Unnummut katersuiniarnissarsuarmi saqqummiisussat: - Assorujuk qilanaarnarpoq

Pappiliarpassuit nalinginnaasumik angissusillit anginerillu qalipaatigeqisut unngullugit issiapput unnummut katersuiniarnissarsuarmi aallakaatitsisussat.

Pappilissani taakkunani unnummut nalunaaquttap akunnerini pingasuni aallakaatitsinissami pilersaarutit minutsimiit minutsimut allattorneqarsimapput. 

Aallakaatitsinerimmi taamaattut pilersaarusiorneqartarmata suleqataasussat suut tamarmik assigiimmik paasisariaqarpaat. Taamaammat aallakaatitsisussat oqallisissaqarluarput.

- Johannesilu marluulluta akunnattoorfeqarusunngivissoratta, aammami aaqqissuisut, taamaammat massakkut misilittariarlugit ualimut aamma generalprøvessaagut, Kimmernaq Kjeldsen taama oqarpoq nangillunilu. 

- Allarpassuit qaammatini kingullerni piareersarput, uagut sapaatip-akunneri kingulliit piareersaqatigiippugut, Kimmernaq Kjeldsen oqarpoq. 

Kræfti tamatsinnut eqquisoq 

Kimmernaq Kjeldsenip saqqummeeqatissaa tassaavoq Johannes Sigurdsen "Sigu", taanna nipilersortartutut ilisimavarput, siullermeerlunili tv-kkut aallakaatitsinermi saqqummiisussaagami pissangalaarpoq. 

- Soorlu nipilersoqqaalerama nalorninarpoq. Kisianni ilinniartitsisooriarama overblikeqarniarsarivunga, Johannes Sigurdsen "Sigu" oqarpoq. 

Unnummut katersuiniunneqartussat tikilaassagutsigit tassaapput nappaassuarmik kræftimik eqqugaasimasut. Neriuffiit Kattuffiata katersuiniarnerani isertinneqartut kræftimik eqqugaasunut legatinik tunniussinissamut ilaatigut atorneqartarput. 

Nunatsinni kræftimik nappaateqarlutik paasineqartut ukiumut 250-it missaaniittarput. Taamaammat inuppassuit namminneq aqqusaarsimanngikkunikku qanigisamik napparsimalernerat nalaattarpaat. 

Johannes Sigurdsenip nammineerluni kræftimik eqqugaasimasunik qanigisaqarami unnummut katersuiniarnissarsuaq immikkuullarissuutippaa. 

- Uannut isumalerujuuvoq, ilaquttakka arlallit kræfterlutik qimagussornikuupput. Qaninnerpaaq, qatanngutiga kræftimut annaanikuuara, taanna oqarpoq. 

Nipilersortussarpaaluit 

Unnummut katersuiniarnissarsuaq siulianut sanilliullugu allaanerusumik aaqqissuunneqarpoq, Katuammi paarlersuaniinnani inersuaaniit aallakaatinneqassaaq.

Tamatuma saniatigut callcentereqassaaq. 200 koruunit sinnerlugit tapeerusuttut 36 37 38-mut sianersinnaapput, sianertunik oqaluussisussat ilaatigut tassaassallutik innuttaasunit ilisimaneqartut.

Nipilersortussallu arlaqarput. Qeqquaq, Nahome, Johannes aamma Pipaluk aamma Uummatip Nipaa ilaatigut appikkumaaramikk , taamaammat katersuiniarnissarsuarmut peqataalluartoqarnissaa saqqummiisussat neriuutigaat. 

- Unnuk oqitsumik, nuannersumik kissalaartumik ingerlakkumaarparput. Immaqa soorlu qangatut Aliikkusiarfittutulluunniit Katuap inersuaaninngaanniit aallakaatitsissaagut. Assorujuk qilanaarnarpoq, Kimmernaq Kjeldsen oqarpoq. 

- Unnugumut neriuutigivara suut tamarmik pissusissamisut perrattumik ingerlajumaarput. Eqqissilluta, kisianni aamma nuannisarnissarput aliasunnissarpullu tamarmik inissaqassasut, Johannes Sigurdsen "Sigu" oqarpoq. 

Nappaassuarmik kræftimik eqqugaasut siorna katersuiniunneqarmata katillugit 5 mio. koruunit sinnilaarlugit katersorneqarput, ukioq mannalu qanoq amerlatigisut katersorneqarnersut unnugumut paasinarsiumaarpoq.