Nuup mittarfiani timmisartut tikittussat aallartussallu tulleriiaarnissaannut killilersuinerit nutaat septembarimi atuutilerput.
Mittarfimmik nakkutilliisup Angallannermut Aqutsisoqarfiup mittarfimmut piumasaqaatit allanngortillugit nutaanik aalajangersaapput. Angallannerup immikkoortiternera pingaarutilik tassani qulakkeerniarneqarpoq.
Tamanna Nuummut Nuummiillu timmisartuussinissamut pilersaarusiornermut sakkortuumik eqquivoq, qaammatinilu tulliuttuni angalasussarpassuarnut kinguneqassasoq, Air Greenland Angallannermut Aqutsisoqarfiup aalajangiinerata kingorna nalunaarpoq. Sinerissamut nunallu sinneraniit Nuummut tikittut Nuummi ilaatigut unnueqqaartalissapput.
Pisussaq minnerpaamik ukiumik ataatsimik sioqqullugu Greenland Airportsimut mianersoqqussutigineqarsimasoq Sermisiap maanna saqqummiussinnaalerpaa, mianersoqqussutilli taakku allannguinermik kinguneqarsimanngillat.
Hotel Narsarsuarmi ataatsimiinneq
Angallannermut Aqutsisoqarfimmi atorfillit arfinillit Greenland Airportsimilu pisortat marluk Jens R. Lauridsen Henrik Estrupilu Narsarsuarmi 2024-mi septembarip 19-ianni ataatsimiinnerat uterfigissavarput.
Jens R. Lauridsen Greenland Airportsimi maanna pisortaaneruvoq. Henrik Estrup niuernermut tunngasunik ukkataqannginnera tunngavilersuutigalugu 2025-mi aggustimi soraarsinneqarpoq.
Nuummi novembarimi qaammatit marluk qaangiuppata mittarfissuassap ammarnissaata tungaanut suli aaqqinneqartussat Hotel Narsarsuarmi ataatsimiinnermi taamani oqaluuserineqarput.
Nuummi silaannakkut angallannermi nakkutilliisunik ATC-inik (timmisartunik aqutsisut) aamma AFIS-inik (timmisartunut paasissutissiisartut) toqqaanissamik apeqqut pingaarutilik eqqartorneqartut ilagaat. Silaannakkut angallanneq pillugu suliaqarfiit taakku assigiinngitsuupput, taannalu pillugu oqallinneq sivisuumik pilluni. Teknikkimut tunngavoq, Nuummili mittarfimmi maanna pissutsinut atuuttunut pingaaruteqarluni.
Angallannermut Aqutsisoqarfiup ATC-mik aaqqiissutissaq, tassa timmisartunik aqutsineq Kangerlussuarmi ilisimaneqartoq, atuleqqullugu tunngavilersuutigaa. Taamaaliornikkut silaannakkut angallanneq timmisartunik aqutisunit aqunneqartarpoq.
Greenland Airportsimit AFIS-it, timmisartunut paasissutissiivik Kalaallit Nunaanni mittarfinni allani atorneqartartut, ornigineruaa.
Taakku assigiinngissutaat naatusumik oqaatigissagaanni tassaapput, timmisartunik aqutsisut qanoq iliornissamik ilitsersuisarput AFIS-illu paasissutissiisartuullutik.
Timmisartumik angallattoqarnerujussuanngornissaa kissaatigineqarpat piffissaq ungasinnerusoq eqqarsaatigalugu timmisarunik aqutsisut ATC-it pisariaqartut, Angallannermut Aqutsisoqarfimmi atorfillit Greenland Airportsimut Narsarsuarmi ataatsimiinnermi oqaatigineqarpoq. Imaqarniliami ima allassimavoq:
– Angallannermut Aqutsisoqarfik 2025-mi aasakkut timmisartuussinerit pillugit paasissutissanik pissarsimmat, angallannerup annertuumik killilerneqarnissaa imaluunniit timmisartunik aqutsisunik atorfinititsinissaq pisariaqassasoq nalileneqarpoq.
- Angallannerup annertussusia, pisariussusaa, angallassisut assigiinngitsut silallu allanngorarnera pissutigalugit AFIS-imik atuineq naammanngilaq.
Ataatsimiinnermit imaqarniliaq Greenland Airportsimit naqqinneqarani akuerineqarpoq.
Nuummi timmisartuussinerit amerlisut
Angallannermulli Aqutsisoqarfimmit timmisartunik angallannermi aqutsisunik atorfinitsitsinissaq, siorna ataatsimiinnerni kingusinnerusukkulluunniit, pinngitsaaliissutiginngilaa. Nuummi mittarfimmi AFIS-imik atuilluni ammaasoqarsinnaaneranik uppernarsaat pisortap Jens R. Lauridsenip piumavaa, Angallannermullu Aqutsisoqarfik akuersivoq.
AFIS-imik atuisoqaraluartoq Nuummi mittarfik pilersaarutit malillugit novembarip 28-ani ammarneqarmat timmisartuussinerit amerliartuinnarput. Pilersaarutaaqqaaraluartunit aamma amerlanerullutik.
Air Greenlandip nunap iluani timmisartuussineri Kangerlussuarmi katersuuffeqarunnaarlutik Nuummi katersuuffeqalissasut siumoortumik paasissutissiissutigineqarnikuupput. Timmisartuutileqatigiiffiit arlallit, ilaatigut Narsarsuarmi mianersoqqussutigineqarnerup kingorna, timmisartuussisalerniarlutik nalunaarput. 2024-mi oktobarimi United Airlinesip aamma SAS-ip 2025-mi aasakkut timmisartuussisalernissartik piareersimaffigalugu uppernarsarpaat.
Timmisartut angisuut amerliartornerisa saniatigut timmisartuutileqatigiiffiit nutaat amerliartornerat aamma ajornakusoornerulernermik kinguneqarpoq. Tamanna Angallannermut Aqutsisoqarfiup Nuummi Mittarfimmut nakkutilliisimanerminik nalunaarusiaani septembari 2025-meersumi atuarneqarsinnaavoq:
- Timmisartuutileqatigiiffiit angallannerillu amerlanerulernerat ilaatigut ajornakusoortitsipput (ilimagisamit 10-20 procentimik amerlanerullutik).
Nakkutilliisut nalunaarusiaat tamanna tunngavigalugu Angallannermut Aqutsisoqarfik Nuummi timmisartuussinermi killilersuinermik atuutilersitsisumik aalajangiisuuvoq.
Killilersuinerit ilaneqarsinnaasut
Siunissamili killilersuutit nutaat atuutilersinneqarsinnaasut Københavnip mittarfiani ingerlatsinermut pisortaasimasup mittarfiillu pillugit immikkut ilisimasallip Hans Christian Stigaardip oqaatigaa. Taassuma nakkutilliinermit kingullermit nalunaarusiaq Angallannermut Aqutsisoqarfiullu aalajangiineri kingulliit atuareerlugillu taama naliliivoq.
– Tamanna Greenland Airportsimut ersarissumik mianersoqqussutaasutut paasivara, tassa ajornerusumik kinguneqaqqunagu sapaatip-akunnerini aggersuni pissutsit aaqqiivigeqquneqartut, Hans Christian Stigaard pisoq pillugu alaaserisatta siuliani oqarpoq.
Itisiliivoq:
– Angallannermut Aqutsisoqarfiup aalajangiinermini timmisartuussinermi isumannaallisaanissaq eqqarsaatigalugu pisariaqassappat AFIS-inut taarsiullugu timmisartumik aqutsisunik ATC-nik atorfinitsitsinissaq piumasaqarsinnaatitaanertik eqqaasitsissutigigaa maluginiarpara. Piumasaqaatigineqartut naammassineqarnissaata tungaanut mittarfik matuneqavissinnaanera ajornarpaatut iliuuserineqarsinnaavoq.
Angallannermut Aqutsisoqarfimmit mianersoqqussutip malinneqarsimannginnera aamma timmisartunik nakkutilliineq pisariaqartoq sooq naammassineqarsimannginnera pillugu Sermitsiamit Greenland Airports aperaarput.
Apeqqut ingerlatseqatigiiffiup pisortaanerata Jens R. Lauridsenip Narsarsuarmi ataatsimiinnermi paasissutigineqarnikuummat tamanna soorunami immikkut pingaaruteqarpoq. Oqaatigineqartullu malinnikuunagit.
Paasissutissiisoqarumaartoq
Greenland Airportsimi attaveqaqatigiinnermut pisortaq Mikkel Bjarnø Lund Sermitsiamut allappoq:
– Nuummi mittarfissap nutaap sanaartorneqarneranut atatillugu Angallannermut Aqutsisoqarfik qanimut ineriartortumillu oqaloqatigiuarnikuuarput, aamma ATC-mut AFIS-imullu tunngatillugu.
– Suliaq assigiinngitsorpassuarnik imaqartoq ajornakusoortuuvoq, Nuummili aaqqiissut Angallannermut Aqutsisoqarfimmit akuerineqarnikuunera erseqqissaatigissalugu pingaaruteqarpoq. Periuseq misilittarneqareernikuuvoq, soorlu Savalimmiuni Vágarimi qallunaallu mittarfeqarfiini amerlasuuni atorneqartuulluni.
- Naluneqanngitsutut aaqqiissutissap pitsaanerpaamik atornissaa akuersissummilu piumasaqaatit naammassinissaat unammilligassaqarfiupput.
- Periutsit ilaat suli tamakkiisumik atuutilernikuunnginnerat, timmisartuussinerit amerliartupiloorsimanerat aamma timmisartortitseqatigiiffiit ilaasa silaannakkut nakkutilliiffigineqanngitsumi, soorlu maani, timmisartuussineq sungiusimannginnerat tamatumunnga ilaatigut pissuteqarpoq, Mikkel Bjarnø Lund allappoq.
Taamaattumik Narsarsuarmi mianersoqqussutaanikup sooq malinneqarsimannginnera, aamma sooq Nuummi timmisartunik angallannermik aqutsineq kaammattuutigineqartutut atuutilersinneqarsimannginnera Greenland Airportsimit akineqarusunngilaq.
Greenland Airportsip mittarfiup siunissaa pillugu eqqarsaatersuutigineqartuni timmisartunik aqutsisunik peqalertoqassanersoq ilaasoq attaveqaqatigiinnermut pisortap uppernarsarpaa.
– Aaqqiissutissat assigiinngitsut, ilaatigut silaannakkut angallannermi nakkutilliinermut aqutsineq, piffissaq qaninnerusoq ungasinnerusorlu eqqarsaatigalugit misissorpavut. Angallannermut Aqutsisoqarfik qanimut suli oqaloqatiginerpoq, taakku silaannakkut angallannermi kiffartuussinermi suleriutsimik akuersisartuugamik.
– Nutaanik paasissutissaateqalerutta ingerlaannaq paasititsiumaarpugut, Mikkel Bjarnø Lund allappoq.
