Mette Frederiksen Zelenskyjimik ataatsimeeqateqareersorlu: Tapersersuinerput annertusisariaqarparput

Ruslandip Ukrainimut saassussineranit ukiut sisamassaat qiteqqullugu qaangiussimalerput, Danmarki nunallu tamalaaneersut ukiuni kingullerni ukrainimiunut tapersersuipput, ilaatigut sakkussiornermi.

Tapersersuineq unitsinneqassanngilaq, ministeriuneq Mette Frederiksen (S) oqarpoq.

- Ukrainemiunut tapersersuinerput annertusissavarput Ruslandilu tatinerulerlugu, ministeriuneq X-imi allappoq, qanorlu annertunerusumik tapersersuisoqassanersoq itisiliiffiginagu.

Ukrainep præsidentia Volodymyr Zelenskyj Tallinnimi Estlandimiittumi "pingaartumik oqaloqatigereerlugu“, taama oqarpoq.

Nunat avannarliit baltiskellu naalagaaffiisa siuttui marlunngornermi tassani ataatsimiipput, nunat avannarliit baltikumimilu naalagaaffiit kattuffiat, NB8, aqqutigalugu.

Nunat avannarliit aamma baltikumi naalagaaffiit illersornissamut suleqatigiinnerulernissaat pillugu, ataatsimiinnermi Zelenskyj aamma peqataavoq.

Folketingimut qinersisoqarnera pissutigalugu qaammatini kingullerni qallunaat Ukrainemut tapersersuinerat unikaallassimavoq.

Illersornissamut ministerinngortup, socialdemokraatineersup Jeppe Bruusip, sapaatip-akunnerani kingullermi Venstrep siulittaasua Troels Lund Poulsen taarserlugu naalakkersuisunngortitsinermut illersornissamullu ministereqarfimmut nuunnermut atatillugu tamanna eqqartorpaa.

Oqalugiarnermini Jeppe Bruus, Ukrainemiunut toqqaannartumik tuluttut naggasiivoq"immikkut ittumik ilassilluni“.

- Suleqatigiilluarnissarput qilanaareqaara. Danmarkip Ukrainemut tapersersuinera aalajaattuarpoq.

- Illersornissamut ministerinngortutut qanimut oqaloqatigiinneq ingerlatiinnassavara siulimalu suliai naammassiniassallugit, Jeppe Bruus oqarpoq.

Illersornissamut ministereqarfimmi pisortap aamma Troels Lund Poulsenip oqalugiaataanni Ukraine aamma sammineqangaatsiarpoq.

Jeppe Bruusillu erseqqissarpaa ministerip taarserneqarnerani Danmarkip Ukrainemut tapersersuinera allannguuteqarnavianngitsoq.

Jeppe Bruusip, Troels Lund Poulsen illersornissamut ministereqarfimmi sulisimanera pillugu qutsavigaa.

- Suliniutit taakku nunatsinnut pingaaruteqarluinnartut pillugit, tunniussaqarsimanerit annertuumik qutsatissaqarfigaatsigit.

- Suliassaq imaannaanngitsoq. Ukrainep kiffaanngissuseqarnissaanik namminiilivinnissaanillu sorsunneq ingerlaannassaaq, Jeppe Bruus ilaatigut oqarpoq.

Nunat taakkua arfineq-pingasut, tassa Danmarkip, Sverigep, Norgep, Finlandip, Islandip, Estlandip, Letlandip Litauenillu naalakkersuisuisa siuttui, 2026-mi Estlandip siulittaasuuffigisaani peqataapput.

/ritzau/