Takorlooruk aningaasarsiavit 30 procentia ilanngaatitaqanngitsumik akileraarutigalugu. Inatsisartunut ilaasortat tamanna ataasinngornermi juunip arfineq-pingajuani oqallisigaat.
Aqqalu C. Jerimiassen (A), apeqquteqaat aallaavigalugu oqallisissiortuuvoq. Taassuma akileraartariaaseq "flat tax" atuutilersikkusuppaa. Tamannalumi aamma Inatsisartunut siorna qineqqusaarnerminni qineqqusaarutigaa.
Takorlooruk aningaasarsiavit 30 procentia ilanngaatitaqanngitsumik akileraarutigalugu. Inatsisartunut ilaasortat tamanna ataasinngornermi juunip arfineq-pingajuani oqallisigaat.
Aqqalu C. Jerimiassen (A), apeqquteqaat aallaavigalugu oqallisissiortuuvoq. Taassuma akileraartariaaseq "flat tax" atuutilersikkusuppaa. Tamannalumi aamma Inatsisartunut siorna qineqqusaarnerminni qineqqusaarutigaa.
Siunnersuuteqartup innuttaasut qanorluunniit aningaasarsiaqaraluartut tamarmik ilanngaatitaqanngitsumik 30 procentimik akileraartarnissaat isumatsialaasoraa.
- Kialluunniit kaasarfimmioriligassaa malunnaatilimmik qaffariaateqassaaq, naak aningaasanik inatsimmi nikisitserujussuanngikkaluarluni. Utertoornerpassuit tapiutissatullu akiligassitsinnerpassuillu piujunnaarsinneqassapput, siunnersuuteqartoq oqarpoq.
Naalakkersuisoq: Akissaatikinnerit akileraarnerulissapput
Akileraartarneq oqallisigineqartutut ilissagaluarpat tamanna kikkulluunniit aningaasaateqarnerulernerannik kinguneqassanngitsoq, Aningaasaqarnermut Akileraartarnermullu Naalakkersuisoq, Aqqaluaq B. Egede (IA) oqarpoq. Taamaalilluni Atassutip siulittaasuata oqaasiisa akerlianik oqarpoq.
- Ilanngaasiinani akileraarusiisarneq inuiaqatigiinni naligiinnginnermik annertunerulersitsissaaq. Isertitakitsut akunnattumillu isertitaqartut ullumikkornit akileraarnerusalissapput, akerlianillu isertitaqarnerpaat akileraarutaat appartinneqassapput, Aqqaluaq B. Egede oqarpoq.
Taassuma 160.000 koruuninik ukiumut isertitalik ullumimit 9.300 koruunimik akileraarnerusalissasoq, 500.000 koruuninillu isertitalik 34.900 koruuninik akileraarnikillissasoq oqaaseqarnermini nassuiaatigaa.
Nunap karsianut akisussaqisoq
Tamanut annertoqatigiimmik 30 procentimik akileraartalertoqassagaluarpat, tamanna nunap karsiata ukiumut 600 millionit koruuninik iluanaarutikinnerulernissaanik kinguneqarnissaa ilimanartoq, Naalakkersuisoq aamma oqarpoq.
- Taamaalilluni akileraarusiisarnikkut oqilisaaneq immikkoortuni allani qaffasinnerusunik isertitaqarnissamik pisariaqalersitsissooq, pisortaniluunniit annertuumik sipaarnermik nassataqartoq matumani pineqarpoq. Tamanna inuiaqatigiitsinnut annertuunik kinguneqassaaq, Aqqaluaq B. Egede oqarpoq.
Oqallisissiamik saqqummiussisup siunnersuutini qanoq aningaasalersorneqassanersoq oqallinnermi oqaaseqarfiginagulu siunnersuuteqarfiginngilaa.
Tamannalu Siumumeersup, Erik Jensenip, uparuarpaa.
- Siumut isumaqarpoq aningaasaqarnikkut akisussaassuseqartumik ingerlatsinermi akileraarutitigut annertuumik oqilisaassisoqassappat qanoq aningaasalersorneqarnissaa ersarissumik saqqummiunneqartariaqartoq, taanna oqarpoq.
Naalakkersuisoqataasut akuersaanngikkaat
Atassummeersup siunnersuutaa suleqataasa isumassarsiatsialattut nalilinngilaat.
- Pissakinneroreersut eqqorneqassanngillat. Tamanna pillugu ilanngaatitaqanngitsumik assigiimmik akileraartarnissamik Atassutip ilusiliaa Demokraatit tapersersorsinnaanngilaat, Margrethe Thårup Andersen (D), oqarpoq.
Akileraarnikillinissap sunniutissai pissakinnerusunut akisunerusussaanerat tunngavilersuutigalugu tamanna Inuit Ataqatigiit orniginngikkaat, Ane Hansen (IA), oqarpoq.
