Igimarasussussuup nuliani nerisarsimagai oqaluttuarineqarpoq.
Kingullerli, Masaannaaq, qimaasinnaasimavoq.
O qaluttuaq alianartoq maanna Nuummi Eqqumiitsulianik Saqqummersitsivimmi misigineqarsinnaavoq. Angulli samminagu, Masaannaap qanoq isiginnittariaaseqarnera saqqummersinneqarpoq.
Suliaq misigissutsikkut anniaatit anigorniarnerinut anigorniarnissaannullu tunngasuuvoq.
Eqqumiitsuliortoq tassaavoq Laakkuluk Williamson, kalaaleq inuk Iqalunni Nunavumi najugalik.
Nunarsuaq tamakkerlugu eqqumiitsuliornermigut ilisimaneqarpoq. Kalaallit Nunaannili aatsaat maanna saqqummersitsivoq.
Isiginnaartitsinermik eqqumiitsuliortup inuunermini takorloortuakkani ’Nuliaminik Neqilik // The Flesh of Wives’-imik saqqummersitsinermigut piviusunngortippaa.
- Angerlamut uternittut taaneqarsinnaavoq, Laakkuluk Williamson saqqummersitsinermit ullualuit kingorna AG-p internetsikkut attaveqaatitigut naapimmagu oqarpoq.
- Iqalunniit nunagisamut eqqumiitsuliannik nassarnera uannut pingaaruteqartorujussuuvoq. Upperilluinnarparami Inuit ataatsimooraangatta suleqatigiikkaangattalu nukittunerulersartugut, oqarpoq.
Silami 30-nik issittumi tamataqanngitsoq Masaannaaq pillugu suliaq ataatsimoorluni suliniuteqarnikkuttaaq pilersitaavoq.
Siorna ullukinnerup nalaani Laakkuluk Williamson saqqummersitsinermullu aaqqissuisoq Taqralik Partridge ilaquttatik katersorpaat videoliaq saqqummersitsinermi atorneqartoq immiunniarlugu.
Laakkuluk Williamson Masaannaatut inuttaasoq uani takuneqarsinnaavoq. Tamataqanngilaq, takisuunilli aappalaartunik, qaqortumik, aappaluttumik tunguusanillu qalersaqarluni. Tallini arriitsumik niaqqumi qulaanut qaffappai. Mianersoqqussutitut illersuutitullu. Anorip qilerniusat tiguarpai. Aliasuppasippoq. Aammali aalajangersimalluinnarpoq. Alapernaappoq.
- Igimarasussussuaq pillugu oqaluttuaq uannut oqaluttuarineqartuaannarpoq, Laakkuluk Williamson oqarpoq. Ingammik ernermi aqqa inuit tusaraangassuk oqaluttuaq eqqaasarpaat. - Igimaq-mik ateqarpoq. Inuit Nunavummiuugaluaraangamik Kalaallit Nunaanneersuugaluaraangamilluunniit, isitik ammariarlugit oqartarput: Igimarasussussuaq!
Assi: Angu Motzfeldt Nuummi Eqqumiitsulianik saqqummersitsivimmut
- Oqaluttuaq Igimarasussuaq inuunitsinni ilaajuaannarnikuuvoq, Laakkuluk Williamson oqarpoq.
Suliap suliarinerani ilaquttani peqatigalugit taassuma isumaa oqaloqatigiissutigaat.
- Suliap oqaluttuassartaa immikkoortikkusunnikuuara, inuttortarnermut sammitinnagu, arnamulli imminut annaassimasumut sammisillugu. Tatitussusermik annertuumik takutitsisuusoq imminullu mumisissimasoq inooqataaginnarnissi anguniarlugu, Laakkuluk Williamson oqarpoq.
Isummernermigut naqissuserlugu aamma takutinniarpaa. Qalersat atugai neqitta qalipaataattut qalipaateqarput.
Inissinniarneq initusinnaanerlu eqqumiitsuliami taamalilluni ersersinniarneqarputt.
Laakkuluk Williamson
Laakkuluk Williamson saqqummiinikkut eqqumiitsuliortuuvoq, taalliortoq, isiginnaartitsisartoq, oqaluttuartartoq atuakkiortorlu.
Taanna Kalaallit Nunaanneersuuvoq inuk, 1979-imilu Saskatoonimi (Saskatchewan, Canada) inunngorluni. Angutaa Robert Gordon Williamson, Tuluit Nunaanneersoq,taama ittorli inuunermi annerpaartaani Canadap Issittuani najuqartoq, arnaalu Karla Jessen Williamson, Kalaallit Nunaanneersuuvoq 1978-imilu Canadamut nuuttoq.
Taamaattumik meeraanermi piffissap ilarujussua Kalaallit Nunaanniittarpoq, piffiit ilaanni najugaqarfigisamini. Iqalunni Nunavut, Canadami 2005-imiit najugaqarpoq. Taavanilu qitornani pingasut peqatigalugit najugaqarpoq.
13-inik ukioqarluni anaanaminit Mariu Olsenimillu uaajeerneq ilikkarpaa, taannalu takutitseqatiginikuuaa. 19-inik ukioqarluni nammineerluni siullermeersumik sassarpoq, sulilu ingerlarsorpoq: Uaajeerneq eqqumiitsuliornermini ingerlatsineranut qitiuvoq.
Netflixillu isiginnaagassiaani ’North of North’-imi Laakkuluk Williamson peqataavoq, immikkoortuisa aappaat 5. novembarimi saqqummiunneqassaaq.
Taamani immiussinertik eqqaallugu Laakkuluk Williamson illarpoq. Sila taamani 30-nik issimmat.
- Atikkersuisussannik atisaajaasussannillu sulilersitsivunga. Taassumalu inuunera annaappaa - tassami qiunnginnama, Laakkuluk Williamson oqarpoq, illaqqillunilu.
Laakkuluk Williamsonip angerlarsimaffiata silataani Iqaluit illoqarfiata killinganiittumi aalasuliaq immiuppaat. Qitornai tamarmik peqataapput: Angerlarsimapput nereqatigiillutillu.
- Pingaaruteqangaarmat qiaqatigiippugullu. Sammisaq oqimaatsuuvoq, Laakkuluk Williamson oqarpoq.
- Arfivimmik pisaqartoqarnerani Laakkuluk Williamson aasaq manna peqataavoq. Iqalunni ukiuni 100-ni sisamassaanik pisaqartoqarpoq. - Pissutsit qanoq ikkaluartulluunniit qanoq suliarineqarnissaa suli ilisimavarput, taamaaliornerpullu ingerlaannassaaq, Laakkuluk Williamson oqarpoq.
Assi: Angu Motzfeldt Nuummi Eqqumiitsulianik Saqqummersitsivimmut
Taamaakkaluartoq qitornasi tamarmik najuupput - tamanna oqaasertalernerusinnaaviuk?
- Uagut inuit perorsaariaatitsinni tamanna pingaarutilerujussuuvoq. Inuunerup atugassarititai tamakkiisumik takutittarpagut. Susoqarnera, eqqarsaatigut misigissutivullu toqqorterneq ajorpagut, Laakkuluk Williamson oqarpoq.
Igimarasussussuaq pillugu oqaluttuaq taamaappoq, erseqqissaavoq.
- Inuit oqaluttuaatitoqaat amerlasuut annilaarnarlutillu peqqarniitsuupput, tusarnaartoq inuunermi periarfissat amerlasuut qanoq ittuunerinik paasinninniassammat namminerlu qanoq inuuneqarnissaminik aalajangiisinnaaniassammat.
Oqaluttuat tunngaviusut Laakkuluk Williamson oqaluttuartartut akornanni peroriartorpoq.
Arnaa Karla Jessen Williamson kalaallit Nunaanneersoq kalaallisut oqaluttuuvoq, angutaalu Robert Gordon Williamson tuluuvoq, inuunermili ilarujussua Canadap Issittuaniippoq inuktitut oqalulluni.
Issittup immikkoortuisa ilaannut immikkut atassuteqaramik kinguaariinniillu assigiinngitsuneersuullutik. Katisimanertik tamaat inuunertik pillugu imminnut oqaluttuuttarput, Laakkuluk Williamson oqarpoq.
Oqaatsitik, oqaluttuatik misilittakkatillu imminnut assersuuttarsimavaat. Ilaatigut assinguffeqarput. Ilaatigulli oqaluttuaat assigiinngilluinnartarput, oqaluttuarpoq.
- Taamaattumik inuttut kinaaninnut tamanna tunngaviliisuuvoq, Laakkuluk Williamson oqarpoq.
Canadap kujataata kippasissortaani Saskatchewanimi illoqarfimmi Saskatoonimi peroriartorpoq. Kalaallit Nunaannit issittumillu ungasissumi najugaqaraluarlutik arnaata kalaallisut ilinniartippaa. Laakkuluk Williamsonillu qitornaasa pingasuusut oqaatsit atugaraat.
Oqaatsivit ilitsoqqussarisavit kingornussassanngorlugit ingerlateqqinnissaat sooq ilinnut pingaaruteqarpa?
- Pissutigalugu qanoq pisoqarsimagaluarpalluunniit, inuit suli tamaaniipput. Kinaassuseq, kultoori oqaatsillu tammartinniarneqarnikuugaluartut, kinaanerput aaliangiusimaffigiuarparput.
Nuliaminik Neqilik // The Flesh of Wives
‘Nuliaminik Neqilik // The Flesh of Wives’ tassaavoq Laakkuluk Williamsonip nammineerluni saqqummersitaa siulleq, Kalaallit Nunaannilu saqqummersitseqqaarnera.
Saqqummersitsineq piffinni assigiinngitsuni pingasuni saqqummersinneqarpoq: Londonimi Mimosa Housemi, apriilip 24-aniik juuni 27-at 2026 ilanngullugu, Nuummi Eqqumiitsulianik Saqqummersitsivimmi oktobarip 23-ani 2026-miik januaarip 31-ani 2027 tungaanut, kingornalu Ottawa, canadamut ingerlaqqissaaq.
Saqqummersitsinerup qitiusumik sammisaa tassaavoq ikkussuilluni saqqummmersitaq 'Nuliaminik Neqilik // The Flesh of Wives', taanna Igimarasussussuarmik oqaluttuaq tunngavigalugu pilersinneqarsimavoq.
Saqqummersitsinermi ilaatigut aamma VR-imik videoliaq ’Tartupaluk’, ukioq manna Nuuk International Film Festivalimi saqqummiunneqaqqaartoq, kiisalu suliaq ’Nannuppugut’, 2021-mi Canadami eqqumiitsulianut nersornaat pingaarutilik Sobey Award pillugu nersornaaserneqartoq, misigineqarsinnaapput.
Taamaattumik saqqummersitsineq sammisanut, ilaqutariinnut, piffissamut, assassukkamut, nammineerluni nerisariaaseqarnissamik aaliangiinermut pinngortitamullu atassuteqarnermut tunngasuuvoq.
Oqaatsit kisiisa anaanaminit ilikkarsimanngilai. Uaajeerneq ingerlateqqippaa. Maariu olsen peqatigalugu Laakkuluk Williamson ilinniartippaa.
- Maariu anaanagalu marluullutik kalaaliupput, sumiiffigisinnaasarpassuarnit Saskatoonimi najugaqartut. Taamaattumik piffissaq annertooq ataatsimoorlutik atortarpaat, Laakkuluk Williamsoni oqarpoq.
Laakkuluk Williamsoni arlaannik aallussinnaasaminik amigaateqartoq marluullutik malugisinnaavaat.
Laakkuluk Williamson ilinniartitsisuni peqatigalugit saqqummertaleqqaarami 13-inik ukioqarpoq. Uaajeernerlu 19-inik ukioqarluni ilikkarpaa.
Tamatuma kingorna nammineerluni saqqummertalerpoq. Sulilu massakkumut taama iliorluni. Tamannalu eqqumiitsuliortuunerani qitiuvoq.
Kiinarsorneq Siullerpaamik uaajeerluni sassarnerminiilli Laakkuluk Williamsonip pikkunassuseq aalajangersimasoq inuit iluaalliornarisaraat maluginiarpaa.
- Kiinnap saaralaannguani, ittuunngiivilluni eqqumiitsumik kiinarsornerup nukittussusermik tunivaanga namminerlu misigissutsikka aqulerlugit Laakkuluk Williamson oqaluttuarpoq.
Eqqumiitsuliornermini ingerlatsinermigut killissani misissuiffigai.
- Isiginnaartut sammisanik oqimaatsunik saqqummiiffigalugit qanoq ippa?, assersuuteqarluni oqarpoq.
Sammisani soorlu siooranermi kinguaassiutitigullu piumassuseqarnerup qanoq issusia eqqartorneqartillugit quiasaarneq ilaavoq.
- Inuit illartittarnissaat ataatsimoorfeqalernissamullu periarfissanik nassaarnissaq nuannaraara, Laakkuluk Williamson oqarpoq.
’Nuliaminik Neqilik’-mut atatillugu Laakkuluk Williamsonip ikinngutaata Cris Derksenip ukioq manna siusinnerusukkut toqukkut qimagussimasup nipi pilersitaa ilaavoq. - Suliamma iluani nipilersuutimi atorneqarnissaanik paasitikkakku assut attortippoq … Tamataqannginnerali ernummatigaa, Laakkuluk Williamson isini immatsertut oqaluttuarpoq.
Assi: Angu Motzfeldt Nuummi Eqqumiitsulianik Saqqummersitsivimmut
Nuummi Eqqumiitsulianik Saqqummersitsivimmi saqqummersitsineq aallartimmat peqataasut amerlasuut najuupput.
- Illu ulikkaarpoq! Nuannareqaara! Laakkuluk Williamson saqqummersitsineq aallartimmat oqarpoq.
Taanna Taqralik Partridgelu torlorsorlutik saqqummiipput. Laakkuluk Williamsonillu unammisitsineq aallartippaa, tassani eqqugassaq tassaavoq qungasequt tv-mi nammineq peqataaffigisamini, nangeqattaartuliami nuannarineqarluartumi ’North of North’-meersoq.
Nangeqattaartuliaq eqqumiitsuliaanut assingusumik anersaaqarluni pilersitaavoq, Laakkuluk Williamson oqarpoq.
- Iqaluit Canadami illoqarfiit allat aammalumi Nuuk assigalugu periarfissagissaanngilaq. Katuamut assingusumik nassaassaqanngilaq, Laakkuluk Williamson oqarpoq.
Illoqarfimmilu katersugaasivik mikisuararsuuvoq, eqqumiitsuliortunullu tapiissutit ikittunnguupput, taanna nassuiaavoq.
- Pisariaqartitatsinnik atortorissaarutinik periarfissaqanngilagut, taamaattorli suliaqartarluta. Nunamut immitsinnullu attaveqarnerput pissutigalugu, pilersissinnaasavut aatsaat taama nukittutigipput.
Aliasunneq assigalugu angisuut aappillarissullu ’Nuliaminik Neqilik’ tassaavoq aalasulianik seqersitsilluni takutitsinerit, nipitalersorlugu suliaq kiisalu assigiinngitsunik ivertiterinikkut aaqqissuussaq. Suliaq taanna Londonimi British Museumimut pulaarnerup kingorna pilersinneqarpoq. Katersugaasivimmi kalaallit atortui takussaallutik; tassaasut illaagut, meqqut inuusarlu, taakku Laakkuluup saqqummersitsinermini aappillaarissunngortissimaavai.
Oqaluttuassartaa pikkunartorujussuuvoq.
British Museumip saqqummersitami ilaannik suleqatiginninnissamik kissaateqarpoq. Pisariuallaalerporli. Isumannaallisaanermut tunngatillugu malittarisassarpassuit malinneqartussaapput.
- Taamaattumik saqqummersitaareersunut taarsiullugit makku suliarivakka, Laakkuluk Williamson nassuiaavoq.
Masaannaamik oqaluttuamut attuumassutaavoq, imminut illersorniarluni aniguiniarnermini nammineq pigisaminik qimatsinera.
- Angisuujusussaapput, taamaalilluta misissorluarsinnaaniassagatsigit.
VR-imi takutitassiamik suliamini ’Tartupaluk’-mi sumiiffimmik takorluukkamik Laakkuluk Williamsoni isiginnaartoq – Sassuma arnaatalu illiaata iluanut. - Timip ilagivaa pikkunartoq, Laakkuluk Williamson oqarpoq, suliami tassani timip iluaniittoq puisimillu nerineq.
Assi: Angu Motzfeldt Nuummi Eqqumiitsulianik Saqqummersitsivimmut
Nalaatsortumillu Laakkuluk Williamsonip katersugaasivimmut sulianik takusaanera tassaavoq ulloq Mette Frederiksenip spiralilersuisimanermut utoqqatseriartorluni septembarip 24-ni 2025-mi Nuummiinnera.
Arnat akuersiteqqaarnagit spiralilerneqarsimasut akornanniippoq Laakkuluk Williamsonip ajaa.
- Ulloq taanna oqimaappoq. Katersugaasivimmi pigisaniit aliasunneq malugineqarsinnaavoq, Laakkuluk Williamson oqarpoq, katersugaasivimmit toqqaannartumik aallakaatitsineq malinnaaffigigamiuk.
- Taamaattumik taama angitigipput aappillaarissuullutillu. Aliasunnerup angissusaa peqqutaalluni.
Asannittut qeqertaat Nuummi Eqqumiitsulianik Saqqummersitsivimmi Laakkuluk Williamsonip suliai allat saqqummersinneqarputtaaq, ilaatigut ivertiterineq ’Nannuppugut!’ 2021-meersoq Canadamiut eqqumiitsuliortunut nersornaasiuttagaannik ataqqisaasumik Sobey Art Awardimik nersornaaserneqarsimasoq.
Ivertitigaq nannup amianik sanaajuvoq aalasuliamik seqertitsiffigalugu suliaq. Tassanilu Laakkuluk Williamson nannup tarnera nersorniarlugu uaajeerpoq. Saqqummersitsinermi tingerlaatissiami bomuldiusumi amiusaartitaq Nuummi Eqqumiitsulianik Saqqummersitsivimmiippoq.
Laakkuluk Williamson aamma Taqralik Partridge saqqummersitsinerminnik ammaanersiornermi torlorsorlutik takutitsipput
Assi: Angu Motzfeldt Nuummi Eqqumiitsulianik Saqqummersitsivimmut
Sobey Art Awardimik nersornaaserneqarnermut atatillugu aalajangiisartut ilaatigut oqaatigaat:
“Her works invite us to share in a world abundant with possibility infused with the interconnections of land, family, community and cultural knowledge.” (Suliaasa silarsuarmut periarfissarpassuarnik, nunap, ilaqutariit, inuiaqatigiit kulturillu ataqatigiinnerannik ilisimasaqarnermik ulikkaartunut, qaaqquaatigut. aaqq.)
Silarsuaq taanna qanoq isikkoqarsinnaanersoq VR-videoliami ’Tartupaluk’-mi, ukioq manna Nuuk International Film Festivalimi takuteqqaarneqartumi saqqummersitamilu takuneqarsinnaasumi takorluugassiissutigaa.
Isarussat piviusorsiortumik isigilersitsisartut atornerisigut silarsuaq takorluugaq orninneqarsinnaavoq.
- Asannittut republikiat eqqarsaatigisamit pilersitaavoq, kisianni najugaqarfiusoq piviusuuvoq, Laakkuluk Williamson oqarpoq. Nammineq filmimi peqataavoq, ilaatigut qeqertap præsidentiatut.
Filmi qeqertami Tartupalummi, Canadap Kalaallit Nunaatalu akornanniittumi immiunneqarpoq.
Nunat taakku marluk sakkutuut qeqertamukaappaat "angutit sorsuffiat“-tut taasamut sorsugiaqqullugit.
- Nalunngiliuk kikkut sakkutuut tassunga qeqertamukaassorsimaneraat? Soorunami inuit. Kikkummi aqqutissaminnik nassaallaqqinnerussappat inuit nunaanni?, oqarpoq Laakkuluk Williamson.
Tartupaluk, Laakkuluk Williamsonip takorloortagaatut, nunat killeqarfiinik killeqanngilaq.
- Pissutigalugu inuit kulturiat oqaasiilu Siberiami, Alaskami, Canadamami Kalaallit Nunaannilu atorneqrneqarmata. Avissaartinneqarnikuullutali.
Kisianni isarussat VR-it atorlugit Tartupaluk isigigaanni, pisut allaanerulersarput:
- Qeqertaarannguaq angingaassusermik avatangiisilik eqqarsaatigissallugu nuannarisarpara, Laakkuluk Williamson oqarpoq.
