Aaja niuertarfinnut kaammattuivoq aalakoornartunik piseqqusaarutit unitsinneqassasut

Naalakkersuisut piffissami matumani siunissami imigassaq pillugu politikkissaq ilusilersuleruttorpaat, tamanna ilutigalugu folketingimi ilaasortaq Aaja Chemnitz (IA) inatsisit atuutsinneqarnerannut ministerimut paasissutissanik pissarsiorpoq, taanna Kalaallit Nunaanni Politiit sulisitsisuisa qullersaraat.

AAMMA ATUARUK

Nunatsinni imigassartorsimatilluni pinerluttarneq: Aajap Justitsministeri piumasaqarfigaa

Chemnitz ippassaq ataasinngornermi imigassamik atuinerup aamma inoqatinik navianartorsiortitsilluni pinerluttarnerup imminnut attuumassuteqarnerat pillugu justitsministerimit apeqqutini sisamaasut pillugit akissutisivoq.

Aaja niuernermik ingerlatsisunut: Akisussaaqataagitsi!

- Suleqatigiissinnaanissarput pisariaqarpoq aamma oqaloqatigiinnerit oqallinnerillu inuiaqatigiinni tamakkiisumik ingerlanneqartariaqarput, taamaaliornikkut aaqqiissutaasinnaasutut siunnersuutinik nassaarniartariaqarpugut nunatsinni politikerit imigassaq pillugu politikerit politikkissamik ilusilersuinerminni atorsinnaasaannik.

- iliuuseqarnissamut siunnersuutigisinnaasatut maannangaaq oqaatigisinnaasatit suuppat?

- Periarfissat assigiinngitsut arlaqarput, taakkunannga ilaavoq killilersuilersinnaaneq, assersuutigiinnarlugu pisiniarfiit aalakoornartunik tuniniaavittaasa qanoq saqqumitigissanersut nalilersorneqarsinnaavoq, ilaatigullu oqartussaasut aalakoornartunik tuniniaasarnermut aqutsinissaat akisussaasuunissaallu systembolag isumassarsiorfigalugu ilusiliisoqarsinnaavoq. Maannangaarli immikkut periarfissatut taarusutara tassaavoq ulluinnarni niuerniartarfiit namminneerlutik akisussaaqataassuseqarlutik aalakoornartunik piseqqusaarutinik siammarterisarnerminnik unitsitsinissaat, folketingimi ilaasortaq Aaja Chemnitz (IA) oqarpoq.

Justitsministeri Peter Hummelgaard (soc. dem.) akissuteqarnermini salliullugu erseqqissaavoq, Naalagaaffiup Politiivisa paasissutissaataat tamakkiisumik takutitsisinnaanngitsut aalakoornartumik atuineq aamma inoqatinik navianartorsiortitsilluni pinerluttoqartarnera imminnut attuumassuteqartut. Taamaakkaluartoq aamma erseqqissaateqarpoq Kalaallit Nunaanni Politiit sulinerminni misilittagarisaat attuumassuteqarnerannik ersersitsisinnaalluartut.

Pinerluuteqartut pinerluffigitittullu amerlasuutigut aalakoornartutorsimasuusarput

Kalaallit Nunaanni Politiit ilisimatitsipput, politiit immikkoortortaqarfiat naapertorlugu, Kalaallit Nunaanni inoqatinik navianartorsiortitsilluni pinerluttuliornerit amerlanerpaartaat pisartut imigassamik sunnerneqarsimalluni - amerlanertigut pinerluuteqartoq aalakoornartutorsimasarpoq imaluunniit aamma pinerluuteqartoq pinerluffigitittorlu tamarmik aalakoornartutorsimasarlutik, Justitsministeri akissuteqaammini erseqqissaavoq.

- Naliliinermut naqissusiinermi Kalaallit Nunaanni Politiit nalunaarutigaat, 2023-mi Kalaallit Nunaanni Politiinut 1.245-nik persuttaanermut tunngasunik nalunaarutiginnittoqarsimasoq. Taakkunannga persuttaanermut tunngasunit misiliilluni paasissutissanik tigusinerni, pineqartullu 15-it sinnerlugit ukioqartut misissuiffiginerini, pinerlunnerit 20-nit suliassat aqqanillit aalakoornartumik imigassartorsimalluni piliaasarput.

- Tamatuma saniatigut aamma 2023-mi nalunaarutigineqarsimapput 247-it pinngitsaaliilluni kinguaassiutitigut atornerluinermut tunngassuteqartut. Misiliilluni misissuinerup takutippaa pinngitsaaliisoqarsimanermik nalunaarutiginninnerit 16-nit akornanni aqqanillit aalakoornartumik imigassartortoqarsimaneranut attuumassuteqartut.

Imigassamik killilersuinerit politiit orniguttarnerannik ikilisitsisarput

Kisitsit nutaanerpaat matumani saqqummiunneqartut saniatigut, ministeri aamma innersuussivoq oqaluttuarisaanermut kingumut qivialaarnermi takuneqarsinnaasoq, aalakoornartumik imigassamik killilersuisoqarsimagaangat, ammaannartumilluunniit aalakoornartut imigassat tuniniarneqarsimagaangata, inoqatinik navianartorsiortitsilluni pinerluuteqartarnerit, meeqqanut inuusuttunullu kinguaassiutitigut kanngutsaatsuliortarnerit aammalu kinguaassiutitigut pinngitsaaliinerit assigiinngitsorujussuusartut.

Kalaallit Nunaanni politiit tassunga atatillugu assersuutigaat meeqqanut inuusuttunullu kinguaassiutitigut atornerluisarnerit Tasiilami 2014-imiit 2018-imut sakkortuumik akiorniarlugit suliniuteqarnermi, qitiusumiit imigassat aalakoornartut sakkortuut killilersulerneqarnissaannik aalajangertariaqarsimanerat. Killilersuinerullu malitsigisaanik pinerluuteqartarnerit matumani assersuutigineqartut ikileriarsimapput.

Taamatuttaaq Covid-19-ip nalaani aamma imigassamik tuniniaanermut killilersuinerit atuutilersinneqarput. Tamatuma aamma takutippaa inoqatinik navianartorsiortitsilluni pinerluuteqartarnerit politiinut nalunaarutigineqartartut ikilisimasut.

Taakku saniatigut aamma erseqqissaatigineqarpoq akissarsiffinni aammalu akileraarutaavallaarsimasunik utertoorfinni takussutissaqartoq inoqatinik navianartorsiortitsilluni pinerluuteqartarnerit aammalu kinguaassiutitigut innarliilluni pinerluuteqartarnerit politiinut nalunaarutigineqartartut amerlanerusartut.

Justitsministerip akissuteqarnermini aamma oqaatigaa, Kalaallit Nunaanni Politiit ulluinnarni suliarisartagaasa amerlasuut saniatigut, aamma annertuumik pinaveersaartitsinermik suliaqartartut, ilaatigut Imigassaq Ikiaroornartorlugu pillugit siunnersuisoqatigiit, PiSiu, illoqarfinni siunnersuisoqatigiinni aamma nunat immikkoortuini siunnersuisoqatigiit aqqutigalugit.