Munck millioninik nalilinnik annaasaqareernermi nakkutilliinertik annertusivaat

Susassaqanngitsunut Ilulissanik mittarfimmik sanaartorfik iserfigineqaqqissanngilaq.

Videot nakkutilliissutit kissaatigineqanngitsumik isaanerit pinngitsoortissavai.

Januaarip qaammataani ukioq manna Ilulissani mittarfimmik sanaartorfimmi Munckip sanartorfiani agguaqatigiisillugu qaammammut atasiarluni susassaqanngitsunik iserfigineqartarpoq. Ukiut siulianut sanilliullugu amerleriarsimallutik, taama Munck Civil Engineering A/S-imi suliniummut pisortaq, Daniel Jørgensen Sermitsiamut oqaluttuarpoq.

- Sanaartorfimmi atortut sakkullu tammagartarput, qaammatilli kingulliit allaaneruvoq.

- Suliffeqarfiup biilii marluk aallarunneqarsimapput, ilaatigut aamma ATV, supoortoq, gummigedi, sulisut nerisassaat. Kingullermik dumperersuaq oqimaatsoq innakkut nakkarsimavoq. Aamma marloriarluni illoqarfimmiit biilinik aallarussisut mittarfiffamiissimapput.

Piffissartornartoq

Tillinniarnerit aningaasatigut kisimik eqquinngillat. Piffissamik aamma eqquipput. 

Piffissaq unnerluutiginninnermut atorneqartariaqartarpoq, suliassat suliarineqartariaqartarput, sanaartorfimmut atugassaagaluit. Aamma atortunut akornusertunut tikisinniarnerannut atorneqartariaqartarpoq. Sanaartornissamullu piffissaliussaq kinguaattoorfinngortarpoq.

- Kinguneri assigiinngillat. Ilaatigut aningaasatigut aaqiqtassat, soorlu sillimmasiisarfinnut attaveqarnerit. Suliffiup iluani sanaartornermut atugassaraluit allanut atortariaqartarput. Tamanna suliamut kinguaattoorutaasarpoq, atortullu taartissat tikinnissaat utaqqisariaqartarlugit, Daniel Jørgensen Sermitsiamut oqarpoq.

Videomik nakkutilliissutit annertusinerannut neriuutigaat susassaqanngitsut isaasarnerat unissasoq, sulisunullu sullitanullu toqqissisimatitsilersumik.

- 

- KJ Greenlandip Munck Civil Engineeringillu soorunami neriuutigaat qaammatini kingullerni nuanniitsut maanna unitsinneqarsinnaassasut, sanaartorfinni nakkutilliinermut atortorissaarutit nutaarluinnanngortinneqarmata, Daniel Jørgensen oqarpoq.