Sarfaq Ittuk ilaaffigalugu: Kitaata sineriaani imaatigut angallannermi uummataavugut

Nipituumik nipeqarpoq, kuffertini assakaasulik ikaartarfikkut saviminermik sanaajusukkut kalillugu Sarfaq Ittummut arnaq ikilermat. 

Sinersortaatip pujortartarfiata nalaani inuit pujortarput ilaallu ataasiakkaat tiitorfimmut ataasiartakkamut kaffisorusaajutigalutik. Angut inuusuttoq nasalik iverutilillu sanioqqulluni pisuppoq majuartarfikkoorlunilu qaavanukarluni, mobilini ammut isigiutigalugu. 

Marlunngornerup ullaarivaa, pisarnertullu Sarfaq Ittuk erniinnannguaq avalassaaq kujammut Narsap tungaanut ingerlaassalluni, taamaalioreerunilu aamma avannamut ingerlaaqqittussaalluni. 

- Tikilluaritsi, umiarsuarmi aquttup umiarsuarmilu inuttat arlallit ilaasussanik nutaanik tikilluaqqusipput. 

Nalunaaqutaq 09.30 ikaartarfik amoorneqarpoq, pituutat pituussaarneqarput umiarsuarlu avalalluni. Sarfaq Ittuk ukiuni 34-ni taamaaliortuartarsimavoq, tamannalu sivisoorujussuuvoq umiarsuit ukiui eqqarsaatigissagaanni. 

Ilaasunik angallassilluni sinersortaatitoqqap taassuma siunissaa sivisuumik isumaqatigiinniutigineqarsimallunilu oqallisigineqartarsimavoq. Maanna angallassinermi kiffartuussinissamik isumaqatigiissut, Arctic Umiaq Linep Naalakkersuisut peqatigalugit isumaqatigiissutigisimasaa, aappaagu atorunnaartussanngorpoq. 

Tamatuma malitsigisaanik umiarsuaq suneqassanersoq, maannamut suli ilisimaneqanngilaq. Sarfaq Ittuk pisoqaavoq, ullullu ilaanni atorneqarunnaaruni, nutaamik taarserneqartariaqartoq, Arctic Umiaq Linep pisortaa arlaleriarluni kissaateqartarnikuuvoq.

Allaammi aamma sinersortaammik nutaamik pisaartoqarsinnaaneranut titartakkat nerriviup ilisiviisa arlaanniititaqartoqarpoq. 

Maannakkuugallartorli politikkikkut aalajangertoqarnissaa amigaataavoq, tassa siunissamut suli imaatigut ilaasunik angallassineq atuutiinnassanersoq, Kalaallit Nunaata atortulersuutitigut ineriartorneranut atatillugu, imaluunniit silaannakkut ilaasunik angallassineq kisimi aallutilerneqassanersoq. 

Taamaattumik imaatigut ilaasunik angallassilluni sineriassorneq qanittumi oqaluttuaannanngussanersoq, piffissap tamanna takutissavaa. Utaqqiisaa Sermitsiamit Sarfaq Ittummut ilaalluta umiarsuatoqanngorsimasoq taanna ilisarititsissummik allaaserissallugu angalaqataavugut. 

Sinersortaatit unitsinneqassappata, nunaqarfiit eqqugaassapput 

Nuummiit avalareernermi tiimit arlalinnguit qaangiummata umiarsuaq aappaluttoq qaqortunik allalik ilaasunillu angallassissutaasoq orfaalaalerpoq. Umiarsuarmi ilaasut oqorsaatitik piiarsimavaat pigisatillu umiarsuup siniffiisa qaavinut siniffigissamaakkaminnut iliorarsimavaat, ilaasalu ineeqqaminnut pisattatik iliorareersimavaat. 

Sumi tamaani inuit imminnut ilassiorput. Assigiinngitsunik siunertaqarlutik sumunnarfeqarlutillu angalaqataapput. Ilaat sulinerminnut atatillugu ilaasutut angalapput, ilaat qanigisaminnik naggammik qaniuiartorlutik ilaapput allallu Nuummi ilaquttaminnut tikeraareerlutik nunagisaminnut angerlarlutik ilaapput. 

Aappariit Lars Pavia aamma Tora Johnsen Qeqertarsuatsiaat tungaannut ilaapput, tassani illuuteqarput iluarsagassaminnik. 

- Aamma piniariassaagut, Lars Pavia oqaluttuarpoq. 

Taakku aappariit nerisarfimmi issiapput, ikinngutimik ilaat Malik Bislev issiaqatigalugu. 

- Arsummukarpunga, tamatumalu kingorna Kangilinnguanukassamaarpunga suliartorlunga, taanna oqarpoq. 

Malik Bislev suliffeqarfimmi sanaartornermik ingerlataqarfiusumi atorfeqarpoq. Sineriammi sumi tamaani sulinerminut atatillugu angalasaraluaqaluni siornatigut Kangilinnguaniinngisaannarsimalluni, taanna oqaluttuarpoq.

Lars Pavia-p siullerpaamik Sarfaq Ittuk-mut ilaasimanera pisimavoq ukiut qulikkaat arlallit matuma siorna, taamani meeqqani assammik arsarluni nunatsinni pissartanngorniunnissamut peqataasussat angalaqatigigamigit. Taassuma aappaa umiartornerlulluni merianngujasuuvoq, namminerlu isumaqaraluarluni angalanermi tassani Sarfaq Ittuk orfaangaatsiartoq, taamaattoq isumaqarpoq, assut uggornassasoq, siunissami imaatigut ilaasunik angallassissutaarussappat. 

- Imaatigut angalajuaannarnikuuvugut. Aamma nunaqarfiit pinngitsoorsinnaanngilaat. Taakkuupput imaatigut ilaasunik angallassineq unitsinneqassappat ajorsarnerpaajusussat, Lars Pavia oqarpoq. 

Nerriviit arlallit ungasitsigaluni issiaqatigiipput Klara L. Petersen, Eli Rasmussen aammalu Sofia Mikaelsen. 

Klara L. Petersen Paamiunut angerlariartorpoq, tassani inunngorsimavoq alliartorlunilu. Sofie Mikaelsen aamma Eli Rasmussen tamarmik Arsummukarput. 

Januarimiit marsip tungaanut sapaatip akunnerini arfinillit arfineq marlullu akornanni Sarfaq Ittuk ingerlaanngiffeqaraangat, Arsummiit Arsummullu angalassagaanni qulimiguullit pinngitsoorneqarsinnaasanngillat. Taamaattorli qulimiguullit teknikkikkut akornuteqaraangata silaluunniit pitsaanngikkaangat, aallartoqarsinnaaneq ajorpoq, arnat oqaluttuarput. 

- Sarfaq Ittuk pinngitsoorsinnaanngilarput, Sofia Mikaelsen oqarpoq. 

Taamaattumik aamma neriuuteqarpoq, imaatigut ilaasunik angallassisoqaannassasoq Sarfaq Ittuup kiffartuussinissamut isumaqatigiissutaa 2027-ip naalernerani atorunnaartussanngornerata kingorna. 

- Umiarsuaarutsitsissappata, sineriammi angalasinnaanissatsinnut periarfissaarutsinneqassaagut, taanna oqarpoq. 

Imaatigut illoqarfiit akornanni qimuttuitsoq

M/S Sarfaq Ittuk Kalaallit Nunaanni kisiartaalluni imaatigut angallassissutaajuaannarsimanngilaq. 

Taamak oqaluttuarpoq Taitsianguaq Olsen, Arctic Umiaq Linemi pisortaasoq, ulluinnarnilu allaffimmini kontor i Royal Arctic Linep Nuummi qitiusumik allaffeqarfiani allaffeqartoq. 

Allaffimmi igalaavisigut isigisinnaavaa, Sarfaq Ittuk marlunngornikkut tallimanngornikkullu tikillunilu aallaleraangat. 

- Meeraagallarama, umiarsuit ilaasartaatit pinngitsoorsinnaanngilagut. Tamatuma kingorna mittarfiit takkussuupput, periarfissagullu amerlipput, taanna oqaluttuarpoq nangillunilu: 

- Piffissaq kingumut 60’-ikkunnut utertikkaanni taamani umiarsuaqarpoq marlunnik, ataaseq Diskomik taaguuteqarpoq, aappaalu Kununnguak-mik taaguuteqarluni, taakkulu umiarsuit Den Kongelige Grønlandske Handelip akisussaaffigisaanik ilaasunik Upernavimmiit Kujataata tungaanut ilaasunik angallassiuarsimapput 90’-ikkut aallartilaarnerat tikillugu. 

1992-mi Disko aamma Kununnguak atorunnaarput. Paarlatsissatullu sanaartorneqarsimapput umiarsuit pingasut, tassaasut Saqqit Ittuk, Sarpik Ittuk aammalu Sarfaq Ittuk. 

Taakku 50 meterik takissuseqarput, 11 meterinik silissuseqarlutik tamarmillu siniffissanik 150-nik peqarlutik. Taakku peqatigiillutik sineriak tamaak kujataaniit avannaanut agguaqatigiillutik kitaata imaatigut angalasarput. 

Umiarsuit taakku siuliminnut sanilliullugu mikinerungaatsiarput. 

- Ilorrisimaarsinnaaneq aamma siuliisut pitsaatiginngilaq, Taitsianguaq Olsen oqaluttuarpoq. 

Umiarsuit piginnaasaat qaffassarniarlugu ukioq 2000-mi aalajangertoqarpoq Sarfaq Ittuk aamma Sarpik Ittuk 23 meterinik ilaneqassasut. 

Tamanna pivoq umiarsuit pineqartut qeqqisigut averiarlugit ilassutissaat sanaartorlugit, taamaaliornikkullu siniffissat amerlingaatsiarneqarput, taamaalilluni ilaasunut siniffissat umiarsuarni taakkunani marlunni 246-nngortinneqarlutik. 

Ullumikkut Sarfaq Ittuk tassatuaalersimavoq namminersorlutik oqartussanit pigineqarluni imaatigut ilaasunik angallassilluni kitaani sineriassortoq. Taamaattuaannarsimavoq 2007-mili, taamanikkut Royal Arctic Linep Air Greenland peqatigalugu ingerlatseqatigiiffik nutaaq Arctic Umiaq Line A/S pilersimmassulli. 2016-mi Royal Arctic Linep Arctic Umiaq Linemi piginneqataassutsit tamakkiisumik pigilerpai. 

Umiarsuit ilai marluk ingerlatseqatigiiffinnit allanit pisiarineqarput tamatumalu kingorna atserneqarsimallutik’Ocean Nova’ aamma ’Quest’. Taakku takornarianik angallassissutaalernikuupput Issittumi, Sikuijuitsoq Kujallermi aammalu Svalbardimi angallassisarlutik. 

Umiarsuit pingajuat allatut aaqqissorneqarpoq, taassumami pingaarnertut imaatigut angallattussaavai nunatsinni najugaqartut. Pisortaq naapertorlugu Sarfaq Ittummi ilaasartut 80 procentii nunatsinni najugaqartuupput, 20 procentiilu takornariaallutik. 

Taitsiannguaq Olsenip Sarfaq Ittuk taasarpaa 'imaatigut illoqarfiit akornanni qimuttuitsoq' – aamma patajaatsumik angallassisartoq. 

- Siorna pilersaarutigisimavagut aqqusaarsinerit 828-it umiarsuup angallavigissagai, taakkunannga marluk pinngitsoorput Arsummi anorersuaqarnera pissutaalluni, pisortaq oqaluttuarpoq ilassusiillunilu: 

- Angalanissamut pilersaarutinik malinninneq 99,8 procentiusoq taamaatitsiinnarnernut sanilliullugu. Tamanna timmisartuutileqatigiit arlaannaataluunniit angusinnaanngilaa. 

Takornarialerineq iluatsinngitsoortoq 

Nuummiit aallareernermi ulloq unnuarlu ataaseq ataallugu qaangiummat, højtalerikkut suaarutigineqarpoq Sarfaq Ittuk nalunaaquttap akunnerata affaa qaangiuppat Arsummut tikissasoq. Nalunaaqutaq 06.15-nngorpoq ilaasullu sisamat tassani niusussaapput. Ilaatigut Malik Bislev, Sofia Mikaelsen aammalu Eli Rasmussen. 

- Arsummut suleqatissaralu alla ataaseq peqatigalugu umiatsiamit allamit aatittussaavugut. Taava Kangilinnguanut ingerlaqqissaagut, Malik Bislev oqarpoq. 

Taanna umiarsuup qaavani nikorfavoq, nunaqarfillu tikikkiartugarput isiginnaarlugu. Suli taarmat qaqqat ilusaat isigineqalaarsinnaavoq. Qaammatit arlalissuit aatsaat qaangiuppata, Malik Bislev Nuummut utertussaavoq. 

Arsummi umiarsualivik mikivallaarpoq Sarfaq Ittuup talissinnaanissaanut. Taamaammat umiatsiarsuaq saviminermik sanaaq umiarsuup qulaaniit ninginneqarpoq. Malik Bislev ilaasullu allat annanniutinik sungaartoq aappaluaartunik atisitinneqarput umiatsiamullu saviminermik sanaamut pisatai ilanngullugit ikitinneqarlutik. 

Umiatsiami oqaaserpassuit atorneqanngillat, ikaassassallu ikimmata aallarpoq. Umiatsiaq utermat arnaq utoqqaq ajaappiaqartoq ilaasorineqarpoq. 

Sarfaq Ittuk umiarsuartut kinaassusiligaagaluartoq, pingaarnertullu nunaqavissunik kiffartuussisussatut pilersitaasimagaluartoq, umiarsuup atuunnerani arlaleriarluni Sarfaq Ittuk takornarialerinermik aamma suliaqartussanngortillugu aaqqissuunniarneqartaraluarpoq. 

Misiliigaluarneq kingulleq, Arctic Umiaq Line-mi pisortaasimasup, Taitsianguaq Olsen-illu taarsigaata siuttuuffigigaluarpaa, tassa 2024-mi Sarfaq Ittuk allanngortiterlugu ilaasunut ineeqqat arlallit inituninngorlugit ilorrisimaarfiusinnaasutut sananeqarmata. 

Ineeqqat anginerusunik siniffillit, allaffittallit, TV-llit immikkullu uffarfillit. Taakku sanaartorneqarmata ilaasunut siniffissiat 246-niit 203-nut ikilisinneqarput. 

Tamatumalu ilutigisaanik billetsit akii qaffanneqarput, aammalu imaatigut angalanerit isorartunerusunngortinneqarlutik kujataani Nanortalimmiit avannamut Uummannaq tikittalerlugu. 

- Tamatuma malitsigisaanik, ilaasut seks tusind-ingajaat annaaneqarput, Taitsianguaq Olsen, ingerlatseqatigiiffimmi 1. juli i 2024-mi pisortanngortoq oqaluttuarpoq. 

Eqqarsaataasimagaluarpoq, takornariat amerlanersut ilaasorineqartalissasut – tamannali iluatsippianngilaq. 

- Umiarsuarnut takornariartaatinut ilaaniarluni billetsisigaanni, akisunerujussuusarpoq, taamaattorli aamma sutigut tamatigut ilorrisimaartitsisoqartarluni, pisortaq oqaluttuarpoq. 

Umiarsuarni takornariartaatini tamanna ajornanngilaq, tassami ilaasut ataasiakkaat amerlassusaannut sanilliullugu sulisut amerlanerujussuummata – tamannali Sarfaq Ittummi ajornakusoorsimavoq, tassanimi umiarsuarmi sulisut amerlassusaat ilaasunut sanilliullugu ikinnerujussuummata. 

Takornariat ilaasorineqanngitsoorput, taamatuttaarlu ilaasartut nunaqavissut ilaajumajunnaarput, akit ima qaffasitsigilersimammata ilaasussaagaluit allatut periarfissarsiuinnartariaqalersimammata. 

Arctic Umiaq Line 2024-mi amigartooruteqarpoq 13 millioner koruunit sinnerlugit. Amigartoorneq taanna mumisinneqarpoq, umiarsuup angallavigisartagatoqaanut, sapaatip akunnikkaarlugit sumiiffinnut tikittartussanngoqqillugu akitoqqanullu utertoqarmat. 

- Inuit ilisimasaannut uteqqippugut, Taitsianguaq Olsen oqarpoq. 

Lagkage ukiortaarsiornerlu

Sarfaq Ittummik qanimut sukumiisumillu sinersorluni ilaasunik angallassinermik misigisaqarsimasut ilagaat, umiarsuarmi inuttaasut. Taakku 21-nik amerlassuseqarput. 

Taamak oqaluttuarpoq Anders Hjelm, umiarsuarmi ’chief purser’-itut taaneqartartumik atorfeqartoq. Taannaavoq, nalinginnaasumik saaffiginnittarfimmi issiasartoq aammalu inuit ilaasussat ikisimanersut nalunaarsuisartoq aammalu ilaasussat ikiorneqarnissaminnik pisariaqartitsigaangata saaffigineqartartoq. 

Piffissami inuit angallaffiginerpaasaanni, nalinginnaasumik maajimiit septembarip tungaanut pisartumi, taanna suleqataalu ulapilluallaavissortarput. Piffissami tassani siniffissat 203-it tamarmik inussaqarajuttarput. 

- Pingaartumik nalliuttuni, imaluunniit assersuutigalugu annertuumik Nuummi pisussaqartillugu inuit ilaaffigigajuttarpaatigut, Anders Hjelm oqaluttuarpoq. 

Paasiniaasarfimmi issiasarnermi saniatigut, aamma Anders Hjelm akisussaasuuvoq nerisassiornermik kiffartuussinermillu umiarsuarmi sulialinnut. 

Ilaatigut taakkununnga ilaapput saqisut, taakku ineeqqanik siniffinnillu ilaasussanut tullernut piareersaassussisarput, taamatuttaaq sulisut umiarsuarmi nerisassaarniarfimmut atatillugu suliaqartut. 

Sulisut ilaat marluk tassaapput Lone Hansen aamma Tukummeq Nathansen, taakku marluullutik immikkut sivisuumik Sarfaq Ittummut tunngasumik oqaluttuassartaqarput. 

Tukummeq Nathansen 20-nik ukioqarpoq, taannalu umiarsuarmi cafémi nakkutilliisutut sulivoq. Akiliisitsisarfimmi issiavoq, ilaasullu inniminnigaannik isumaginnittuulluni, ilaatigut aamma immiaaqqamik ataatsimik, mamakujuttunik sandwich-imilluunniit pisiniartoqaraangat isumaginnittarluni. 

Taanna Sarfaq Ittummi inuttatut taamaallaat ukiup affaa sulisimavoq, taamaattorli umiarsuaq ilisimasaqarfigilluinnarpaa. 

- Mikisuullunga ajaga umiarsuarmi sulisuusoq akuttunngitsunik pulaartarpara. Umiarsuaq Sisimiuni uanga aggerfigisanni, talikkaangat oqartuaannarpunga, ajama umiarsuaa tikippoq, taanna oqaluttuarpoq. 

Suleqataa Lone Hansen oqaluttuarpoq, maanna ukiorpassuanngortuni sinersorluni ilaasunik imaatigut angallassissutini inuttaasarsimalluni. 

- Meeqqiulerama unikaallannikuuvunga. Taamaattorli nukarlequtiga 18-nik ukioqalermat, inuttatut uteqqippunga. Nunamiuukataavillunga, taanna oqaluttuarpoq illalaarlunilu. 

Lone Hansen Sarfaq Ittuup umiarsuaqatigisimasaani, Sappik Ittummi inuttaasimavoq, tassanilu aamma juullisioqataallunilu ukiortaarsioqataasarsimalluni – imaaani ukiortaarsiornera kingulleq 1999-mi pivoq, taanna eqqaamasalersaarpoq. 

Tukummeq Nathansen suli imaani juullisiornikuunanilu ukiortaarsiornikuunngilaq. Taamaattorli novembarip qulingani 21-nik ukioqalissaaq, taannalu umiarsuarmi nalliuttorsiutigissamaarpaa. 

- Taava lagkagetussaagut, Lone Hansen isumalluaammerluni oqarpoq. 

Politikerit aalajangernissaat

Januarimi Sarfaq Ittuk Nuummi amutsivimmi misissorneqarluni amuteqqassaaq. Umiarsuaq ukiuni 35-ni angallassisimasutut sukumiisumik misissorneqassaaq. Angusaq imaannaanngitsoq, Taitsianguaq Olsen aperissagaanni akissaaq. 

- Tassami umiarsuit silarsuaanni tunngaviusumik malittarisassaqarpoq, umiarsuit sivisunerpaamik ukiuni 25-ni atuussinnaassuseqartussaasut, tamatumalu kingorna nutaamik taarserneqartussaasut, pisortaq oqarpoq. 

Taamaammat pissanganarpoq, umiarsuup sukumiisumik misissorneqarnini qanoq anigortigissaneraa.

Sarfaq Ittuup misissorneqarnini anigorluassappagu, taava umiarsuup siunissaa pillugu aalajangernissaq politikeriniilissaaq. Taitsianguaq Olsen-imi naapertorlugu politikerit ukioq manna naatinnagu, isummertussaassapput sinerissami imaatigut ilaasunik angallassineq ingerlatiinnarneqassanersoq. 

- Kiffartuussinissamut isumaqatigiissuteqarpugut, taannalu ukioq manna aappaagulu atuutiinnassaaq, taanna oqarpoq nangillunilu: 

- Kiffartuussinissamut isumaqatigiissut nanginneqassanngippat, tassa imatut paasillugu, politikkikkut kissaatigineqassanngippat ilaasunik imaatigut angallassineq nanginneqassasoq, taava ilimagaara Royal Arctic Line aalajangissasoq Arctic Umiaq Line atorunnaarsinneqassasoq umiarsuarlu isatigassanngorlugu tunineqassasoq. 

Kalaallit Nunaata kitaanut qanoq isumaqassava, periarfissaajunnaassappat umiarsuarluni imaatigut sineriassorluni ilaasunik angallassisumik? 

- Ullumikkut ilaasunik angallassinermut tunngatillugu marloqiusamik aaqqissuussaaneq ingerlapparput, tassa imaatigut umiarsuarmik ilaasunik angallassineq aappaalu timmisartumik qulimiguulimmilluunniit angallassineq. Sarfaq Ittuk unitsinneqassappat, inuit periarfissatuarilissavaat timmisartumik qulimiguulimmilluunniit ilaalluni isorartuumut angalasinnaaneq, Taitsianguaq Olsen akivoq. 

- Taava naluara Air Greenland siunissami piffissami angallaffiunerpaajusumi ilaasussanik amerlanerusunik angallassilernissaminut periarfissaqassanersoq. 

Sarfaq Ittuk pisoqalilluni atorneeruppat, taava qanoq eqqaamaneqassasoq neriuutigaajuk? 

- Isumaqarpunga umiarsuarmi tassani ilaasunik kiffartuussineq inuit ilaasa amigaatigalugulu maqaasilissagaat. Inuimmi umiarsuarmi naapittarput aamma akuttunngitsumik ilisarisimasanik naapitsisoqartarpoq. 

Ataatsimut siniffippassualimmiinneq naleqqukkunnaarpoq 

Narsamut apuutinnginnermi Qaqortoq tikinneqaqqaartarpoq. Tassavorlu umiarsuup kujasinnerpaaffimmiiffigisartagaa. Nalunaaquttap akunnerini pingasuni umiarsuaq maani taleqqasarpoq, aallalerneranilu umiarsualivimmi biilinut unittarfik ulikkaariartuaarpoq inuppassuaqarlunilu, qanigisaminnik inuulluaqqusiartortunik. 

Meeqqat eqimattanngorlutik ualinerani seqernup ataani pinnguarput asfaltimilu tasinngortami pisseqattaarlutik. Meeqqat ilaat tungujortumik kavaajalik ataataminit unitsinneqarpoq, meeqqap arnaq utoqqasaaq umiarsuarmut ikilersoq malinniarsarilermagu. 

Umiarsuup iluani Anders Hjelm saqisut peqatigalugit umiarsuarmut ilaasussanut nutaanut siniffissanik piareersaavoq. 

Taanna Sarfaq Ittummi sulilernikuuvoq 2013-mi, taamaammallu suleqatini assigalugit umiarsuatoqannguaq kissalaamik misigissuseqarfigivaa. Taassuma takusinnaasarpaa umiarsuaq sineriassuarmi illoqarfinni nunaqarfinnilu takkukkaangat, innuttaasunut taanna qanoq isumaqarnersoq. 

- Qularutissaanngilluinnarpoq, Sarfaq Ittuk innuttaasunut isumalerujussuummat. Kitaata sineriaani imaatigut angallannermi uummataavugut, taanna oqarpoq. 

Sarfaq Ittummut tunngatillugu misigissutsit unganermillu misigineq immikkuullarissuugaluartut, taamaattoq umiarsuarmik nutaamik pisariaqartitsisoqarpoq, taanna isumaqarpoq. Ataatsimoorlunimi siniffippassualimmiinneq piffissamut naleqqukkunnaarnikuuvoq – inuit ineeqqani matoqqasumiinnissaminnik qasuersaarfigisinnaasaminnillu kissaateqarput, taamatuttaaq uffarnissamut perusuersarnissamullu periarfissat pitsaanerussasut kissaateqarput, Anders Hjelm tikkuaavoq. 

- Isumannaallisaaneq imaanilu tunniusimalluni sullissisinnaaneq pingaaruteqarput, taamaattorli aamma inuit ilorrisimaarsinnaanissartik kissaatigaat, taanna oqarpoq. 

Qaqortumiit avalannissamut minutsit tallimaannanngortut aquttoq højtalerikkut aallalernermik ilisimatitsilluni suaaruteqarpoq. 

Arnat inuusuttut eqimattanngorlutik umiarsualivimmi nikorfapput eqitaarlutillu imminnut inuulluaqqullutik. Arnat ilaata qulliini uluamminit allarterpai, sukkasuumik ikaartarfimmut saviminermik sanaajusumut ikiartorluni aqqusaarinnitsigani. 

Nalunaaqutaq 18.58 ikaartarfik kivinneqarpoq. Minutsit marluk qaangiummata Sarfaq Ittuk talinngaffimminiit avalappoq.