MIO nunap karsianit millionilikkaanik aningaasannaqqittoq

Kalaallit Nunaanni meeqqat pisinnaatitaaffii pillugit sullissivik, MIO, aningaasarliorpoq.

Sullissiviup aningaasanik, nunap karsianit ukioq manna pissarsiaminik, amigaateqalernera, Akileraartarnermut Naalakkersuisup, Aqqaluaq B. Egedep (IA), Inatsisartut Aningaasaqarnermut Akileraartarnermullu Ataatsimiititaliaanut, oktobari naalersoq annguppaa. Tamanna Inatsisartut nittartagaani, ataatsimiititaliap aalajangigai pillugit paasissutissaataasiviani allassimavoq.

MIO-mut aningaasaliissutit 3.355.000 koruuninik amerlineqarnissaat Naalakkersuisut kissaatigaat. Tamanna ataatsimiititaliap isumaqatigiittup akuerisimavaa. Ataatsimiititaliami siulittaasoq, Aqqalu C. Jeremiassen (A), akuersinermi atsiortuuvoq.

-  Sullissivimmi aningaasaqarnikkut pissutsit malittarisassanik unioqqutitsiffiusut paasineqarsimanerisa nassatarisaanik ukiumi aningaasanut inatsiseqarfiusumi 2026-mi aningaasanik tigoriaannarnik amigaateqarneq aningaasaliissuteqaqqinnissamik qinnuteqaammut tunngavilersuutigineqartoq ataatsimiititaliap maluginiarpaa.

- Tassunga atatillugu ataatsimiititaliamit oqaatigineqassaaq ilassutitut aningaasaliissuteqarnissami siunertaanngimmat aningaasanik tigoriaannarnik amigaateqarnerup matussuserneqarnissaa, siunertaallunili aningaasartuutissanut pisariaqartunut aningaasaliissutitigut tunngavissiinissaq, Aningaasaqarnermut Akileraartarnermullu Ataatsimiititaliaq allappoq.

Ataatsimiititaliaq: MIO-p ingerlaannarnissaa qulakkeerparput

Aningaasat taakkua, tassa 3.3 millionit koruunit Isumaginninnermut Aqutsisoqarfimmut aningaasaliissutaaqqaaraluartut MIO-mut nuunneqarput. MIO aningaasanut ukioq manna inatsisikkut 6.4 millionit koruuninik pissarseqqaarpoq. Maannamulli aningaasaliissutaaqqittut ilanngullugit sullissivik 9.8 millionit koruuninik ukioq mannamut aningaasalerneqarpoq. 

MIO-mut aningaasaleeqqinneq sullissiviup ingerlaannarnissaanik qulakkeerinnissasoq ataatsimiititaliaq isumaqarpoq.

- Naalakkersuisut qinnuteqaataat ataatsimiititaliamit ima paasineqarpoq; aningaasaliissuteqaqqinnikkut sullissiviup suliassaminik isumaginniinnarsinnaanissaa qulakkeerneqassasoq, Ataatsimiititaliaq allappoq.

MIO-mi pisorpassuit

MIO-mi qaammatit kingulliit ingerlaneranni pisorpassuaqarpoq. Sullissiviup aningaasaatai peqquserluttuliornikkut atornerlunneqarsimasut pasineqarpoq. Meeqqat pillugit oqaaseqartartuusimasoq, Stina Sværd, tamanna pillugu sullissivimmi qaffasissumik atorfeqarsimasumik politiinut suliassanngortitsivoq. Pisut tamakkua pereertut Stina Sværd, illersuisutut Naalakkersuisunit aamma tunuartinneqarpoq. Suna tamatumunnga peqqutaanersoq Naalakkersuisut ulloq manna tikillugu nassuianngisaannarpaat.

Stina Sværd tunuartitaanermi kingorna aningaasanik atornerluisimanani Facebookkikkut nalunaaruteqarpoq.  

- Uannut pingaaruteqarpoq erseqqissassallugu, peqquserlussimannginnama imaluunniit suliniaqatigiiffiup aningaasaataanik atornerluisimannginnama. Paarlattuanik nukikka atorlugit suliniaqatigiiffiup sulisullu soqutigisaat, minnerunngitsumillu meeqqat pisinnaatitaaffii illersorlugit isumagisimavakka.

- Peqatigitillugu aningaasanik annertuumik atornerluisoqarsimanera qulaajarniarlugu sulisimavunga, isumaqarama ilumoortoq saqqummertariaqartoq, meeqqanullu akisussaaffipput tamatigut salliutinneqartariaqartoq, taanna oktobarip 16-ni allappoq.