USA-mi aktianik niuerfiit annertuumik appariareerlutik ingerlalluaqqilersut    

Amerikamiut teknologii aqqutigalugu aktiaat niuerfiit tallimanngornermi ammarneqarneranniit, appariaateqangaatsiareerlutik maanna sisamanngornermiit ingerlalluaqqilersutut isikkoqalerput.

Teknologimut tunngasumik aktiaqarfiit nalunaarsorsimaffiat Nasdaq ammarneqarnerata kinguninngua procenti ataaseq, sinnerlugu qaffappoq. Aamma S&P 500, aktiat nalingisa nalinginnaasumik ineriartornerannik uuttuut qaffariarpoq.

- Amerikamiut teknologii aqqutigalugu aktiaat sakkortuumik ippassaq eqqugaareerlutik, annaasaqaatit ilaannik ullumi utertitsipput, Sampensionimi aktianut pisortaq Philip Jagd oqaaseqaammini naliliivoq.

- Aningaasaliisartut eqqissiallannerannut tamanna takussutissaavoq, siooranerullu sakkortunerpaartaa akunnerup naanerani qaangerneqarluni, oqarpoq.

Amerikamiut aktiaataasa nalingisa nalunaarsorsimaffiini pingaarnerni appariaateqangaatsiarneq sisamanngornermi malugineqarpoq. Teknologiimut tunngasunik aktiaqarfik Nasdaq 5,5 procentimik matumani appariarpoq.

Demokratit qinigaaffiup qiteqqunnerani qinersinermi ajugaangaatsiarnerat, ilimagineqartutut kingusinnerusukkut sunniuteqarluni, silassorissuusiallu pillugit pisortat nakkutiginninnerisa annertusisinnaanerat ernumanermik pilersitsivoq.

Qinigaaffiup qiteqqunnerani qinersinermi marlunngornermi ingerlanneqartumi, Kongressimut ilaasortanngortut amerlasuut silassorisuusianik suliniutinik kigaallatsitsinissamik neriorsuinerat ernumassutigineqarpoq.

USA-mi aningaasaqarnermut tunngatillugu tallimanngornermi aktiat niuertarfiata ammarneqannginnerani nutaarsiassat pitsaasut saqqummiunneqarput. Suliffissaqartitsinermut nalunaarusiami USA-mi suliffissaqartitsinerup pitsaasumik ineriartornera takuneqarsinnaavoq.

Niuerfinnili teknologiimullu tunngasunik aktiat nalingisa nikerarnerat suli unerisimanngitsoq ilisimatuut arlallit naliliipput.

Eqqissiallannissamut maanna suli siusippallaartoq, Philip Jagd isumaqarpoq.

- Niuerfinni nikerarnerup ingerlaannarnissaa ilimagineqarpoq, niuerfinnilu suli nikerarnerit annertuut piffissami aggersumi pisinnaapput, taanna oqarpoq.

Briefing.com-imi aningaasarsiornermut misissueqqissaarisoq Patrick O'Hare aamma taama naliliivoq.

- Niuerfiit ullumikkut aallarteqqinniarsaripput, aqqulli siunissamut erseqqissumik, takuneqarsinnaanngilaq, AFP-mut oqarpoq.

RITZAU