Aasianni angerlarsimaffeqanngitsoq: - Angerlarsimaffeqanngitsunik sullissineq pitsaanerusariaqarpoq

Angerlarsimaffeqanngitsunik sullissineq pitsaanerulinngippat ajornartorsiut qaangerneqarnaviunngitsoq Aasianni angerlarsimaffeqanngitsoq oqarpoq.

Kommune Qeqertalimmi angerlarsimaffeqanngitsuuneq akiorniarlugu suleriusissamik nutaamik aallartitsisariaqartoq, kommunalbestyrelsimut ilaasortat marluk pineqartoq pillugu aalajangiiffigisassatut siunnersuuteqartut isumaqarput.

Anisitaasoq

66-inik ukiulik Mikael Storch Aasianni najugaqartoq inissiaatileqatigiiffiup Ini A/S-ip inaataaniit ukiut marluk missaata matuma siornatigut anisitaavoq, angerlarsimaffeqanngitsullu inaannut inissinneqarluni. Tamatuma kingorna initaaqqikkaluarpoq taannali aamma annaagamiuk angerlarsimaffeqanngitsut inaannut uteqqippoq. Piffissamilu sivisunerusumi tassani najugaqareerluni, pissutsit assigiinngitsut peqqutaallutik tassanngaanniit ukioq aallartilaartoq aamma anisitaavoq. Tamatuma kingorna kælderini allanilu kialaarfiusinnaasuni sinittarpoq, inuillu allat naakkinninnerisigut ullut ilaanni illup iluani siniffissaqartarluni.

Neriuutaaruttoq

Illumut nutaanngitsumut najorneqanngitsumut piginnittoq isumaqatigiissuteqarfigalugu ukioq nuuppoq, taannali najugarissallugu tulluanngimmat qaammatip ataatsip missaani najoreerlugu aamma qimappaa. Maannakkut qaammatit kingulliit marluk missaanni Aasianni talittarfimmi angallammi nutaanngitsumi piginnittoq isumaqatigiissuteqarfigalugu najugaqarpoq, piffissamili aggersumi qanoq iliussalluni nalullugu, taassuma oqaatigaa.

- Angallammik piginnittup ajunngisaarnerinnaatigut qujanartumik massakkut siniffissaqartarpunga, kisianni taanna angerlarsimaffiunngilaq, piffissamilu aggersumi qanoq iliussallunga nalulluinnarpara.

- Ini A/S aqqutigalugu inissannik qinnuteqarnikuuvunga ilisimanngilarali qaqagu initaassanerlunga. Inuttut taamatut inissisimalluni neriuutaarunnarpoq siunissarlu taartuinnavittut isikkoqarpoq, taamaattumik qanittumi uannut toquinnarniarlunga allaat eqqarsaleraluarpunga.

- Aasianni angerlarsimaffeqanngitsut uattulli inissisimasut arlaqarput, taamaattumik angerlarsimaffeqanngitsuuneq akiorniarlugu suleriuseq allanngortinneqanngippat ajornartorsiut qaangerneqarnavianngilaq, taanna oqarpoq.

Angerlarsimaffeqanngitsuuneq pillugu ajornartorsiut iliuuseqarfiginiarlugu Kommune Qeqertalik suliniutinik maannakkorniit pitsaanerusumik aallartitsisariaqartoq, Mikael Storch isumaqarpoq.

Siunnersuuteqartut

Kommune Qeqertalimmi angerlarsimaffeqanngitsut ikilisinniarlugit suliniutinik aallartititsisoqarnissaa pillugu, kommunalbestyrelsimut ilaasortat Aqqa Samuelsen aamma Paneeraq Sandgreen, tamarmik Siumumeersut, aalajangiiffigisassatut siunnersuuteqarput.

Kommune Qeqertalimmi angerlarsimaffeqanngitsut ikilisinneqassappata isumaginninnikkut sullissineq pitsaanerusariaqartoq, angerlarsimaffeqanngitsullu amerlassusaasa affaannanngortinneqarnissaat ukiuni tulliuttuni anguniarneqartariaqartoq aammalu ikiorsiinissaq, siunnersuinissaq neqerooruteqartarnissarlu siunertaralugu, angerlarsimaffeqanngitsunut orniguttartunik pilersitsisoqartariaqartoq, taakku isumaqarput.

Inissiat angerlarsimaffeqanngitsunut tulluussakkat

Aasianni, Qasigiannguani, Qeqertarsuarmi Kangaatsiamilu angerlarsimaffeqanngitsunut unnuisarfinnik, ininillu piffissami sivikinnerusumi sivisunerusumiluunniit najorneqarsinnaasunik, soorlu containerinik unnuiffigineqarsinnaasunik, pilersitsisoqartariaqartoq aammali inissianik akikitsunik angerlarsimaffeqanngitsunut naleqqussakkanik pissarsinissaq siunertaralugu inissiaatileqatigiiffiit suleqatigineqartariaqartut, kiisalu Housing First, tassa angerlarsimaffeqanngitsunut piaarnerpaamik inissiigasuarnissamut suliniut, atorneqartariaqarpoq, siunnersuuteqartut isumaqarput.

Siusinaartumik iliuuseqarneq

Inuit angerlarsimaffeerunnissaminnut navianartorsiortut iniminniit anisitaanissaat pinngitsoortinniarlugu peqqinnissaqarfimmiit, inunnik isumaginnittoqarfimmiit, suliffissarsiussisarfimmiit inissiaatileqatigiiffimmiillu aallartitanik suleqatigiissitanik pilersitsisoqarnissaa pingaaruteqartoq, Aqqa Samuelsen aamma Paneeraq Sandgreen isumaqarput.

Kommune Qeqertalimmi angerlarsimaffeqanngitsunut suliniutit pillugit kommunalbestyrelsimi ataatsimiititaliaq Inuit, ilaatigut inunnik isumaginninnermut tunngasunik suliaqartoq, oqaaseqartineqarsinnaasimanngilaq.