Kuannersuarni ingerlatseqatigiiffik: Narsami suliniut pillugu siunnerfeqarluartumik oqaloqatigiinnissaq neriuutigaarput

Energy Transition Minerals (siusinnerusukkut Greenland Minerals) nunatta kujataani Kuannersuarni aatsitassanik ujarlernissamik akuersissutaatilik, qanittumi pappiaqqanik nalilinnik niuerfimmut nalunaarummi nassiussamini, kalaallit innuttaasut qinersinerannik pilluaqquai. 

Ingerlatseqatigiiffiup ilanngullugu maanna Naalakkersuisunngortussanik siunnerfeqarluartumik suleqatiginiarniarlugit erseqqissaatigaa. 

”Ingerlatseqatigiiffiup naalakkersuisooqatigiinnik nutaanik suleqateqarluarnissaq qilanaaraa, maannalu Kuannersuarni suliniut pillugu, inuiaqatigiinnik aarleqqutinik peqatigisaannillu Kalaallit Nunaannut iluaqutaasussamik nalilerujussuarnik pilersitsinissaq pillugu siunnerfeqartumik oqaloqatigiinnissaq allarnissallugu”, allapput. 

Politikimut attuumanngilagut 

Energy Transition Minerals naapertorlugu taakku suliniutaat Kalaallit Nunaata aningaasaqarneranut ungasissumut isigisumik annertuumik ilapittuuteqassaaq.

Ingerlatseqatigiffiup partiinut attuumassuteqannginnertik, Kalaallillu Nunaannut tunngatillugu politikikkut aamma attuumassuteqarnatik ilanngullugu tikkuarpaat. Taakkununnga sulilluarnissamut siunnerfeqartumillu Kuannersuarnik suliniummik soqutigisaqartunut tamanut iluaqutsiisumik pisussaaffilernissaq pineqarpoq.

Aktiaatinik qaffaaneq 

Pisortaqatigiit ilaat qineqqusaarnerup nalaanni Nuummiillutillu Narsamiipput, tassanilu soqutigisaqartunik tusagassiorfinnilu oqaloqatiginnipput, tamannalu ingerlatseqatigiiffiup Kuannersuarni suliniutaa pillugu allaaserisanik 60-nit amerlanerusunik kiisalu aktiaatit australiamiut dollariinik 10 millionit missaannik (qallunaat aningaasanngorlugu 50 million kr-it missaannik) qaffanneqarnerannik malitseqarpoq. 

Ingerlatseqatigiiffiup tusagassiorfitsigut oqariartuutaa tassaavoq, taakku aatsitassanik qaqutigoortunik suliniutaat aningaasaqarnikkut siuariartitsillunilu Kalaallit Nunaannut annertuunik royaltykkut akileraarutitigullu isertitsissutaassasoq. Tamatumalu saniatigut Kalaallit Nunaat mingutsitsinngitsunut ikaarsaarnermut aatsitassanik pilersuisunngorsinnaavoq pingaarutilik. 

Taamattaaq suliniutip EU-mi aatsitassanik qaqutigoorunik pilersuineq nukittorsarsinnaavaa, tamatumalu Kinamik pinngitsuuisinnaannginneq annikillisillugulu, nunarsuarmi pissaaneqarneqqusaannermi aalaakkaasuunerunermik qularnaarinnissaaq.

Qalluisinnaanermut akuersissut 

Energy Transition Mineralsip suli isumaqatigiissitsiniartarnermi eqqartuussinermi suliassaq kiisalu Kalaallit Nunaanni Eqqartuussivimmi Namminersorlutik Oqartussanik suliassanngortitsinertik suli ingerlappaat. Suliat 2026-mi siusinnerpaamik aalajangiivigineqarnissaat ilimagineqarpoq.

Ingerlatseqatigiiffimmit siusinnerusukkut nalunaarut naapertorlugu, qinersinermi takorluugaq ajornerpaaq tassaassaaq Inuit Ataqatigiit Siumullu pissaanermik tigumminniinnarnerat, akerlianilli takorluugaq pitsaanerpaaq tassaassalluni Kalaallit Nunaanni nutaanik siuariarnissamik pingaartitsisunik uranimik inerteqqummik atorunnaarsitsisunik naalakkersuisoqalerneq, taakkulu Energy Transition Mineralsi Kuannersuarni qalluisinnaanermut akuersissummik tunissagaat. 

Demokraatinit erseqqissumik nalunaaruteqarneq 

Naluneqanngitsutut Demokraatit qinersinermi ajugaapput, taakkualu Inuit Ataqatigiit, Siumut aamma Atassut naalakkersuisoqatigilerpaat. Partiip siulittaasua Jens-Frederik Nielsen qineqqusaarnerup nalaani Kuannersuarni aatsitassarsiorfeqalissanngitsoq erseqqissumik Sermitsiamut oqaaseqarpoq. 

– Qinersinermi kingullermi innuttaasut erseqqissumik oqariartuuteqarput, taannalu ataqqineqartussaavoq. Kuannersuarni aatsitassarsiorfeqalernissaq kissaatigineqanngilaq. Taamaammallu Kuannersuarni aatsitassarsiorfeqalissanngilaq. Allamik oqaatigisassaqanngilaq. 

Jens-Frederik Nielsenip ingerlatseqatigiiffiup qineqqusaarnerup nalaani Kalaallit Nunaannut tikeraarnera ”qiiaamminartuusoq” oqaatigaa, tamannami erseqqissumik qinersinermut sunniiniarnermik ersersitsivoq.