Illuatungiliuttut Inatsisartuni ataatsimiinneq pissanganartoq pillugu: Naqqanik kiliuisoqarpoq

Nunatta Karsia pillugu 2025-mut naatsorsuutit Inatsisartut sisamanngornermi novembarip tallimaani aappassaaneermatigit aaqqiagiinngittoqarpoq.

AAMMA ATUARUK

Nivi Olsenip tatiginnikkunnaarnerit marluk anigorai

Illuatungiliuttut pingasut tatiginnikkunnaarlutik taasititsisut Demokraatit, IA, Atassut attaviitsullu ataatsip pinngitsoortikkaat, naalakkersuisooqatigiit partiit tamarmik oqaaseqanngitsulluunniit taasisoqassasoq aalajangerput.

Tamanna illuatungiliuttunit tupigusuutigineqallunilu isornartorsiorneqarpoq.

- Siullermik ataatsimiinnerup ingerlanneqarnera tupaallaatigaara. Naalakkersuisooqataasut Atassut oqaaseqartinneqanngillalluunniit, nalunngilaralu Nunatta Karsia pillugu naatsorsuutit isornartorsiorsimassagaluaraat, Siumup siulittaasua Aleqa Hammond Sermitsiamut oqarpoq.

Inatsisartut Siulittaasoqarfiat ataatsimiinnerup innuttaasut naalakkersueqataanerat tunngavigalugu eqqortumik ingerlanneqarnissaa qulakkeerniarlugu akuliutinnginnerat Inatsisartut suleriaasiannik unioqqutitsinerusoq taanna isumaqarpoq.

Nikallornartut nutaat

Ataatsimiinneq aatsaat nalunaaqutaq arfineq-marluk missaanni, Inatsisartut ataatsimiittarnerannit kingusinaarnerungaartumik, naammassivoq.

Oqaluuserisassap suliarineqarnerata unitsinneqannginnera – Atassutip aamma siunnersuutigisimasaatut - ataatsimiititaliamut utertinneqarsimannnginnera Aleqa Hammondip tupigusuutigaa.

- Tassa tamakkua uannut tupannarput,oqaluuserisamimi taama pingaaruteqartigisumi tamanna aatsaat taama nikallornartigaaq.

- Naalakkersuisunit pitsaassuseq suliallu eqqarsaatigalugit naqqanik kiliuinerivoq. Taakkulu politikkikkut tunuliaqutiminnit akuerineqaannarnerat isornartorsiugassaalluinnarpoq, Aleqa Hammond oqarpoq.

Naalakkersuisooqatigiit tamarmik oqaaseqartitaannginnerat avissaartuunnermut ersiutaasoq taanna isumaqarpoq.

KNQK-p 2025-mi tapiissutini ilai missingersuusiami akuerisaasumi allatut atorneqarsimasut Naalakkersuisut ilisimammassuk Siumut ilinniartitaanermut, kultureqarnermut, timersornermut ilageeqarnermullu naalakkersuisumut Nivi Olsenimut (D) tatiginninnginnermik taasititsivoq.

- Naatsorsuutit malittarisassat tamaasa malinnagit saqqummiunneqarneri ataatsimiititaliamullu utertinniarneqannginneri innuttaasut eqqarsaatigalugit pitsaavallaanngilaq. Kukkussutillu tikkuarneqartut isiginngitsuusaarneqarput, tamannalu Naalakkersuisut ataatsimut isigalugit akisussaassuseqannginneruvoq, Aleqa Hammond oqarpoq.

Innuttaasunik naalakkersueqataatitsilluni oqallinnissaq mattunneqartoq

Aamma illuatungiliuttut partiianni Naleqqami oqaaseqartartut suli oqaaseqannginnerini taasititsisoqarnissaanik aalajangerneq paasiuminaatsinneqarpoq.

- Oqallinnerup innuttaasut naalakkersueqataanerat tunngavigalugu ingerlanneqartup mattunissaa ima soqutigineqartigimmat allaat nunatta karsia pillugu naatsorsuutit, tassani malittarisassat unioqqutinneqarsimasut arlallit ilaatigut Nivi Olsenimut Naalakkersuisunullu tatiginnikkunnaarnermut pissutaasimasut, oqaluuserineqaqqinnavianngitsut ingasattumik oqaatigineqarnera tupigusuutigaara, siulittaasoq Pele Broberg oqarpoq.

AAMMA ATUARUK

Atassut: Naalakkersuisoqataanerput nalorninartorujussuarmiippoq

Ippassaq oqallinnermi Naleraq marloriarluni tatiginnikkunnaarnermik taasititsivoq. Tamannali oqallinnerup taama sivisutigineranut pissutaanngitsoq Pele Broberg isumaqarpoq.

- Partiit naalakkersuisooqatigiit naalakkersuisoq inatsisinik unioqqutitsisimasoq annaatissanerlugu taasisoqarnera qanoq sivisutigisoq misissorutsigu piffissarujussuaq atorpaat. Taamaammat tatiginnikkunnaarnermik taasisitsinissamik oqallinneq aalajangiisuunngilaq.

Ataatsimiinnermik unitsitsigallarnerit ilaat nalunaaquttap-akunnerinik marlunnik sivisussuseqarpoq.

Inatsisartut 2027-mut aningaasanut inatsit pillugu tallimanngornermi aappassaanik oqaluuseraat, ippassarlu ataatsimiinneq oqallinnermut tassunga qularnanngitsumik sunniuteqangaassaaq, Naleraq isumaqarpoq.

- Inatsisit maleruarnissaat pingaaruteqarpallaanngitsoq partiit naalakkersuisooqatigiit Ippassaq takutippaat. Tassa imaappoq: Aningaasanut inatsimmik suliaqaraangatta maleruartariaqanngippassuk suna pingaaruteqarpa?

Atassutip taasititsinnginnermi oqaaseqartinneqannginnertik siulittaasoqarfimmut naammagittaalliutigaat. 14-it akuersipput, arfineq-marluk isumaqataanatillu isumaqataannginngillat, Atassullu taasisoqannginnerani ataatsimiittarfimmit anivoq.

Sermitsiap IA Demokraatillu sisamanngornermi ataatsimiinneq pillugu oqaaseqartinniarluarpai, aqqissuisoqarfimmili piffissaq killigititaasoq qaangiummat suli akissuteqarsimanngillat.

Partiit naalakkersuisooqatigiit Demokraatit, Inuit Ataqatigiit aamma Atassut tatiginnikkunnaarnermik pinngitsoortitsilluni oqallinnerup kingulliup kingorna ingerlaannaq taasisoqassasoq siunnersuutigisimagaat Inatsisartut siulittaasuata Kim Kielsenip (Attaviitsoq) Sermitsiamut nassuiarpaa.