Mianersortoqaraluartoq aningaaseriviup ukiup aallartinnerani angusai ajunngitsut

Bankivik, Føroya Bankip pigisaa, ukiup qaammataani pingasuni siullermi angusat naammagisimaarneqarput.

Aningaaseriviup Kalaallit Nunaanni ingerlatsinera akileraarutit suli ilanngaatiginagit 13 millionit koruuninik isertitsivoq, tamannalu 2024-mi piffissamut tassunga sanilliullugu pitsanngoriaataasoq aningaaserivik tusagassiuutinut nalunaarummi ilisimatitsivoq.

- Ukiormanna qaammatini siullerni pingasuni ingerlanerput naammagisimaarutigaarput, pingaarnertullu nuannaarutigaarput Kalaallit Nunaanni sullitat arlallit Bankivik pingaarnertut bankerilersimammassuk, bankip pisortaa Turið F. Arge oqarpoq.

Nunani tamalaani eqqissiviilliornerit pisiniartut pissusilersornerannut sunniuteqartut aamma oqaatigaa:

- Nunarsuarmi politikkikkut pissutsit nalunarseqqanerat ukiormanna qaammatini siullerni malunnaateqarsimavoq, tamatumalu kinguneranik sullitat mianersornerulersimallutik, ingammik aningaaserinikkut aalajangigassat annertuut eqqarsaatigalugit. Taamaakkaluartorli realkreditimik taarsigassarsisitsinerit uninngasuutillu uatsinni annertuseriarsimapput, Turið F. Arge oqarpoq.

Aningaaseriviup Kalaallit Nunaanni uninngasuutaanut erniat 2024-mi ukiup qaammataani pingasuni siullerni piffissamut tassunga sanilliullugu 8 procentimik qaffariarput.

Føroya Bankip ukiup qaammataani pingasuni siullermi naatsorsuutaani kisitsisit pingaarnerit ataani takuneqarsinnaapput:

Naatsorsuutit inerneri pingaarnersiukkat

- Akileraarutit sioqqullugit inernerat tassaavoq 76 mio. kr.

- Appartitsinerit sioqqullugit ingerlatsinerup inernera 56 mio. kr.-iuvoq

- Aningaaseriviup taarsigassarsisitsinera 9,3 mia. kr.-iuvoq

- Aningaaseriviup realkreditimik taarsigassarsisitsinera 2,9 mia. kr.-iuvoq

- Aningaaseriviup uninngatitai 10,3 mia. kr.-iupput

- Siulersuisut naatsorsuutigaat ilanngaatissat ilanngaatigereerlugit 2025-mi naatsorsuutit inernerat katillugit 210-240 mio. kr.-ip nalaaniissasoq