39-nik ukiulik Akikimi toqutseriarsimasutut pinngitsuutinneqartoq
Angutip 39-nik ukiulllip Akikimi Nuussuarmiittumi paarsisoq savilersorfigaa. Angut toqutseriarsimasutut Eqqartuussisoqarfik Sermersuumi marlunngornermi pinngitsuutinneqarpoq. Nakuusersimasutut pisuutinneqarpoq, ullorlu taanna iperagaalluni.
Angut 39-nik ukiulik Nuussuarmi paarsisumik saassussisimasutut Eqqartuussisoqarfik Sermersuumi marlunngornermi eqqartuunneqarnera aalajangiiffigineqarpoq.
Assi: Morten Okkels
Akikimi Nuussuarmi 2025-mi februaarip tallimaani toqutseriartoqarpa?
Apeqquteqarpoq pingaarutilik Eqqartuussisoqarfik Sermersuumi marlunngornermi ualikkut suliarineqarpoq.
Angut 39-nik ukiulik februaarimiilli tigummigallarneqarluni Nuummi pineqaatissinneqarsimasunut inissiisarfimmiippoq. Taanna pisiniarfimmi angummut paarsisumut savimmik saassussisimasutut unnerluutigineqarpoq. Unnerluussisut isumaqarput toqutseriaraluarnerusoq.
Angut 39-nik ukiulik pinngitsuunerariarluni allamik oqaaseqaqqikkusunngilaq. Aamma taamaaliortariaqanngilaq. Eqqartuunneqartut oqaaseqassanerlutik qanorlu akissanerlutik namminneq aalajangertarpaat.
Angutilli unnerluutigineqartup politiit siusinnerusukkut oqaloqatiginikuuai. Tassanilu oqanikuuvoq paarsisoq nuannarinnginnamiuk ersiortikkusussimallugu.
Sakkutut atorneqartoq eqqartuussivimmiippoq, taanna unnerluussisussaatitaasup Aprilia Jespersenip plastikkimut poorlugu nassarpaa. Savik qaqortulianut saviuvoq 35-40 centimeterisut takissuseqarluni.
Immiaaqqat pillugit isumaqatigiinnginnermik aallartittoq
Paarsisoq saassunneqarnikoq ilisimannittutut siullersaalluni apersorneqarpoq.
- Immiaararsiniaraluarluni itigartitaanera siullertut pivoq, paarsisoq oqaluttuarpoq.
Angut 39-nik ukiulik immiaararsinissaminik itigartitaagami taakku tilleriaraluarai paarsisoq oqarpoq. Angut immiaaqqanik qillertuusanik kaasarfimmioqartoq paarsisup unitsippaa oqarfigalugulu qaammatini arfinilinni pisiniarfimmut iseqqusaajunnaartoq. 39-nik ukiullip akuererpaseriarlugu sumiiffik qimappaa.
Kingornali pisoq ajornerulerpoq. 39-nik ukiulik savilerluni Akikimukaqqippoq. Kamassimaqaaq savimmillu kapiseriaqattaarsimasoq paarsisup oqaluttuaraa:
- Arlaleriarluni timikkut, tuikkut, niaqqukkut kaperiaqattaarpaanga. Amerlasooriarluni taamaaliorpoq.
Paarsisup kaperiaqattaarneqanerminik eqqortinnaveersaarpoq, saassussisorlu tunuarterluni. Paarsisoq tuimigut kapineqarpoq. Taassuma kimillannerata annertunngitsup assilineqarnera eqqartuussivimmi takutinneqarpoq. Savillu qununarpallaarsimanngitsoq paarsisoq oqarpoq. Saviup isua noorittuunngilaq.
Angut 39-nik ukiulik siusinnerusukkut arlaleriarluni pinerluuteqartarsimasoq eqqartuussinermi paasinarsivoq, nakorsallu angut niaqulaartuunersoq paasiniarlugu misissorsimavaat. Taamaanngitsoq nalilerneqarpoq. Taamaammat pineqaatisseeriaatsit nalinginnaasut atorneqarput.
Iperagaasoq
Unnerluussisussaatitaasup Aprilia Jespersenip ukiuni sisamani pineqaatissinneqarsimasunut inissiisarfimmiittussanngortinneqarnissaa anguniarlugu tunngavilersuivoq. Toqutseriarsimasut ukiuni sisimani pineqaatissinneqartarnerat nalinginnaasuuvoq.
Illersuisup Marie Louise Frederiksenip sullitami Akikimi paarsisumut savilerluni saassussisimanera nassuerutigaa. Toqutseriarnerunngitsorli taanna oqarpoq:
- Sullitama pineqartoq ersitinniarsimavaa, naqissusiivoq.
Unnerluutigineqartoq persuttaaniarsimavoq kapooralunili toqutsiniarsimanani, illersuisoq oqarpoq. Aamma paarsisup inuunera ulorianartorsiortinneqarsimanngitsoq naqissuserpaa.
Eqqartuussut nalunaaqutaq ualikkut pingasunut saqqummiunneqarpoq. Eqqartuussisut illersuisup oqaasii tunngaviusumik isumaqatigivaat:
- Unnerluutigineqartoq toqutsinissamik siunertaqarsimanngitsoq eqqartuussivimmi isumaqarpugut, eqqartuussisoq oqarpoq.
Angut 39-nik ukiulik nakuusersimasutut qaammatini arfineq-pingasuni parnaarussassanngortinneqarpoq. Angutip 39-nik ukiullip eqqartuussut akueraa. Unnerluussisussaatitaasup suliareqqitassanngortitsissanerluni aalajangernissamut piffissaliussaq atoqqaarniarpaa, unnerluussisussaatitaasulli angutip tigummigallarneqaannarnissaa piumasarinngilaa.
Taamaammat 39-nik ukiulik qaammatini qulingiluani pineqaatissinneqarsimasunut inissiisarfimmi tigummigallarneqareerluni iperangaavoq, tassalu eqqartuussut sinnerlugu naammassereerlugu.
Illersuisup Marie Louise Frederiksenip sullitani sinnerlugu taarsiissteqartoqarnissaa piumasarissallugu oqarpoq, taannami eqqartuussut naapertorlugu sivisuallaamik pineqaatissinneqarsimasunut inissiisarfianniissimavoq.
