42-nik ukiulik toqutsisimasutut unnerluutigineqarluni tigummigallarneqartoq
Angut 49-nik ukiulik Kangaamiuni toqungasoq pingasunngormat nassaarineqareersorlu inuit pingasut toqutsisoqarsimaneranut atatillugu killisiorneqarput. Ataaseq unnerluutigineqarluni ulluni 28-ni tigummigallarneqalerpoq killisiorneqartullu allat marluk iperagaallutik.
Assi: Oscar Scott Carl
Angut 49-nik ukiulik Kangaamiuni angerlarsimaffimmi toqungasoq pingasunngormat nassaarineqarpoq, pisorlu toqutsisoqarsimaneratut misissuiffigineqartut politiit nalunaarutiginikuuaat.
Inuit pingasut toqutsisimasutut unnerluutigineqartut tigusarineqarsimasut, politiit pingasunngornermi unnukkut nalunaarput.
Taakku pingasut sisamanngornermi Eqqartuussisoqarfik Qeqqani inatsisit tunngaviusut naapertorlugit killisiorneqarput, ataaserlu ulluni 28-ni tigummigallarneqartussanngorluni.
Angut 42-nik ukiulik tigummigallarneqartuuvoq.
Tigusaasut allat marluk iperagaapput, aappaatali iperagaanissaanut aalajangerneq unnerluussisussaatitaasup isumaqatiginagu naammagittaalliuutigaa.
Politiit suli Kangaamiuniipput, misissuinerlu suli ingerlammat pisoq pillugu oqaaseqaqqissinnaanatik paasissutissiissutigaat.
