Aallartiffimmut uterneq

Ivalu Egede Martinsen Narsameersuuvoq Odensemilu Den sociale Højskolemi ilinniarsimalluni.

- Isumaginninnermi siunnersortitut sulilernissara aallaqqaammulli siunertarinngikkaluarpara. SDU Syddansk Universitetimi Odensemiittumi nunat tamalaat akornanni suliffeqarfinni attaveqatigiinneq tusagassiuutillu pillugit ilinniagaqarpunga. Ukioq ataaseq affarlu ilinniagaqareerlunga ilinniagara uannut siunertaqarunnaartuusivoq. Tassani paasivara allamik misiliisariaqarlunga, Ivalu oqaluttuarluni aallartippoq.

- Isumaginninnermi siunnersortitut ilinniagaqarnissara takorloorsinnaavara. Allamilli misiliigama peqqissimisimanngilanga. Sulimi attaveqatigiinnermut tunngasuni ilinniagaqarpunga. Inuilli pillugit annertunerusumik suliaqalissallunga.

Ilinniarnermini marlunnik meerartaarpoq

Ivalu ukiuni tallimani ilinniarpoq, piffissamilu tassani marlunnik meerartaarluni.

- Ilinniarnerma nalaani marlunnik meerartaarama ajunngiinnarsoraara, Ivalu oqarpoq.

- Ilinniakkannimmi naammannissinnillunga isumaginninnermi siunnersortitut sulilerama inersimasutut inuuneqarnerulerpunga. Suliffeqarfimmi namminersortumi siullermik sulilerpunga, ilaqutariinnik sullissivimmi. Ilaqutariit kalaallit sullittarpakka. Aamma nutserisutut namminersortutut sulivunga. Tamatuma kingorna Odensemi Kalaallit Illuutaanni ukiuni pingasuni sulivunga. Taava allamik pisoqartariaqalersoraara. Paaqqutarinnittut angerlarsimaffiannik aallartitseqataavunga. Taava arnat qimarnguianni atorfinippunga, tassani Kalaallit Illuutaat suleqatigalugu. Tamatuma kingorna paaqqutarinnittut angerlarsimaffianni piffissap ilaani Kalaallit Nunaannit amerlasuunik inoqarpoq. Amerlanerpaaffigisaanni 40-t missaanniipput. Kiisalu 2025-mi Kalaallit Illuutaannut uteqqippunga.

Ivalu qularuteqanngilaq, soorlu tassa angerlarsimalluni Atlantikup Avannaani Illuup majuartarfiisigut Kalaallit Illuutaanni allaffimminut majuaqqikkami.

- Eqqarsaatigikulasarpara timmisartorsimallunga maannalu millunga. Suliarisimasakka assigiinngitsut suliarineri uannut pingaaruteqarsimapput.

Ilumut ajornartorsiutaaneruleriartorpa?

- Suliagut imaannaanngitsorujussuupput. Inuit inuunerat pineqarpoq, soorunamilu inummik ataatsimik arlalinnilluunniit ikiortarialinnik oqaloqateqaraangatta artornartarpoq, Ivalu oqarpoq.

- Qujanartumik aamma nuannersunik pisoqartarpoq, soorlu ikiuisimanerput pillugu qujaffigineqaraangatta ajornartorsiutitsinnilluunniit aaqqiissuteqaraangatta.

- Qujanartumik aamma nuannersorpassuaqarpoq. Soorlu ikiorsimasat aggerlutik qujajartoraangata. Imaluunniit suliniut arlaallit iluatsissimappat.

- Isummat pigiliutiinnakkat aamma nalaattarpagut. Kalaallit Nunaanniillu tikittut suliffittaarniarsinnaasarnerat ajornakusoornerusartoq aamma malunnartarpoq. Inuiaqatigiinni nutaaliaasuni, soorlu danskini, ilinniarsimanngitsutut sulisunut suliamut immikkut ilisimasaqarnissaq aamma piumasaqaataakkajuppoq. Nunatsinnilu talittarfinni tunisassiorfinniluunniit sulilersinnaanissaaq, danskini sulilersinnaanissamut assersuukkuminaatsorujussuuvoq.

- Sooq taama pisoqartuarnersoq eqqarsaatigikulasarpara. Nalunngilarpummi sooq taama pisoqartartoq, Ivalu ernumalluni oqarpoq.

Immaqa Danmarki qinerneqanngikkaluarpoq, Kalaallit Nunaannili inuuneq qinerneqartuunani, Ivalu isummersorpoq.