Ilinniarneq
Sermitsiamit Aarhusimut
Masauna Peary Ilisimatusarfimmi tusagassiortutut ilisimatusarpoq. Sermitsiami sulilluni misileereerluni maanna Danmarkimi Aarhusimi tusagassiornermik ilinniarfissuarmi semesteri ataaseq ilisimatusarpoq. – Sakkortuvoq, maannali ingerlalluarnerulerlungalu ilikkagaqarluarpunga, taanna oqarpoq.
Aarhusimi Danmarks Medie- og Journalisthøjskolemi „Videojournalism and Foreign reporting“-imik, tassa aalasuliat atorlugit nunaniillu allaniit tusagassiinermik, pikkorissartitsisoqartarpoq, Ilisimatusarfimmilu tusagassiortutut ilisimatusartut arlallit, kingullermik Masauna Pearyp, ilinniarnerminnut atatillugu tamanna naammassisimavaat.
Assi: Nammineq pigisaq
Masauna Peary 33-nik ukiulik Qaanaarmiu Ilisimatusarfimmi tusagassiortutut 2024-mi ilisimatusalerpoq.
Ilisimatusarnermini Sermitsiap aaqqissuisoqarfia, kingullertigullu Aarhusimi Danmarks Medie- og Journalisthøjskole (DMJX) misiliiffigai, tassani "Video journalism and Foreign reporting", tassa assa aalasuliat atorlugit nunaniillu allaniit tusagassiineq, nunanit tamalaanit ilisimatusartut peqatigalugit tuluttut ingerlanneqartoq ilisimatusarfigaa.
– Spaniamiit, Tuluit Nunaannit, Irlandimiit, Tysklandimiit, Australiamiit Indonesiamiillu ilinniartoqarlunilu uanga Kalaallit Nunaanneerpunga, taamaammat nunanit tamalaaneersorpassuuvugut. Katillugit 22-uvugut, taamaammallu sungiusimasannit amerlanerujussuupput. Nuummi ilisimatusaqatigiit arfineq-marluinnaavugut, Masauna Peary oqarpoq, taassumalu ilisimatusartut amerlanerunerat isumassarsisitsisarmat nuannaarutigaa.
Masauna Peary Nuummi tusagassiortutut ilisimatusarnerminut atatillugu Aarhusimi Danmarks Medie- og Journalisthøjskolemi semesteri ataaseq ilisimatusarpoq.
Assi: Kim Haugaard/Scanpix
Ilinniartitsineq nutaaq
Ilisimatusartut aggustimi aallartikkamik decembarip tungaanut ilisimatusassapput. Tassani aalasuliat atorlugit tusagassiinermik, allaaserinnittarnermik inuillu pillugit oqaluttuanik qanoq oqaluttuartoqarsinnaaneranik ilinniartinneqassapput.
Ilisimatusartut nutaarsiassaqartitsiviit nunarsuarmi qanoq inissisimanersut paasisaqarfigalugillu nunanut allanut tunngasunik tusagassiorneq, paasissutissanik misissuineq, silassorissuusiat allallu pillugit aaqqissuisoqarfippalaartumi sungiusarsinnaapput. Ilinniartinneqarnertik namminneq misissuinertik tunngavigalugu suliaminnik saqqummiinermik naggasissavaat.
Masauna Peary DMJX-imi semesteri ataaseq ilisimatusarnerminut atatillugu ilaatigut DR Byenimi paasisassarsiorpoq.
Aammattaaq ilinniartinneqarnerminni assersuutigalugu DR Byenimut Københavnimiittumut takornariartassapput.
- Tusagassiortut nunani allani periarfissaat takullugit misigisaq uannut nuannerpoq.
semesteri ataaseq Nunani allani ilisimatusarnermi iluaqutissat
- Suliffinni piumaneqarluartuni piginnaanngorsarneqarlutillu piginnaasaqalersinnaavutit.
- Ilinniarfimmi ilinniarsimasatit ilinniaqatinnit allaanerussutigissavatit.
- Nunarsuaq tamakkerlugu attaveqarfigisaqalersinnaavutit.
- Ajornartorsiutinik aaqqiinissamut allatut periaaseqarneq ilinniarumaarpat. Piorsarsimassutsit allat paasinissaat ilikkarlugulu immaqa oqaatsinik allanik ilikkagaqarsinnaavutit.
- Ilinnut nalinginnaasutut isigisat nunami allami tamarmi assigiinngilluinnarsinnaasut paasilissavat. Nunami allami najugaqarneq kulturimillu allamik misigisaqarneq nuannersunik puigunaatsorsiffiusarpoq.
Naalakkersuisut siulittaasuannik apersuineq
Masauna Peary kingusinnerusukkut aamma Naalakkersuisut siulittaasuannik Jens-Frederik Nielsenimik apersuinissamut periarfissarsivoq, tamannalu ilisimatusaqataasa akornanni tupaallaatigineqarpoq.
– “Premier”-imik, tassa siulittaasumik, pissarsisuni kisiartaagama nuanneqaaq. Sermitsiamili suliffimmik misiliininni nalunngereerpara, Masauna Peary oqarpoq, taassumalu tuluttut oqaatsit, filmiliorneq videonillu katiterineq pikkoriffiginerulerpai.
- Aamma oqaluttuat suut qanorlu oqaluttuarineqarsinnaaneri pillugit isumassarsiaqarneruvunga. Taamaalillungalu inaarutaasumik allaaserisassanni atorsinnaavakka.
Aallaqqaammut ilungersungaartoq
Nuummiilli Aarhusimut nuunneq ajornaatsuinnaanngilaq. Masauna Pearymi aallarteqqaarami tuluttut ilinniartitsinerup malinnaaffiginissaa sapernartikkamiuk uniinnangajappoq.
– Aallaqqaammut ilungersungaarpunga, taavali ilinniarnermut siunnersorti oqaloqatigigakku ingerlalluarnerulerpunga. Pikkorissartitsinermi Kalaallit Nunaannit amerlanerusut peqataasimagaluarpata pitsaassagaluarpoq, taamaalillutami imminnut tapersersoqatigiissinnaallutalu ilitsoqqussaralugu oqaatsigut atorlugit oqaloqatigiissinnaavugut, Masauna Peary oqarpoq, taannalu aallaqqaammut Kalaallit Illuutaanni najugaqariarluni ullut 14-it qaangiummata Vilhelm Kiers Kollegiamut, atuarfimmit sikkilerluni orninneqarsinnaasumut, nuuppoq.
- Naak ilungersunarsimagaluartoq ilisimatusartoqatitsinnut inassutigisinnaavara. Ilisimatusartutut inuttullu ineriartorfiungaarpoq.
Allaaserisaq aviisimiit ilinniarneq pillugu sammisameersuuvoq, akeqanngitsumik una toorlugu atuarneqarsinnaavoq.
