KL

DK

Aalisartunut 16-inut akiitsunik isumakkeerfiginninneq 

Akiitsuminnik isumakkeerfigineqarnissamik qinnuteqartut tamarmik siusinaartumik sulisinnaajunnaarnersiuteqartuullutillu utoqqalinersiaqalereersuupput 60-it sinnerlugit ukioqalereersimasut. Qinnuteqartullu aalisarnermik akuersissummik atuuttumik pigisaqanngillat aamma angallatit taarsigassarsissutigisimasatik pigiunnaareersimagaat, aalisarnermut piniarnermullu naalakkersuisoqarfik ilisimatitsivoq.

Nunatsinni aalisariutit ikigisassaanngitsut pisoqalinikuupput, taamatuttaarlu aalisartut arlallit utoqqalinertik pissutigalugu aalisarnermik ingerlataqarunnaarnikuupput, taakkunanngali arlallit aamma suli pisortanut pisussaaffearput, pingaartumik ESU aqqutigalugu taarsigassarsisimanerup kingunerisaanik. Asseq Ilulissat umiarsualivianeersuuvoq allaaserisamullu attuumassuteqarani.
Jensine Berthelsen
NUTSERISUUNEQ
Saqqummersinneqarpoq

Aalisarnermut inatsisimut ikaarsaarnissaq piareersarneqaleruttorpoq, tassungalu ilanngullugit inuussutissarsiummut tapiissuteqartarnermut/taarsigassarsisarnermut periarfissat aaqqissuunneqarnissaat.

Taamaattoq aamma aalisartitseqatigiiffiit anginerusut aqqutigalugit taarsigassarsisarneq periarfissatut atorluarneqarpoq, taamaattorli aalisartut ilaat suli Namminersorlutik Oqartussanut akiligassaqarput.

Tassa aalisartut 16-it matumani pineqartut, akiligassaminnik isumakkeerfigineqartut, tassaapput pisortanut akiligassaqartut ilaannamininnguarisimasaat. Sinerissamummi qanittumi aalisartut arlalissuit, ESU-p systemia atorlugu, akiligaqalersimapput.

Naalakkersuisut kingullermik politikkikkut aningaasaqarnikkullu nalunaarusiaat naapertorlugu, ukiortaamut 2024-mut ikaarsaarnermi suliat ESU-mut akiligassanut tunngasut  61-upput, taakkulu katillugit 25,2 millionit koruuninik amerlassuseqarlutik.

gældseftergivelse gæld til det offentlige fiskerilov inuiaqatigiit kystnært fiskeri samfund

ATORFIIT Se alle jobs

Powered by Labrador CMS