Atorunnaarallartitsinermi Narsaq eqqorneqarujussuartoq: Suliat meeqqanut tunngasut 183-it inunnik sullissisumut ataatsimut

Inunnik sullissisoq ataaseq naammattunik suliassaqarpoq.

Siunnersuisarfik BDO naapertorlugu Narsami taama pisoqarpoq, taakku Naalakkersuisut Kommune Kujallermi meeqqanut, inuusuttunut innarluutilinnullu immikkoortortaqarfimmik akissaaffeqaleranerata nalaa misissorsimavaat.

Tamanna nalunaarusiami juulip 12-ani 2026-meersumi, Sermitsiap allagaatinik takinnissiinnaalerfigisaani atuarneqarsinnaavoq.

Narsami meeqqanut inuusuttunullu sullissivimmi sulisut tallimaasussaasut nalunaarusiami aamma allanneqarpoq. Isumaginninnermut Aqutsisoqarfiup kingusinnerusukkut erseqqissaaneratigut amerlassusaat sisamanngortinneqarput.

Kisianni tassa 2026-p ilaani Narsami ataasiinnarmik sullissisoqarpoq, sulianik meeqqanut tunngasunik 183-inik suliaqartussamik.

Novembarip 7-ani 2024 Naalakkersusiut Narsami meeqqanik inuussuttunillu ingerlatsinermik akisussaaffeqalermata pissutsit allarujussuartut isikkoqarput.

-Narsami inunnik isumaginninnermi atorfiit tamarmik inuttaqarmata nukiit Nanortalimmut Qaqortumullu atorneqarnissaat taamani isumaqatigiissutaavoq, Team Kujallermiit killiffissiuilluni allakkiami allassimasoqarpoq.

Sullissisut (team, aaqq.) amerlanerit Isumaginninnermut Aqutsisoqarfimmeersuupput, kujataani atorunnaarallartitsinerup nalaani iliuuseqarnissamut ikiuuttut.

Kommunalbestyrelsimut ilisimatitsissummi januar 2025-meersumi pingaarnersiuineq aamma allanneqarsimavoq. Isumaginninnermut Aqutsisoqarfiup sulisui Qaqortumiit aallaaveqarlitik, pisariaqartitsineq naapertorlugu Nanortaliliartarnissaat naalakkersuisoqarfiup nassuiaatigaa. Narsaq utaqqisinneqartariaqarpoq, illoqarfimmi atorfiit tamarmik inuttaqarmata.

Narsami sulisut qangaqqissaaq ikilisimanerat Sermitsiap allagaatini paasissutissaataani takuneqarsinnaanngilaq.

Kisitsisit maluginiagassaasut - assiliarli tamakkiisoq takujuminaatsoq

Atorunnaarallartitsinermiit qaammatit siulliit 15-it ingerlaneranni suliat ammasut amerlassusaat qiviaraanni, Narsaq sanilerisaminut sanilliullugu annermik eqqugaasimarpasippoq.

Narsaq Nanortalimmiit annerulaaginnarpoq, kisianni suliat meeqqanut inuusuttunullu susassaqarfimmi naalunaarsorneqarsimasut marloriaammik amerlanerorpasipput, 391-niit akerlianik 168-inut.

BDO-p kisitsinerani suliani meeqqanut tunngasuni meeqqat amerlassusaat 183-iuvoq, 391-illu meeqqanut pineqartunut suliat ammasut nalunaarsorneqarsimallutik. Taamaammat meeraq ataaseq arlalinnik suliassaqarfiusinnaalluni.

Nalunaarusiami aamma nassuiarneqarpoq sulianik ammasoqartoq ingerlanneqarunnaarsimasunik. Taamaattoqarnerata ataatsimut isiginninneq ajornakusoorsisippaa. Sulianillu ingerlatsisinnaasunik amigaateqarnerup sulianik nungusaaniarneq ajornakusoorsitillugu.

Narsami meeqqat inuusuttullu 35-it missaaniittut angerlarsimaffiup avataanut inissiisarfimmut imaluunniit angajoqqaarsianut inissinneqarsimasut BDO-mit aamma kisinneqarsimapput.

Kujataa tamakkerlugu sukumiisumik sulisussarsiortoqarnissaa BDO-p ujartorpaa, Isumaginninnermillu Aqutsisoqarfiup sulisui Team Kujallermik taaneqartut, suli annertuumik tapersersuinissaat pisariaqartoq nalilerlugu.

Qaqortumi siuariartoqarneranut ersiuteqartoq

BDO naapertorlugu sulianik ammasumik ingerlanneqarunnaarsimasunik ikilisaaneq annermik Qaqortumik pisimavoq. Team Kujalliullu nammineq killiffissiuillui allakkiaani 2025-meersumi, illoqarfimmi misilittakkat ajunngitsut nassuiarneqarput.

Ikilisaanerli naammassinngilaq, piffissamilu tassani ineriartorneq qularnartoqarpoq.

Team Kujalleq Qaqortumi suliassaqarfimmi siunersiueqatigiinnermik sullissisunillu ilitsersuinermik ingerlataqarsimalluni nammineq allappoq.

Atorunnaarallartitsinerup qaammatai siulliit, ilaqutariinnut sullissivimmi suleriutsinik nutaanik sulianillu ingerlatsineq pillugu suleqatigiinnermik suliaqarfiupput, aqutsisorlu nutaaq marsimi 2025-mi atorfinippoq.

Ilaqutariinnut sullissiviup inuusuttunut neqeroorutai BDO-p nalunaarusiaani juuni 2026-meersumi aamma ersersinneqarput:

-Ilaqutariinnut sullissiviup Qaqortumi inuusuttunut neqeroorutai iluatsittutut oqaatigineqarput, peqataasartut amerliartortuarlutik.

Meeqqanut inuusuttunullu neqeroorut atuareernerup kingorna klubitut iliuuseqajaarnerullu akornaniittutut taaneqartoq, siusinnerusukkut ajornartorsiutinik takunninnissamut periarfissiisutut BDO-mit nassuiarneqarpoq.

Narsami Nanortalimmiluunniit ilaqutariinnut sullissiviit iliuusaannut paasissutissanik pissarsisinnaasimannginnertik siunnersuisarfiup aamma oqaluttuaraa.

Sisamaasunit marluk ullumikkut inissipput

Sullissisuusimasup Ivalo Knudsenip aqutsisunit ilinniartinneqannginnini tapersersorneqannginninilu allaatigisami allami oqaluttuaraa. Ivalo Knudsen BDO-p sulisumik eqqaasaqarnerani pineqanngilaq, taannami juulip aallaqqaataani aatsaat aallartippoq, BDO-p nalunaarusiaminik tunniussinerata kingorna.

Isumaginninnermik Aqutsisoqarfiup Kommune Kujalliullu ataatsimoorlutik Sermitsiamut akissuteqarnerminni ersersippaat, atorfinititsiniarneq sulisooreersunillu piginnaasalinnik atorfimmiiginnartitsiniarneq ajornartorsiutaasoq, annermik illoqarfinni mikinerni. Sulisoqarneq piffissap ingerlanerani allanngorarpoq, atorfinnullu inuttaqanngitsunut atorfinititsiniarneq ataavartumik suliniutigineqarluni.

Pisortaqarfiit aamma ilisimatitsipput sullissisut, siunersioqatigiinnermut inatsisitigullu tapersersorneqarnissamut kommunimiit Isumaginninnermut Aqutsisoqarfimmiillu periarfissaqartut, aamma sumiiffimmi sulisoqarniarneq ajornartorsiutaatillugu.

Akissutaat naapertorlugu Narsami susassaqarfimmi maanna inuit pingasut sulisorineqarput, tassa taakku sisamanik sulisoqartussanut inissinneqarsimasut. Taakkunannga pingasunit ataaseq meerartaarnerminut atatillugu sulinngiffeqarpoq, paarlatseqarani. Taamaammat atorfiit marluk inuttaqanngillat.

Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoqarfik Isumaginninnermut Aqutsisoqarfiup akissutaanut isumaqataavoq allanillu ilassutissaqarani.