Eqqartuussissuserisut mianersoqqusisut: Akileraarut annertooq suliffeqarfinnik matoorartitsissaaq

Eqqartuussissuserisut Arctic Law Greenland Namminersorlutik Oqartussanut taamaalillutillu Naalakkersuisunik aningaasarsianit akileraarutit pillugit inatsisip allanngortinneqarnissaanut sakkortuumik isornartorsiuipput.

Namminersorlutik oqartussanit inatsisissatut siunnersuut nutaaq malinneqassappat, ingerlatseqatigiiffiit assersuutigalugu piginneqataaffimmi aktiaatileqatigiiffiulluunniit pisortaa Kalaallit Nunaannit aallarpat, nammineq aningaasaatimik 17 procentianik immikkut akileraarusiivigineqassapput. Inuussutissarsiortunut akileraarut nutaaq nuunnerup piffissami killilimmi ataavartussaaneraluunniit apeqqutaatinnagu, kiisalu suliffeqarfiup Kalaallit Nunaani ingerlatsinerminik nangitsinera apeqqutaatinnagu akilerneqartussaavoq.

- Ingerlatseqatigiiffiup pisortaa tassanngaannartumik napparsimanini ilinniagaqarniniluunniit pissutigalugu Danmarkimut nuukkallartariaqalerpat,taava siunnersuut malillugu annertuumik akileraarutinut akiliisoqassaaq.

- Tamatuma suliffeqarfiup matunera kingunerisinnaavaa, taamaalillunilu Kalaallit Nunaat isertitanik suliffinnillu annaasaqassaaq, Arctic Law Greenlandimi pisortaq piginneqataasorlu Britta Keldsen Sermitsiamut oqarpoq, imalu nangilluni: – Tamanna silatusaarnertut isiginngilarput. Taamattaaq pisortat ingerlataasa annertuumik allilerneqarnissaat siumut takorloorparput, taamaalillunilu aningaasartuuteqarnerulerluni, peqatigisaanillu annertunerusumik isertitaqarnani.

Equngalluinnartoq

Namminersorlutik oqartussat Kalaallit Nunaanni ingerlatseqatigiiffinnik pisortaasa sumi najugaqarnerinik alaatsinaattuartussanik atorfinitsitsissasoq, tamatuma kingunerissavaa.

Equngalluinnarpoq, siunnersuutip peqatigisaanik nunatta karsianut aningaasat ilapittuutigineqartut qiviaraanni, Britta Keldsen oqarpoq.

Tassunga atatillugu nunatta karsiata isertitai annikitsuinnaat ullumikkut ingerlatseqatigiiffinnit akileraarutinit isertinneqartarnerat, eqqartuusissuserisut erseqqissaatigaat.

Nunat sanillersuuffigisartakkavut assigalugit isertitat annertunerpaartaat akileraarutinut A-nut akiliutininngaanneerput, taamaalillunilu Kalaallit Nunaanni suliffissanik pilersitsisoqartarpoq.

Nunatta Karsia ukiut tamaasa 40 million koruunit missaannik ingerlatseqatigiiffinnut akileraarutinit isertitsisarpoq, akileraarutinilli A-nit 6.000 million koruunit isertinneqartarlutik, tassa 6 milliaartit.

Kalaallit Nunaat taamaalilluni suliffissanik pisariaqartitsivoq, malittarisassaniunngitsoq suliffinnik matusisinnaasunik, eqqartuussissuserisut isumaqarput.

Aatsitassarsiorneq eqqorneqassasoq

Kalaallit Nunaat pisortat ingerlatsiviannik siuariartoornermik pisariaqartitsinani, namminersorlutik inuussutissarsiortut siuariarnissaannik pisariaqartitsisoq, Arctic Law Greenland isumaqarpoq. Taamattaaq sulisussanik namminersorlutik ingerlatsisunik pisariaqanngitsumik nakkutilliinerinnarmik suliaqartussanik atorfinitsitsinissaq eqqartuussissuserisut naapertuutinngitsutut isigaat.

Inatsisinik allannguineq pissappat, tamanna ingerlatseqatigiiffiit, tassani aatsitassarsiorfiit nunanit tamalaaneersut ilanngullugit, matullutilluunniit aningaasaliinermik taamaatitsinerat kingunerisinnaava. Taamaalilluni Kalaallit Nunaat isertitanik, isertitassanik suliffinnillu annaasaqassasoq, Arctic Law Greenland isumaqarpoq.

Taama eqqartuussissuserisut namminersorlutik oqartussat aningaasarsianit isertitat pillugit inatsisip allanngortinneqarnera pillugu siunnersuutaannut tusarniaanermut akissumminni allapput.

Namminersorlutik oqartussat siunnersuummut oqaatigisaminni, inatsit Kalaallit Nunaanni sinneqartoorutit Kalaallit Nunaanni akileraaruserneqartarnissaannik siunertaqartoq.

- Ingerlatseqatigiiffiit akileraarusiinermi angerlarsimaffiup nunanut allanut nuunneratigut, Kalaallit Nunaanni inuussutissarsiornikkut isertitat akileraaruserneqartarnerannik pinngitsoortitsisinnaanerat paasineqarpoq.

- Taamaammat ingerlatseqatigiiffiit tamakkiisumik Kalaallit Nunaannut akileraartussaatitaajunnaartut akileraaruserneqartarnerisa annertusineqarnissaat siunnersuutigineqarpoq, nassuiaatini ilaatigut allassimavoq.

Aningaasaleerusussuseq akornusissagaa

Arctic Law Greenlandip ilaatigut inatsisissatut siunnersuutip Kalaallit Nunaanni aningaasaliiumaneq akornusissagaa naliliivoq. Tamanna aamma kalaallit suliffeqarfiinik mikisunik akunnattumilluunniit angissusilinnik sakkortuumik eqqueratarsinnaavoq.

Aningaasarsianit akileraarusiisarneq pillugu inatsisartut inatsisaata allanngortinneqarnera pillugu Inatsisartut inatsisissaannut siunnersuutip, siunnersuutit allat akileraarutinut sunniutillit peqatigalugit akileraarusiisarnermut isumalioqatigiissitamit, Kalaallit Nunaanni akileraarusiisarnermik aaqqissuussinermik ataatsimut nalilersueqqittussamit suliarineqarnissaat siunnersuutigaa.

Sermitsiap Arctic Law Greenlandip isornartorsiuinera Aningaasaqarnermut Akileraartarnermullu Naalakkersuisumut saqqummiuppaa, aviisilli naqiterneqartussanngortinneqarnera sioqqullugu taanna akissuteqanngilaq.