Aatsitassarsiortut tikeraartut: Qinersinermut akuliunniarneqarnertik ilumuunnginneraraat
Energy Transition Mineralsip piffissaq tikeraarfia akaarnaatsuusoq Inatsisartuni ilaasortap Mariane Paviasenip (IA) oqaatigaa, Australiamili aatsitassarsiorfiup pisortaata Kalaallit Nunaanni qinersisoqarnissaa sioqqullugu tikeraarnissap piffissaa "nalaatsornerinnaasutut" oqaatigigaa TV 2 allappoq.
Inuit Ataqatigiinneersup Mariane Paviasenip Energy Transition Mineralsip tikeraarnera "akaarnaatsutut“ oqaatigaa.
Assiliisoq: Leiff Josefsen
Sermitsiami Sapaatit-akunneri marluk matuma siorna allaaserineqartutut aatsitassarsioqatigiiffimmit Energy Transition Mineralsimit aallartitat Nuummut Narsamullu maanna tikeraarput.
Aatsitassarsiorfiup pisortaa Inatsisartunut qinersinissamut qanittukkut pisussamut akuliunniarsarinatik qallunaat nutaarsiassaqartitsiviannut TV2-mut oqarpoq.
Taakku tikeraarneranni piffissaasoq Inatsisartuni ilaasortap Mariane Paviasenip (IA) akaarnaatsuunerarpaa, Inatsisartunummi qinersinissaq kingusinnerpaamik apriilip arfernani pisussaavoq.
TV2-mut ima oqarpoq:
- Maannakkut tikeraarnerat inuiaqatigiit qinersinissaannut sunniiniarnerat akaarnaatsuusoq isumaqarpunga, TV 2-mut oqarpoq.
Energy Transition Mineralsimi pisortaaneq Daniel Mamadou piffissaq tikeraarnerat nalaatsornerinnaasoq oqarpoq.
- Politikkikkut akuliunniartutut isumaqarfigineqarpat taamaaliornissarput siunertarinngikkaluarparput. Akuliunniarluta tikeraanngilagut aningaasaliisartuttaliuna soqutigisaat illersorniarlugit paasisaqarnerujumallutalu tikiuppugut, tusagassiorfimmut oqarpoq.
Energy Transition Mineralsip Narsap eqqaani Kuannersuarni piiaanissamut akuersissut suli eqqartuussivikkut sorsuutigaa, ilaatigut uranimik piiaanissamut inerteqquteqalernerup kingunerisaanik naalagaaffimmut Namminersorlutillu Oqartussanut 76 milliardit koruunit missaannik taarsiissuteqarnissamik piumasaqarluni.
Aningaasaliisarfiit nalunaarutaat naapertorlugu ingerlatseqatigiiffiup siulersuisui naalakkersuisunut ilaasortat, illoqarfimmi suliffeqarfiit, soqutigisaqaqatigiit inuiaqatigiillu sinniisaat oqaloqatigiartorniarlugit Nuummut Narsamullu angalassapput.
