Ukiut pingasut sinnerlugit qaangiuttut: Isumaqatigiissitsiniarnermut eqqartuussiviup Kalaallit Nunaat taperseraa
Energy Transition Mineralsip Kalaallit Nunaat/Danmarki suliakkiissutigineraniit ukiut pingasut sinnerlugit qaangiuttullu isumaqatigiissitsiniartarfik suliap aalajangiiffiginissaanut ipiginnaatitaanngitsoq aalajangerneqarpoq. Taamaalillutik Naalakkersuisut suliap ilaani, aatsitassarsioqatigiiffiup 80 milliardit koruuninik taarsiiffigineqarnissaminik piumasaqarnerani, taperserneqarput. Suliaq eqqartuussivinni marlunni ingerlaqqissaaq.
Energy Transition Minerals nunatsinni ingerlatseqatigiiffitsik Greenland Minerals aqqutigalugu Narsap eqqaani Kuannersuarni ujaasinissamut akuersissuteqarpoq. Aatsitassut pillugit inatsit 2021-mi allanngortinneqarmalli ingerlatseqatigiiffiup suliniutaata ingerlannissaa ajornarsivoq, tassa inatsit malillugu uranip annertussusaa akuerisaasumiit anginerummat. Ingerlatseqatigiiffik piiaanissamut akuersissummik imaluunniit 80 milliardit koruuninik taarsiivigineqarnissamik pisinnaatitaaffeqarluni isumaqarpoq. Namminersorlutik Oqartussat taama isumaqanngillat. Akerleriinneq maanna Nunatsinni Eqqartuussivimmi aalajangiiffigineqassaaq.
Assi: Trine Juncher Jørgensen
Danmarkimi isumaqatigiissitsiniarnermut eqqartuussivimmi Energy Transition Mineralsip taassumalu immikkoortortaqarfiata Greenland Mineralsip Danmarkimik Kalaallit Nunaannillu suliassiissutaat suliarinissaanut piginaatitaanatik aalajangerpaat.
Isumaqatigiissitsiniarnermut eqqartuussivimmi aalajangiineq Naalakkersuisunut ajugaaneruvoq, taakkumi suliap isumaqatigiissitsiniarnermut eqqartuussivimmi suliarineqassanngitsoq tunngavilersuutiginikuuaat:
SULIAQ NAALISARLUGU
Suliassaq Greenland Minerals A/S-imit ulloq 22. marts 2022 isumaqatigiissitsiniarnermut eqqartuussivimmut suliakkiissutigineqarpoq. Greenland Minerals A/S-ip piumasaa naapertorlugu Kuannersuarni aatsitassanik piiaanissamut akuersissummik tuniussinissamik Naalakkersuisut pisussaaffileqquneqarput.
Suliassaq uranimut inatsisip akuerineqarneranit pinngorpoq, tassani uranimik misissueqqaarnissaq, aatsitassarsiorluni misissuinissaq piiaanissarlu inerteqqutigineqarmat. Ingerlatseqatigiiffiup sumiiffimmi akuersissuteqarfigisaani piiaanissamut akuersissummik tunniussisoqarsinnaanera inatsimmi akornuserneqarpoq, tassami uranimik akoqarnera uranimut inatsimmi killissat minnerpaaffissai qaangerlugit annertussuseqarmat.
Aallerfik: Naalakkersuisut
- Isumaqatigiissitsiniarnermut eqqartuussivik aalajangiivoq Kuannersuarni aatsitassanik piiaanissamut pisinnaatitaaneq pillugu apeqqut isumaqatigiissitsiniarnermut eqqartuussivimmi suliarineqassanngitsoq aammalu danskit naalagaaffit suliami peqataasinnaanngitsoq, Naalakkersuisut tusagassiuutitigut nalunaarummi allapput.
Eqqartuussivimmi taarsiissuteqartoqarnissaa aalajangerneqassagaluarpat isumaqatigiissitsiniarnermut eqqartuussivik qanoq amerlatiginissaanik nalilersuisinnaanermut aalajangiisinnaasoq aalajangiinermi tunngavigineqartoq, Naalakkersuisut nalunaarumminni allapput. Tassa isumaqatigiissitsiniarnermut eqqartuussivimmi suliat taamaattut piginnaatitaaffigineqaramik.
Naalakkersuisut: Oqiliallannartorujussuuvoq
Inuussutissarsiornermut, aatsitassanut, nukissiutinut, inatsisit atuutsinneqarnerannut naligiissitaanermullu naalakkersuisoq Naaja H. Nathanielsen (IA) aalajangiineq oqiliallaatigigaa:
- Naalakkersuisut aalajangiineq naammagisimaartorujussuuaat. Soorunami suliassap tassunga tunngasortaa maannakkut naammassimmat, aammalu ajugaagatta, oqiliallannattorujussuuvoq.
Suliassaq eqqartuussivinni suli suliarineqartussaavoq, tassami Greenland Minerals A/S-imiit Nunaatta Eqqartuussiviani aammalu Københavnimi byret-imi, isumaqatigiissitsiniarnermut suliassamisut piumasaqarluni aamma suliassanngortitsinikuuvoq:
- Suliassat taakkua aallartinnerminni killiffeqarput, taamaattumik aqqut suli sivisusussaavoq. Minnerunngitsumillu ajugaaneq manna pingaaruteqarpoq aammalu aningaasartuutit Namminersorlutik Oqartussat suliassamut aningaasartuutigisimasai maannakkut Greenland Minerals A/S-imit matussuserneqartussanngorput. Naalakkersuisut suli isumaqarput suliassaq tunngaviusumik aalajangigassaasoq, maannakkullu nukissaqaleqqillutik ingerlaqqissallutik, Naaja H. Nathanielsen oqarpoq.
Qinnuteqaat itigartinneqartoq
Energy Transition Mineralsimiit Kuannersuarni aatsitassanik qaqutigoortunik piiaanissamut qinnuteqaat uranimut inatsit 2021-mi akuerineqartoq tunngavigalugu 2023-mi itigartinneqarpoq.
Tamatuma kingorna qinnuteqaataat allanngortitaasoq aamma itigartinneqarpoq. Uranimut inatsimmi annerpaamik 100 ppm-imik uranitalik piaarneqarsinnaammat, Kuannersuarni piaarneqartussatut qinnutigineqartoq 200 aamma 400 ppm uranitaqartussaanera uuttortarneqarmat itigartitsissutaavoq.
Ingerlatseqatigiiffik piiaanissamut akuersissummik pissarsisinnaallutik, taamaanngippat 80 milliardit koruuninik taarsiiffigineqarsinnaallutik isumaqarpoq.
Isumaqatigiissitsiniarnermut eqqartuussivimmi akerleriittoqartillugu akuleruttarpoq. Uani suliami eqqartuussisut pingasuupput. Suliami illuatungeriit tamarmik eqqartuussisooqataasussamik toqqaanikuupput, pingajuallu isumaqatigiissutigalugu toqqarlugu. Eqqartuussisut pingajuat siulittaasuuvoq.
