UNNIA
Ullorsiutit ajunngitsuliornermut tapiissuteqqartartut arsanik 4200-nik tunissuteqartut
Otto Motzfeldt ullorsiutini ajunngitsuliornermut tapiissuteqartartoq Greenland – Land of beauty atorlugu maanna ukiuni qulini meeqqanut inuusuttunullu kajumissutsiminik sulisimavoq. Suli ingerlassivoq.
Toqqorsivimmit assi: Leiff Josefsen
Otto
Motzfeldt, ullorsiutinik Kalaallit Nunaannit assilisanik
assitalersukkanik, meeqqanut inuusuttunullu ajunngitsuliornermut
atorneqartartunik Greenland – Land Of Beauty, saqqummersitsisartoq immikkut ittumik
saqqummersitsinikkut aappaagu ukiuni qulinngortorsiornerminik malunnartitsissaaq.
- Greenland – Land of Beauty 2027 GOLD EDITION-imik
taaguuteqassaaq, tassani assiliisartut Kalaallit Nunaanni
sumiiffinni assigiinngitsuneersut assilisaat kusanartut tunissuteqaatigineqarput.
Qujanaq, allaaserisat ilaanni allassimavoq.
- Assiliisartut suliffeqarfiillu ajunngitsuliortut Kalaallit Nunaanneersut, kiisalu Kalaallit Nunaanni Danmarkimilu aalajaallutik ajunngitsuliorlutillu tuniniaasartut amerlasuut
ikiuineratigut taama angusaqartigisinnaasimavugut, taamaalillutalu
Kalaallit Nunaanni meeqqat inuusuttullu atugaannik
allanngueqataasinnaasimalluta, Otto Motzfeldt ullorsiutinik
pilersitsisoq allappoq.
Nalliuttorsiornermi ullorsiutinit isertitat Kalaallit Nunaanni qajartortartut peqatigiiffiinut, kulturikkut kingornussassanut pingaarutilinnut suleqataajuartunut, tunissutigineqassapput, Otto Motzfeldt ilisimatitsivoq.
Assi: Nammineq pigisaq
Suliniutip aallartinneraniit arsat 4.200-t kommuuninut tamanut
tunissutigineqareersimapput. Arsat Kommune Qeqertalimmut tunissutigineqartussat 600-t kingullertut inniminnerneqarsimapput, taakkulu ukiup ingerlanerani tikinnissaat naatsorsuutigineqarpoq. Taamaalilluni suliniut aqqutigalugu kommunit tamarmik arsanik
tunissuteqarfigineqarsimalerput.
Aammattaaq Milik Publishing suleqatigalugu meeqqanut
inuusuttunullu atuakkiat 150.000 koruuninik naleqartut
tunissutigineqarput, soorlu aamma Tasiilami meeqqat inuusuttullu
sammisassaqartinneqarnissaannut, ilaatigut pinngortitamik assiliisartoq Carsten Egevang peqatigalugu qimussernermut, 50.450 koruunit tunissutigineqarsimapput.
