Aalisakkeriviit saarulliit niaqui perlukuilu nunatta avataanut akikinnerusumik assartorsinnaaleraat 

Nunatsinni aalisakkerivissuit aalisakkat sinnikui nunatta avataanut akikinnerusumik assartorsinnaalerpaat.

Royal Arctic Linep aalisakkerivissuillu pingasut Royal Greenland A/S-ip, Polar Seafood A/S-ip Halibut Greenland A/S-illu isumaqatigiissuteqarnerisigut tamanna pisinnaalerpoq. Akikinnerusumik assartorneqarsinnaalersut ilaatigut makkuupput: Aalisakkat tingui, niaqui, aqajarui, amii saarnilu qaleriivi.

Assartuinermut akigititat appasinnerulernerisigut aalisakkanik suliffissuit tunisassiassat niuerfinnut allanut, atorluarneqarfigisinnaasaannut, akikinnerusumik assartorsinnaalerpaat. Royal Arctic Linettaaq umiarsuisa nunatta avataanukaraangamik usigisinnaasai isumaqatigiissuteqartorneratigut atorluarneqarsinnaalerput.

- Tunisassiornermi sinnikut annertunerusumik atorluarneqarnerisigut naleqarnerulersitsineq nukittorsarneqarsinnaavoq kiisalu suliassanik suliffissanillu nutaanik pilersitsinissamut tunngavissiisoqarsinnaavoq. Taamaattumik aalisarnermik inuussutissarsiuteqarnerup iluani peqataasut tamarmik tunisassiatigut atortussiat pitsaanerusumik atorluarneqarnissaannik suleqatigiinnerannut peqataasinnaanerput nuannaarutigaarput, Royal Arctic Linep pisortaanera Niels Clemensen oqarpoq.

Najukkami tunisassiortoqarluarnerulersinnaasoq

Assartuinermut akigititat appartinnerisigut tunisassiornermi sinnikut akikinnerusumik assartorneqarsinnaanerat kisimi periarfissanngunngilaq. Aalisakkanilli tunitsiviit tunisassiorfiillu akornanni assartuisinnaaneq orniginarnerulersippaa.

Isumaqatigiissuteqartut nalunaarutaat naapertorlugit aalisakkat suliareqqinneqarnissaat, nunattalu iluani assartorsinnaanerat periarfissagissaarnerulerpoq. Aalisakkat tunisassiarineqartut sinnikui taamaaliornikkut toqqaannaq avammut nassiunnissaat ingiinnarnissaalluunniit pinngitsoortinneqarsinnaavoq.

- Tunisassiornermi sinnikut amerlanerusut pitsaanerusumik atorluarneqarsinnaagunik aammalu Kalaallit Nunaanni suliarineqarsinnaagunik, tamanna tunisassiornermut aammalu naleqarnerulersitsinermut nunatsinni periarfissanik nutaanik pilersitsissaaq. Tamanna ineriartortitsineq inuussutissarsiuteqartut tamarmik taperserpaat, aalisakkeriviit ataatsimoorlutik taama nalunaarput..

Aalisarnermut naalakkersuisoq, Peter Borg (D), isumaqatigiittoqarneranut aamma isumalluarpoq.

- Nuannaarutigaara inuussutissarsiortut aalisakkanik suliarinninnerup annertusarnissaanut aammalu aalisarnikkut pisuussutitsinnit naleqarnerulersitsinissamut annertunerusumik suliniuteqarsimanerat, Peter Borg oqarpoq.