61-inik ukiulik K’ulutana Kvist arfineq-pingasunilli ukioqarluni qaleralinniarnermik
aallussaqalerpoq. Angutit utoqqasaanngortut piginnaasakillillutik piniarunnaarlutik
qaleralinnialersimasut sungiusarfigisimallugit oqaluttuarpoq.
- Aanarsuakkunni, aatakkunni
peroriartorama piniartunik malitassaqarnanga aalisarnermik
aallussaqarnikuuvunga. Aanakkuma piniarnissamut ingalassimaarnikuuaannga,
immaqa isumaalugalunga.
Qaleralinniarneq aallarteqqaarmat
- maannalu assigiinngissuseq
Qaanaami aalisakkerivik 1987-imi ammarneqaqqaarmat qaleralinnik tunisisut
siulliit ilagisimallugit, tunisassiorfimmullu tunisat akikippallaarnerat
pissutigalugu tunisinissamut uerisimanatik K’ulutana Kvist oqaluttuarpoq. Inuinnarnut qaleraleerniarusunnerusarsimapput.
- Siullerpaanut ilaallunga qaleralinnik tunitsivimmut tuniseqataanikuuvunga,
100 kiilu sinnerlugu tunisilluta. Taamanikkut qaleralik kiilumut 3 imaluunniit
4 koruuninik akeqarmat annikitsuararsuarmik oorisivugut, K’ulutana Kvist
oqaluttuarpoq.
Qamuteralaat atorlugit qaleralinniarfimmukartoqartarpoq tunisiartortoqartarlunilu.
Assi: Johanne Peary
Ullumikkut tunitsivimmut Inughuit I/S-imut qaleraleerniarnermi kiilumut 23 koruuni akigitinneqarpoq. Qalerallit siorna tunineqartut marloriaataat ukiormanna aalisakkerivimmut tunineqarsimasut, Inughuit Seafood I/S-imi pisortaq Ujuut Olsen uppernarsaavoq.
- Qalerallit ukioq kingulleq tunisassiorfimmut tunineqartut 59
tonsiusut, marloriaataat 127 tonsit missaat maanna tunineqarsimalerput.
Sulilu aalisarfiummat neriuppunga 130 tonsit tikissinnaassallutigit, Ujuut Olsen oqarpoq.
- Siornatigut aalisartut 40-t missaaniittaraluartut maanna 60-it aamma 70-it akornanni amerlassuseqassangatippakka. Aalisarluartullu isertitaqarluartarput, K’ulutana
Kvist oqarpoq.
- Soorlu aalisarluartut
qaammammut 50-70 tusindit koruunit akornanni isertitaqartarput, K’ulutana Kvist oqarpoq.
Tunitsiveqarniarneq
Massakkut qaleralinniarneq ingerlalluarpoq, naak
taamaattuaannarsimanngikkaluartoq. Qaanaami tunitsivimmik siornatigut ingerlatsiniartoqarsimagaluarpoq, tunitsivimmilli ingerlatsinerup imminut
akilersinnaannginnera pissutigalugu matuinnartariaqartarsimasut, K’ulutana
Kvist oqarpoq.
- Suliffeqarfiit Arctic Green Food aamma Nuka
A/S ukiut marluk pingasulluunniit tunitsivik ingerlanniartarsimagaluarpaat, kisianni unittoortarlutik,
K’ulutana Kvist oqarpoq.
Tunisassiorfiup ingerlatilernissaa siunertaralugu Jens Danielsen, Naimanngitsoq Petersen aamma K’ulutana
Kvist suliffeqarfimmik aallartitsiniarlutik suleqatigiiffiliorput. Tamassumalu kingorna Inughuit Seafood I/S 2014-imi
pilersinneqarluni.
QAANAAMI QALERALITTASSIISSUTIT
Naalakkersuisut ukiormannamut 2026 Qaanaami qaleralittassiissutaat: 252 tons.
Najoqqutaq: Naalakkersuisut.gl
- Inuit tunitsivissaaruteqqimmata Inughuit Seafood I/S pilersinneqarnissaanut suleqatigiissitamik piniartut
peqatigiinni 2008-mi komiteliorpugut, K’ulutana Kvist oqarpoq.
Thulefonden aningaasaliineratigut
Royal Greenlandilu piginneqatigalugu oktobarip aallaqqaataani 2014-imi Inughuit
Seafood I/S ammarneqarpoq.
- Qaanaami, Siorapalummi, Qeqertani Savissivimmilu najugaqartut Inughuit Seafood I/S-mut saaffiginninnermikkut tunisassiorfimmut piginneqataalersinnaapput, K’ulutana
Kvist oqarpoq.
Siku aalisarnissamut naalagaasoq
Silap pissusiata allanngoriartornera malugineqarsinnaagaluartoq aalisarneq
annertusiartorpoq.
Seqineq siornatigut oktobarimi suli nuisasartoq sikugaangat
qaleralinniarneq aallartittarsimasoq, maannakkut aatsaat decembarimi
januarimiluunniit aalisartoqarsinnaalersartoq, K’ulutana Kvist oqarpoq.
- Isserujussuartarallarmat siku meterit marluk missani issussuseqartarnikuugaluarpoq, massakkut siku meteri ataaseq 30 centimeterillu missaannaani issussuseqartalernikuummat putujuminarsilluni aalisarnissaq oqinnerulernikuuvoq,
K’ulutana Kvist oqarpoq.
Qaleralinniarnermi amuartaateqanngitsut nukitik atorlugit amuartarpaat.
Assi: Johanne Peary
Sikueraangat qaleralinnik aalisarneq unittarpoq. Aalisartullu amerlanerit aningaasarsiornerminnut kalluaanngitsumik qilalugarniarnermut saattarput,
qajartortanngitsulli qilalugarnianut matruusiusartunut piffissap ilaa
aningaasarsiornikkut ilungersuanarsisartoq K’ulutana Kvist oqarpoq.
- Qajartorsinnaanngitsut
aningaasatigut isertitassaasuasarput, piffissallu ilaani silarluinnaleraangat
qilalugarnissaq ajornakusoorsilluni aningaasatigut amigartuulersarput, pingaartumik
sulisartumik aappaqanngitsut, Kulutana Kvist oqaluttuarpoq.
QAANAAMI TUNUMILU TAPIISARNERMUT MALITTARISASSAT
Juunip aallaqqaataani 2026-mi atuutilertussat:
- Angallatit 6 aamma 9,5 meterit akornanni angissusillit 85 % tikillugu taperneqarsinnaapput. Nammineq aningaasaliissutissat 2 %-iussallutik.
- Angallatit 9,5 meterit sinnerlugu angissusillit 60 % tikillugu taperneqarsinnaallutik. Nammineq aningaasaliissutissat 5 %-iussasut.
Maajip 31-ani 2026-mi atuukkunnaartussat:
- Angallatiniit 6 meteriniit qummut, aamma 9,5 meteri sinnerlugu, 40 % tikillugu taperneqarsinnaaneq.
- Nammineq aningaasaliissutissat 10 %.
Najoqqutaq: Naalakkersuisut.gl
Naalakkersuisut Qaanaami Tunumilu aalisartunut aalisariutitaarniartunut 85
procent tikillugu tapiisinnaalernerat nuannaarutigalugu, imaroqqaneranilu qaleralinniartalernissamut
periarfissiisinnaassasoq ilimagalugu, K’ulutana Kvist oqarpoq.
- Qaleralinnik ujaasissagutta
avataani ujaasisariaqarpugut Kiataap saavani, itinermi samani avasissumi
ujaasissariaqarluta, taamaammallu umiatsiat angallatit angisuut atorfissaqartippagut, K’ulutana
Kvist oqarpoq, nangillunilu:
- Inuusuttut siunissami iluaqutigilluassavaat. Naalakkersuisut taamatut
iliornerat neriuuteqalersitsivoq, qujassutissaqarfigeqaavullu, K’ulutana Kvist
oqarpoq.
Qamuteralaat qulit tunniunneqartut
Aningaasaateqarfik Thulefonden ukiaq manna qamuteralannik qulinik
aalisartunut tunniussivoq. Aalisarnerup ineriartoqqinnissaanut
iluaqutaalluarumaartut atorneqarlualereersimasullu, K’ulutana Kvist oqarpoq.
Tamannali ajornartorsiutinik malitseqarpoq. Qamuteralaat ajoquserpata sannavimmik aaqqissuiffissamik
amigaateqartoqarpoq minnerunngitsumik mekanikerinik aaqqissuisussaqannginnera
pissutigalugu. Taamaattumik aalisartut namminneerlutik qamuteralannik
aaqqissuisariaqartartut, K’ulutana Kvist nassuiaavoq.
- Mekanikerinik amigaateqarnerput pissutigalugu qamuteralaat nammineerluta
suliarisariaqartarpagut, taamaalilluni sillimmateqarneq annaaneqartarluni,
K’ulutana Kvist oqarpoq.
Inerisaavigineqarnissamik kissaateqarneq
Qaleralinniarnerlu ineriartortinneqaqqissappat talittarfeqarnikkut, aalisarnermi
atortussanik pilersorneqarnikkut, qamuteralannik iluarsaassisarfitsigut
pitsanngorsaasoqartariaqartoq K’ulutana Kvist isumaqarpoq.
- Qaanaami aningaasarsiorneq ingerlariaqqissappat tamakkua pilersaarutit Naalakkersuisut
naammassisariaqaraat isumaqarpunga, K’ulutana Kvist oqarpoq.
Siunissami inuusuttut amerlanerusut aalisarnermik soqutiginnilerumaartut
aallussillualerlutillu neriuutigalugu, K’ulutana Kvist oqarpoq.
- Assorujussuaq kajumissaarerusuppunga - inuk kinaluunniit pisinnaasoq, peqqissoq aalisaqqullugu. Piumassuseqanngikkutta aningaasarsiortunut
katataassaagut. Ilagut arlaannik pisaartortut isiginnaalussinnassavagut. Piumassuseq inummiippoq, K'ulutana Kvist oqarpoq.
Kulturitoqaq
tammarnavianngitsoq
Piniartuunermiit aalisartuunermut
ikaarsaariarniapiloorneq ingerlasimasoq, sulilu ingerlasoq, inuusuttulli
aalisarnermik soqutigisaqartut amerliartortut, K’ulutana Kvist isumaqarpoq.
- Assersuutigalugu ilai aalisarusuttanngillat
piniartoorusunnerugamik, K’ulutana Kvist oqarpoq.
Piniartut ikilillutik
aalisartoqarnerulissappat piniarnikkut kulturitoqaq tammarnavianngitsoq, K’ulutana
Kvist isumaqarpoq.
- Una oqaatigilara: illoqarfik illoqarfiutilluni piniartuerunnavianngilaq
qanorsuarluunniit piniartoqartuassaaq. Naleqqussartuarnerli inuup
pisariaqartippaa, K’ulutana Kvist naggasiivoq.
