30-nik ukiulik pineqaatissinneqartoq - saassussineq minutsini arlalinni immiukkaa
Angut 30-nik ukiulik Nuummeersoq toqutseriarsimasutut peqqarniitsumillu nakuusersimasutut tigummigallarneqartussanngortinneqarpoq. Angut alla 31-nik ukiulik ikiuussimasutut qaammatini sisamani pineqaatissinneqarsimasunut inissiisarfimmiittussanngortinneqarpoq.
Assiliisoq: Leiff Josefsen
Nunatta Eqqartuussisuuneqarfiani toqutseriarsimanermut peqqarniitsumillu nakuusernermut tunngatillugu ataasinngornermi aalajangiisoqarpoq.
Angut 30-nik ukiulik toqutseriarsimasutut, peqqarniitsumik nakuusersimasutut allanillu arlalitsigut pisuusutut eqqartuunneqarpoq maannalu piffissaligaanngitsumik tigummigallarneqartussanngorluni.
Angut unnerluutigineqartoq alla 31-nik ukiulik peqqarniitsumik nakuusernermut peqataasimasutut qaammatini sisamani pineqaatissinneqarsimasunut inissiisarfimmiittussanngortinneqarpoq.
Kalaallit Nunaanni Politiit tusagassiuutinut taama nalunaaruteqarput.
Tilluarlugulu isimmittarneqartoq
30-nik ukiulik 2023-mi septembarimili tigummigallarneqarpoq, tassanilu nakuusernermut kingullermut maanna eqqartuunneqartumut unnerluutigineqarluni.
Inuk alla peqatigalugu Nuup ilaani Nuussuarmi Akikip eqqaani angummik inuusunnerusumik saassussisimasutut eqqartuunneqarpoq.
- Saassussineq minutsinik arlalinnik sivisussusilik immiuppaat, tassanilu saassunneqartoq niaquatigut timaatigullu arlaleriarlutik tilluarlugulu isimmittarpaat, Kalaallit Nunaanni Politiit allapput.
Angut 30-nik ukiulik pisoq qaammatip pingasut affarlu sioqqullugu toqutseriarsimasutut aamma eqqartuunneqarpoq.
Tullartakkat niuluanik toqutseriaraluarneq
Pinerluffigineqartoq angutip 30-nik ukiullip inaanut isersimavoq, angutillu 30-nik ukiullip pinerluffigineqartoq tullartakkanut niulumik 3,5 kiilumik oqimaatsigisumik sakkoqarluni niaquatigut arlaleriarluni anaalersimavaa niaquata saarnga innarlerlugu. Angutip anaalerneqarluni ikilerneqarnini pissutigalugit Danmarkimukaanneqartariaqarsimavoq.
Nunatta Eqqartuussisuuneqarfiata angut 30-nik ukiulik tigummigallarneqarnissaanik eqqartuussutini peqqarniitsumik nakuusertoqarnera toqutseriaraluartoqarneralu tunngavilersuutigigaa politiit paasissutissiipput.
- Aamma nakuusernerup minutsini arlalinni sivisussusilimmik filmiliarisimanera, eqqarsartaatsikkullu nalilersorneqarnera toqusullu timaannik misissuisartut siunnersuisoqatigiivisa tigummigallarneqassasoq inassuteqarnerat aalajangeeqataapput, Kalaallit Nunaanni Politiit suliaq pillugu allapput.
