Naasuliardarpimmi akunnittarfittaassaq nappaanersiorneqalersoq

Qallunaaq pigisanut nalilinnut aningaasaliisartoq Danmarkimilu suliffeqarfissuarmik milliardilikkuutaanik kaaviiaartitaqartartumik tassa Tækkersmindemik aamma piginnittoq, Jørn Tækker, Tasiilami Tiniteqilaamilu arlalinnik siorna upernaakkut illusivoq.

Illut pisiani taakku sanasut nunaqavissut inuusuttullu suliffeqarfimmut inuiaqatigiit iluaqutigisinnaasaannik suliniuteqartartumut Siu-Tsiumut attuumassutillit ilaatigut ikiortigalugit nutartileruttorpai. 

Klubben akunnittarfinngussasoq 

Jørn Tækkerip Gerda Vilholmiugaluup Tasiilami illua amerikamiullu sakkutuuisa Naasuliardarpimmi illutoqarisimasaat ”Klubben” pisiarinikuuai, ”Klubben”-ilu tassa 13-14-inik initalimmik akunnittarfiliaralugu nutartileruttorlugu. Akunnittarfittaassaq nunaqavissunit atorneqarsinnaasartussamik katersuuttarfiusinnaasartussamillu aamma igaffissualilersaarpaa. – Illu nutartigarput illutoqaammammi nappaanersiornerassallugu tulluarnerpaajugunanngikkaluarpoq. Nutaamilli qalialersuinitsinnik naammassinninnitta malunnartinnissaa nuannerunartikkakku tassa taamaaliussaagut, Jørn Tækker ulluni makkunani Tiniteqilaamiittoq oqarpoq.

Akunnittarfittaassaaq Tasiilami suliffeqarfik inuiaqatigiit iluaqutigisinnaasaannik suliniuteqartartoq Siu-Tsiu suleqatigalugu nappaanersiorniarpaat.

Inuiaqatigiit iluaqutigisassaannik suliniutaasoq

Iluanaaruteqarnissi pinnagu Tunumili inuiaqatigiit iluaqutigisinnaasaannik suliniuteqarnissi siunertaralugu illut pisiarigini, Jørn Tækker oqarpoq. 

– Aningaasarsiornikkut Kalaallit Nunaanni iluanaaruteqarnissaq siunniunneqanngilaq. Inooqataanikkulli atugarliortunut suliassaqartitsinermut tunngasuuvoq, najukkami inuiaqatigiinnut suliffissaqartitsillunilu isertitaqartitsisussaq. 

Jørn Tækkerip illunik nutarterinissaminut atatillugu sanasumik sanasunngornissamik inuusuttunut ajoqersuussisinnaasumik atorfinitsitsinissi isumassarsiaraa. 

– Inuusuttut Siu-Tsiumeersut sanaartornermik piginnaasaqarluartut ersarippoq, aamma illutoqqamik akunnittarfiliaralugu nutartereqataanertik nuannareqigaat. Nutarterinerput ilimagisamit sivisunerorataannaavoq, soqutaavallaanngilarli. 

– Inuusuttut neriuutissaqalersinnissaat siunertaavoq. Assersuutigalugu sanaartornermi periarfissanut akunnittarfimmiluunniit eqqiaasutut, nerisassiortutut illoqarfimmiluunniit takornariartitsisutut suliffittaarsinnaanermut tunngasutiguusinnaavoq. Inuusuttut nammineerlutik ingerlassinnaanngilaat, taamaattumik nunaqavissut ineriartortitsinermi soorunami suleqatigisariaqarpaat, Jørn Tækker oqarpoq. 

Nereqatigiinneq 

Tasiilami qassikattannguaannarnik neriniartarfeqarnera sutorniartarfeqarneralu, Jørn Tækkerip tupigusuutigisaanut ilaapput. Taakkunanngalu arlaannaalluunniit nunaqavissunit nerisassiarineqartartunik mamartuliarineqartartunillu aamma sassaalliisannginnerat.

– Nereqatigiinnermik takornarianut illoqarfiullu inuinut akunnittarfimmi aaqqissuussisoqartalernissaa takorloorpara. Nunaqavissunit nerisassiat takornariat ilarpassuisa ooqattaarusuttarunavippaat, nunaqavissullu akunnittarfittaami ooqattaarisitsinermik assersuutigalugu sapaatip akunneranut ulluni marlunni pisartumik aaqqissuusseqataasinnaalernissaat takorloorpara. Nunaqavissunit nerisassiat ooqattaarutigineqartartussat nunatta pissarititaanik suliaappata taava akisorujussuarnavianngillat, inuusuttullu Siu-Tsiumeersut tamakkuninnga nerisassiornissamut immaqa piareersaaqataasarsinnaasassapput, Jørn Tækker oqarpoq.