Imerniartarfiutilik qaammat ataaseq matoqqatitsisoqareersorlu: Taarsiivigineqarnissamut suli tusagaqanngilaq

Kommune Kujallermi imigassanik tuniniaanerup matuneqarneranit ataasinngornermi qaammat ataaseq qaangiussimalerpoq. Imerniartarfiutillilli piffissami matoqqasariaqarfimminni taarsiivigineqassanerlutik suli naluaat.

Qaqortumi imerniartarfiit Hinnarissuasiup Rockhousellu piginnittuat, Jim Riis, suli taarsiivigineqaranilu taarsiivigineqarnissamut pilersaarummik takusaqanngilaq.

- Suli taarsiivigineqanngilagut, taarsiivigineqarnissamullu pilersaarummik takusaqarata. Aamma inuussutissarsiutitta matoqqatittariaqalerneranut kommunimit minnerpaamilluunniit paasinninnermik ersersitsisoqanngilaq, taanna Sermitsiamut oqarpoq.

Sulisut amerlanerusut soraarsinneqarnissaat ernumagaa

Jim Riis isertitaqannginnerminni suliffeqarfiup ileqqaarutai atorlugit akiligassanik akilersuisariaqarpoq.

Sulisumi amerlanerpaartai sulisissinnaanngilai. Sulisut arfineq-marluk arfineq-pingasullu akornanniittut angerlartittariaqarsimavai, sinneruttut pingasut imigassap ammaqqinnissaanut piareersimasussat suli sulisippai.

Nalorninertilli sivitsorsaqqissinnaajunnaarnerarpaa.

- Taarsiissuteqarnissamut pilersaarummik tusagaqanngikkutta taakkua suliunnaarsittariaqassavakka. Inunnimmi isumaginninnermut allaffeqarfiusaarsinnaanngilanga. Taamaaliornissamut suliffeqarfik akissaqanngilaq.

AAMMA ATUARUK 

Imerniartarfiutilik akissutissarserusuppoq: Imigassamik matusineq kikkut akilissavaat?

Taassuma erseqqissaatigaa suliffeqarfiutimi kisimi pineqannginneri. Suliffeqarfiit mikinerusut aningaasatigut namminermisulli periarfissaqanngitsut annermik ernumassutigai.

- Uanga qaammatialunni aningaasarsinngikkaluaruma ajortussaanngilaq. Ullunummi ajornernut eqqanaarsalaarnikuuvunga. Ilaqarpugulli pigisatik tamaasa atorlugit aallartisaqqammisut. Taakkua ernummatiginerpaavakka.

Kommunimut siumoortumik taarsiivigineqarnissamut siunnersuuteqarpoq

Suliffeqarfiit aningaasatigut ilungersunartumik inissisimasut taarsiivigineqarsinnaaniassammata kommuni ikiorsiigallartariaqartoq Jim Riisip ataatsimiinnerminni siunnersuutigisimallugu oqaluttuaraa.

Naalakkersuisut ikiorsiissuteqartussanngorpata taakkunannga aaneqarsinnaanerat siunertaralugu.

- Taamaaliornikkut suliffeqarfiit aningaasatigut pisariaqartitsivissortut siumoortumik ikiorserneqarsinnaagaluarput, taanna oqarpoq.

Imerniartarfiutillit imigassanillu sassaalliiffiusartut ikiorsiissutisissappata Naalakkersuisut akuliutsinneqartariaqartut Kommune Kujallermit siusinnerusukkut paasissutissiissutigineqarpoq.

Naalakkersuisut imerniartarfiutilinnut ikiorsiissutissanik qanoq pilersaaruteqarnerat paasiniarlugu Sermitsiamit oktobarip 23-ani attavigaagut, allaaserisalli suliarinerani suli akissuteqanngillat.