Aaja: Ikiaroorsimatillutik biilertunut sakkussamik pitsaasumik politiit tunisigit
Ikiaroorsimatillutik biilertunut Kalaallit Nunaanni politiit akiuunnerminni sakkussaqarluartariaqarput, IA sinnerlugu Folketingimut ilaasortaq Aaja Chemnitz isumaqarpoq.
Kalaallit Nunaanni Politiit ikiaroornartumut uuttuuteqanngillat, tamannalu allanngortittariaqartoq IA-meersoq Aaja Chemnitz isumaqarpoq
Toqqorsivimmit assilisaq: Leiff Josefsen
Ullumikkut Kalaallit Nunaanni Politiit Danmarkimi politiit assiginagit biilertup ikiaroorneranik ersersitsisinnaasumik atortorissaaruteqanngillat.
- Nunani allani ikiaroorlutik biilertut imigassartorsimatillutik biilertunit amerlanerusut misissuinerit takutippaat. Taamaattumik Folketingimi IA-mit ilaasortaatitaqarnitsinni politiit ikiaroornartunik uuttuutinik tunineqarnissaat ukiuni arlalinni sorsuutigisimavarput, inuit assersuutigalugu hashimit sunnigaasimanersut misissorneqarsinnaaniassammata, Aaja Chemnitz Sermitsiamut oqarpoq.
Ikiaroornartumik uuttuisartut atulernissaat eqqarsaatigalugu pissarsiariniarneqarnerat sumut killinnersoq, folketingimut ilaasortap angallannermut ministeri Thomas Danielsen aperisimavaa.
Aqqusinermi toqqissisimaneq
- Innuttaasutut toqqissisimalluta sunnigaasimallutik biilertut ernumaginagit aqqusinerni angalasinnaasariaqarpugut. Ikiaroornartut nunatsinnut eqqunneqartartut amerliartuinnartillugit, isumaqarpunga ikiaroornartunik uuttuisartut pisariaqartinneqarneruleriartuinnartut, Aaja Chemnitz oqarpoq.
Siorna imigassartorsimatilluni biilerneq pillugu suliat 229-usut, politiit 2023-mut ukiumoortumik nalunaarusiaanni allassimavoq.
