KL

DK

Nikkulaat Jerimiassen Naleqqamut ilaasortanngortoq

Inatsisartunut Naalakkersuisunullu ilaasortaasimasoq aamma Kalaallit Nunaanni Aalisartut Piniartullu Kattuffianni, KNAPK-mi, siulittaasuusimasoq Naleqqamut ilaasortanngortoq, partii allappoq. - Suleqatigiilluarnissarput qilanaaraarput! Pele Broberg aamma Jens NapãtôK’ allappoq.

Jerimiassen Inatsisartunut kommunimullu siorna qinersinermi, kattuffimmut siulittaasuunermi nalaani, qineqqusaarpoq. Qinikkatulli atuutilissutiminik qinerneqanngilaq.
Andreas Wille Andreas Wille Tusagassiortoq
Saqqummersinneqarpoq

- Nikkulaat Jerimiassen - Naleqqamut tikilluarit! Naleraq Facebookkimi quppernermini tallimanngornermi ualisoq allappoq.

Nikkulaat Jerimiassen Kalaallit Nunaanni Aaalisartut Piniartullu Kattuffiani, KNAPK-mi siorna oktobarip qaammataani siulittaasuujunnaarpoq. Taassuma kingorna tamat oqallittarfiini taanna tusarsaanngilaq. Politikkimulli maanna uterpoq. Tamanna Naleqqap siulittaasuata, Pele Brobergip, Jens NapãtôK’, partiimi siulittaasumut tulliusoq, peqatigalugu nuannaarutigaat.

- Nuannaarutigaarput politikkikkut sulinissamut Naleraq toqqarsimallugu, ataatsimoorlutalu siunissami suleqatigiinnissarput qilanaaralugu tikilluaqqungaarpagit.

- Politikkikkut misilittakkatit annertuut, piginnaasarpassuatit ilaatigut Naalakkersuisuni sulinikkut, KNAPK-mi siulittaasuunikkut kiisalu politikkikkut sulinikkut katersatit, inuiaqatigiinnut iluaqutaasinnaasutut pingaaruteqarluinnartutut sulinermi pisuunnguallaatigiinnarnagit iluaqutaasussaapput kivitseqatigiinniarnitsinni, Naleqqap siuttui allapput.

Kattuffimmut siulittaasuulluni qineqqusaartoq - qinigaananili

Nikkulaat Jerimiassen KNAPK-mut siulittaasuunermi nalaani Siumut tunuliaqutaralugu Inatsisartunut siorna marsimi qinersinermi qineqqusaarpoq. KNAPK-mi siulittaasoq partiimut aalajangersimasumut ilaasortaaqqusaanngilaq. Taamaattumik Jerimiassen taamanikkut kattuffimmi siulittaasutut sulinngiffeqarluni Inatsisartuni issiavimmik pissarseriaraluarpoq. Tamannali iluatsinngilaq. Taassuma saniatigut Kommune Qeqertalimmi qinikkatut atuutilerusulluni siorna aamma qineqqusaarpoq. Siumullu tunuliaqutaralugu sinniisussatut inissittunut ilaavoq.  

Taassuma misilittagai Naleqqap maanna atorfissaqartippai.

- Nalunngilarput politikkikkut sulineq assigiinngitsunik misilittagaqarfiusoq, tamannalu tunngavigalugu ilisimasatit, isummatit misilittakkatillu partiitsinni iluaqutigisinnaanissaat eqqarsaatigalugu tunniussassarpassuatit misilittakkatillu pillugu avitseqatigiittarluni siunnerfeqatigiinnissamut suleqatigiinnissaq qilanaaraarput, Naleqqap siuttui allapput.

Nikkulaat Jerimiassen politikkimi nutaajunngilaq. Aalisarnermut Piniarnermut Nunalerinermullu Naalakkersuisuunermik Inatsisartunullu ilaasortaanermik misilittagaqarpoq.

nikkulaat jerimiassen knapk inuiaqatigiit politikki naleraq pele broberg

Atorfiit tamaasa takukkit

PODCASTI

Powered by Labrador CMS