Aallussilluartoq PiSiu-p nersornaasiuttagaanik 2024-mi nersornaaserneqarpoq
Emil Krogh ilaatigut qaqqani majuarnermigut aamma sikkilernermigut, Nanortalimmi meeqqanut inuusuttunullu sunngiffimmi sammisassanik pilersitsinermini, nammineq kajumissutsiminik suliniuteqarnini pillugu 2024-mi PiSiu-p nersornaasiuttagaanik nersornaaserneqarpoq.
Saamerliit: Nanortalimmi Brugsenimi pisiniartitsisoq Ulrik Fjord Schulz, Pisiup siulittaasua Julie Lynge aamma nersornaaserneqartoq Emil Krogh.
PiSiu-p nersornaasiuttagaa aappassaanik pinerlunnermik pinaveersaartitsinermi malunnaatilimmik allannguisimasumut tunniunneqarpoq. PiSiu-p aamma Kalaallit Nunaanni Brugsenip nersornaasiinermikkut inuit, suliniutit suliniutillu, Kalaallit Nunaanni pinerlunnermik pinaveersaartitsinermik ulluinnarni tapersersuisunut nersornaasiiniarput.
- Ukioq manna Emil Krogh, Nanortalimmi nammineq kajumissutsiminik suliniuteqarnermigut illoqarfimmi meeqqanut inuusuttunullu maligassiuisoq, nersornaaserneqarpoq. Inuusuttut kiffaanngissuseqartittarpai, aammali inuunermi tatineqaraangat tusarnaarsinnaasarpoq.
Nersornaasiinermit 20.000 koruunit tunniunneqarput.
"Emiiiiil"
Emil nersornaaserneqartoq aallussilluartuugami nalinginnaasumiillu maligassuulluni — illoqarfimmi meeqqanut inuusuttunullu taamaallaat pinnani, aammali inersimasunut allanut pinerlunnermik pinaveersaartitsinermi allannguinissamik takorluuisinnaassuseqarluni, PiSiu aamma Kalaallit Nunaanni Brugseni allapput.
- Emil Nanortalimmi timersornermut peqataasarpoq, qaqqarsiortartullu peqatigiiffianni suliniuteqarluartuulluni. Illoqarfimmi sikkileraangat meeqqat „Emiiil“-mik suaartartarnerat tusaaneqarsinnaasarpo, PiSiusimi siulittaasoq Julie Lynge oqarpoq.
Aningaasat sunniuteqarnissaat neriuutigigaa
PiSiu-p nersornaasiuttagaata siunertaraa Kalaallit Nunaanni suliniutit pinerlunnermik pinaveersaartitsinermik immikkut ittumik suliaqartut nersorniarlugillu tapersersorniarlugit.
- Neriuppugut 20.000 koruunit Emilip suliniutigisimasaanut iluaqutaassasut nukittorsaatissaasullu, aammali suliniutaa anguniakkaminik nutaanik angusinissamut periarfissaqalissutigalugu, PiSip siulersuisuini siulittaasoq Julie Lynge oqarpoq.
Nersornaasiineq Nanortalimmi timersortarfimmi pivoq, tassanilu innuttaasut Emil Kroghip eqqaaniaalluni nalliuttorsiorneranut peqataapput, illoqarfimmi suliai nersorniarlugit.
Nersornaasiinermi ilaatigut peqataapput PiS-ip siulersuisuini siulittaasoq Julie Lynge, Brugsenimi pisortaq Susanne Christensen, Brugsenimi tuniniaanermut attaveqaqatigiinnermullu pisortaq Benny Reffeldt Otte aamma politiit pisortaat Bjørn Bay.
