Nunami allami innuttaassusillit pinerlunnernut ilungersunartunut Kalaallit Nunaanni eqqartuussinerit qaqutigoortuupput. Eqqartuussivimmilu nunamiit anisitsisoqarnissamik aalajangernerit aamma taamaapput.
Angulli 34-nik ukiulik, Spaniami inunngortoq Venezuelamilu innuttaassuseqartoq, Nuummi Eqqartuussisoqarfik Sermersuumi ataasinngornermi marlunngornermilu eqqartuunneqarpoq.
Nunami allami innuttaassusillit pinerlunnernut ilungersunartunut Kalaallit Nunaanni eqqartuussinerit qaqutigoortuupput. Eqqartuussivimmilu nunamiit anisitsisoqarnissamik aalajangernerit aamma taamaapput.
Angulli 34-nik ukiulik, Spaniami inunngortoq Venezuelamilu innuttaassuseqartoq, Nuummi Eqqartuussisoqarfik Sermersuumi ataasinngornermi marlunngornermilu eqqartuunneqarpoq.
Angut 2025-mi apriilip 28-ani arnat marluk, taamanikkut 17-inik aamma 18-inik ukiullit, ilagalugit Nuummi HHE Expressimi akunnittarfimmeeqatigai. Suliartorluni illoqarfimmut tikeqqammivoq. Inuusuttut arnat marluk kingorna naapippai inigisaminullu immiaarartoriartoqqullugit.
Inimili susoqarsimanera pillugu isumaqatigiinngitsoqarpoq. Angut 17-inik ukiulimmut pinngitsaaliisimasoq 18-inillu ukiulimmut kannguttaatsuliorsimasoq, unnerluussisussaatitaasoq Aprilia Jespersen isumaqarpoq. Angulli pisuni marlunni pisuunnginnerarpoq, tamannalu eqqartuussivimmi aalajangiiffigineqassalluni.
Nassuiaatit akerleriittut
Niviarsiaqqap aappaa matoqqasumik nassuiaatinneqarpoq. Taamaammat taassuma nassuiaanera Sermitsiamit tusanngilarput.
Taakku marluullutik akunnittarfimmukaramik isumaqarsimapput allanik inoqarumaartoq, niviarsiaqqap aappaa oqaluttuarpoq. Taamaattoqanngilaq, nuanniitsumillu pisoqarluni, oqarpoq. Angutip 17-inik ukiulik piumanngikkaluartoq kujappaa, 18-inillu ukiulik piumasarinngisaanik attuuallugu. 18-inik ukiullip nassuiaanera aallaavigalugu taama pisoqarpoq.
Angutip unnerluutigineqartup nassuiaanera allaaneruvoq. Niviarsiaqqat soqutiginnipput, aappaalu nammineerluni tiinganiarmat pinngitsaalinagu atoqatigaa, nassuiaavoq.
Unnerluutigineqartup Spaniamiup oqaatsit pingasut akornanni nutserisoqarnissaa pisariaqartippaa, taamaammallu nutserisinnaasumik allamik Danmarkimiit tikisitsisoqarnikuuvoq. Paatsooqatigiittoqarsinnaanera ilimanaateqarpasikkaluartoq ajornartorsiutitaqanngitsumik ingerlanneqartoq eqqartuussinermiit tusagassiortup takusinnaavaa.
Unnerluutigineqartuni marlunni pisuutinneqartoq
Eqqartuussinerup ataasinngornermi naammassineqarnissaanut pilersaarutaaqqaaraluartoq eqquutinngitsoorpoq, eqqartuussullu suli aalajangerneqanngitsoq illersuisup Jannik Isidorip sullitami iperaagissaa piumasarigaluarpaa.
Sullitani nunami oqaatsit pingaarnertut atorneqartut paasisinnaanagit ukiup affaani tigummigallarneqarnikuunera illersuisup ilaatigut tunngavilersuutigaa. Iluatsinngitsumik. Angutip eqqartuussut suli aalajangerneqanngitsoq nunamiit qimaanissamik periarfissinneqarnissaa eqqartuussivimmi pinaveersaatsikkusunneqarpoq.
Eqqartuussinerli timmisartuussinissap taamaatinneqarnerata kingunerisaanik naammassineqarsinnaalerpoq. Unnerluunneqartorlu eqqarsaatigalugu eqqartuussinerup matoqqasunngortinnissaa illersuisup piumasaraa. Iluatsinngilaq.
Eqqartuussineq akuerigaa
Ilisimannittut oqaluttuarnerisa assigiinnginnerat unnerluutigineqartup pinngitsuuneranik uppernarsaataasoq illersuisoq Jannik Isidor isumaqarpoq. Inuit pingasut akunnittarfimmi inimukarnerannik immiussaq Venezuelamiup pisuussuteqannginneranik takussutissaasoq aamma isumaqarpoq. Inuit taakku nuannisaarnerannik takussutissaasoq illersuisoq isumaqarpoq. Unnerluussisussaatitaasulli allatut isigaa.
Eqqartuussisup Sikkerninnguaq Lynge Hardip eqqartuusseqataasullu allat angut pinngitsaaliisimasutut kannguttaatsuliorsimasutullu qaammatini qulingiluani pineqaatissinneqarsimasunut inissiisarfimmiittussanngortippaat. Eqqartuunneqartup piffissap sivisunersaa paarnaarussivimmeereerpoq, taassumalu eqqartuussut akueraa.
Niviarsiaqqap aappaa pinerlunnerup nalaani 18-it inorlugit ukioqarnera eqqartuussutip aalajangerneranut sunniuteqaqataavoq. Unnerluussisussaatitaasulli minnerpaamik ukiumi ataatsimi paarnaarussaanissamik piumasaqarneranit eqqartuussut sakkukinneruvoq. Unnerluussisussaatitaasup suliareqqitassanngortitsissanerluni aalajangernissamut piffissarititaasoq atoqqaarniarpaa.
Venezuelamiu taanna Kalaallit Nunaanniit anisitaasussanngortinneqarpoq ukiunilu tallimani iseqqusaajunnaarluni.
