Aalakoorlutik biilertut sisamat Nuummi politiinit unitsinneqarput
Nunatsinni illoqarfiit pingaarnersaanni Nuummi, Kalaallit Nunaanni Politiit unnuap ingerlanerani ulapipput. Aalakoornartumik imersimallutik biilertut sisamat, imminnut inoqatiminnullu ulorianartorsiortitsisut unitsinneqarput. Biilinit sisamaasunit taakkunannga biilit pingasut ajutoorput.
Kalaallit Nunaanni Politiit Nuummi unnuup unnuallu ingerlanerani ulapissimapput, pingaartumik imigassamik aalakoornartumik imersimasut biilertut unitsinniarnissaat ulapputigineqarsimalluni, nunalli sinnerani ataatsimut isigalugu eqqissisimanarnerusimavoq.
Assiliisoq: Leiff Josefsen
Kalaallit Nunaanni Politiit nakkutilliisuutitaasa pisortaat, Malik Olesen, oqaluttuarpoq Nuummi unnuk unnuarlu ulapaarfiusimaqisoq:
- Unnuap ingerlanerani suliassanut assigiinngitsunut aggersagaavugut, ataatsimut oqaatigalugu tamarmik imigassamik aalakoornartumik atuinerunermut attuumassuteqarput. Imigassartorsimallutik biilersimasut sisamat unitsinniarpagut, taakku imminnut, ilaasuminnut allanullu aqqusinermi angalasunut navianartorsiortitsipput, Malik Olesen oqaluttuarpoq nangillunilu:
- Aalakoornartumik imigassartorsimallutik biilertut sisamaasut akornanni pingasut annerusumik minnerusumilluunniit ajutoorput, qujanartumilli aquttui, ilaasui allallu aqqusinikkut angallattut annertunerusumik ajoqusertoqanngillat.
Nuummi inuk toqungasoq nassaarineqartoq suli misissuiffigineqarpoq
Politiit nakkutilliisuutitaasa pisortaat piffissap imaalinerani Nuummi blok 5-imi angutip 20-nik ukiullip+ toqungasup nassaarineqarneranut tunngatillugu sukumiinerusumik oqaaseqarsinnaanngikkallarnerarpoq:
- Soorlu ilisimatitsissutigereeripput Danmarkimiit nakorsaq toqusimasunik misissuisartoq aammalu pinerluttoqarsimanerani politiit immikkut misissuisartui misissuinermi ikiuinissaat siunertaralugu aggersarneqarnikuupput, naatsorsuutigaarput sapaatip akunnerata nutaap aallartinnerani apuutissasut, maannalu politiit misissuisartuisa inummik toqungasumik nassaarnerup malitsigisaanik misissuinertik suli ingerlappaat.
Suliamut atatillugu inunnik tigusaqarpisi?
- Piffissami matumani suliaq pillugu oqaaseqarsinnaanngilagut, misissuinerup ingerlanneqaleruttormat, taamaallaat uppernarsarsinnaavara misissuineq suli ingerlanneqartoq, aamma suli Kalaallit Nunaanni Politiinit kaammattuutigaarput innuttaasut saaffiginnissuteqaqqullugit, blok 5-ip eqqaani sapaatip akunnerata ingerlanerani arlaannik pasitsannarsinnaasumik takusaqarsimagunik imaluunniit allamik pingaarutilimmik paasissutissamik politiinut tunniussaqarsinnaagunik.
