq.

Ilinniarnertuunngoreerluni piffissap ilaani campingvognimi angalasarpoq, eqqartuussissuserisunngorusunnani nakorsanngorusunnanilu inunnilli pinngortitamut angalatitserusunnerulluni paasinissaata tungaanut.

2013-imi Norgemut nuuppoq, tassanilu avatangiisinut tunngasunik ilitsersuisartutut bacheloritut ilinniarpoq. Kingorna Lofotenimi najugaqalerlunilu nunani tamalaani qajartortitsisutut angalasartilluni tassunga angerlartarpoq.

Biilip assakaasua Sermiliup naqqaniittoq

Kristian Louis Erni Jensenip qaannamik angalasarnimi pinngortitamilu piffissaqarluartarnimi saniatigut inuusukkallaramili siunertaqarluartumik iliuuseqarusuttarpoq. Avatangiisit, silap pissusiata allanngoriartornera nunallu inoqqaavisa pisinnaatitaaffii qangali soqutigisimavai – 18-inillu ukioqarluni sila pillugu ataatsimeersuarnermut siullerpaamik peqataavoq.

- Immaqa aamma siusippallaarpoq, illarluni oqarpoq.

Qajartornertaaq takornarianik ilaqarluni angalanerinnaajunnaarlunilu Instagramimi assinik kusanartunik takutitsisarnerinnaajunnaarpoq.

Qaannamik ilisimasaqarneq inuit inuussutissarsiutigisimallugulu angalanermi atortussatut pisariaqartissimagaat Kristian Louis Erni Jensenip piffissap ingerlanerani qajartorneq immap isertugaataanik paasinninnissamut iluaqutigaa.

- Svalbardimi seqerngup kaaviinnarfiani unnuakkut sissami nikorfavunga, inuuninnilu arfernik aatsaat taama amerlatigisunik ataatsikkut takusaqarpunga. Taamaalillunga paasivara naammattumik takusimallunga maannalu takusakka illersorniarlugit iliuuseqarusullunga, taanna oqaluttuarpoq.

Misigisaq tamanna pissutigalugu ilisimatusaqqilerpoq, 2022-milu piujuartitsisumik nunalerinermi avatangiisinillu aqutsinermi kandidatinngorpoq.

Qajaq atorlugu mikorplastinik katersineq kandidatinngorniutitut suliaraa - tamannalu piviusulersaarusiornermut naammassisaqataaffigeqqammisaanut tunngaviuvoq.

Kandidatinngorniarnermi nalaani mikroplastit nunarsuatsinniittut 80 procentii biilit assakaasuinit pissuteqartut paasivaa.

Tamatuma kingorna Kristian Louis Erni Jensenip Tunumi kangerlunni biilip assakaasuata akui qanoq annertutiginersut paasiniarpaa, taamaammallu mikroplasteqarneranik misissuiartorluni Tasiilamukarpoq. Misissugassat kingorna Tuskalndimi ilisimatusarfiliaallugit misissorpai.

- Sermersuarmi iigartartumi avinngarusimanerpaami, Sermiliup kangerluata ilorpasissuani, biilip assakaasuata akuinik nassaartoqarsimavoq, taanna oqarpoq.

- Kangerlummilu imeq sermersuup aakkiartorneranit pimmat, biilip assakaasui sumiiffimmi tassani pinngorsimanavianngillat.

Tasiilami nassaarnerminit ullumikkut ukiut sisamat qaangiupput. Kristian Louis Erni Jensen taamanimiilli filmiliortunik malinnaavigineqarluni Canadami Kalaallit Nunaatalu sinnerani qajartorluni mikroplastinik misissuiartortarpoq.

Anaananilu Narsarmijiniitillutik misissugassat kingulliit katersorpai.

Politikki qajartortarnermilu takorluukkat

Kristian Louis Erni Jensen Nuummut nuunniarluni aatsaat maanna aalajangiukkaluarlugu piffissamili sivisujaami eqqarsaatigisimavaa.

- Kalaallit Nunaannut angalagaangama tamatigut angerlarsimasutut misiginerulertarlunga, inuummarinnerullungalu najuunnerulertarpunga, taanna oqarpoq.

- Aamma Kalaallit Nunaanni maanna pisut pissanganartut tamaasa tapersersueqataaffigerusuppakka.

USA-p naalakkersuisuisa Kalaallit Nunaanni uuliamik, gassimik aatsitassanillu ujaasinerulernissartik anguniagaraat, septembarimilu illersornissamut isumaqatigiissummut USA-p Kalaallit Nunaannut Danmarkimullu atsiorsimasaannut piffissaliussaq eqqaavaa.

- Kalaallit Nunaat eqqortuliorsimasoq isumaqarpunga, aammali nunarput piiaaffiinnanngussanngippat silatusaartumik iliuuseqartariaqartugut isumaqarpunga, taanna oqarpoq.

Nuup Saavani imaq mallerpallaarunnaarsimavoq. Seqineq nuianit nuivoq – qajartortartoqatigiillu qajaataasa qalipaataat assigiinngitsut erseqqinnerulerput.

- Kusanat, Kristian Louis Erni Jensen oqarpoq.

Lofotenimiit nuukkuni qaannani nassarniarpai. Innuttaasut amerlanerusut paariallaqqinnerulerniassammata innuttaasut akeqanngitsumik qajartorsinnaanissaannik neqeroorfiginissaat eqqarsaatigaa.

- Qaannamik inuussutissarsiornikkut pinngortitami misigisat nuannersut qanoq amerlatigisut anguneqarsinnaasut takutikkusuppara, taanna oqarpoq.

Qajap atortussatut atorneqartaleqqinneqarnissaa aamma neriuutigaa — immaqa piniarnermut atorneqarnani, ilisimatusarnermulli imarpiullu mingutsinneqarnerata akiornissaanut atorneqarsinnaavoq.

- Taamaalioruttami qajartorneq immaqa takornarianut sammisassaannaajunnaarluni inuiaqatigiinni tulluusimaarutigineqaleqqissinnaavoq.