Nutaarmiuni pisiniarfeqannginnera pissutaalluni,
nunaqarfimmi innuttaasut 30-t missaanniittut sapaatip akunnera kingulleq
nioqqutissanik inuuniarnermut pingaarutilinnik immikkut ittumik Avannaata
Kommunianit ikiorserneqarput.
Ikiorserneqarneralli Naalakkersuisut ilisimasaqarfigisimanngikkaat, Nunalerinermut,
Imminut Pilersornermut, Nukissiuutinut Avatangiisinullu Naalakkersuisoq,
Kalistat Lund, Inuit Ataqatigiit, paasissutissiivoq.
Nutaarmiuni pisiniarfeqannginnera pissutaalluni,
nunaqarfimmi innuttaasut 30-t missaanniittut sapaatip akunnera kingulleq
nioqqutissanik inuuniarnermut pingaarutilinnik immikkut ittumik Avannaata
Kommunianit ikiorserneqarput.
Ikiorserneqarneralli Naalakkersuisut ilisimasaqarfigisimanngikkaat, Nunalerinermut,
Imminut Pilersornermut, Nukissiuutinut Avatangiisinullu Naalakkersuisoq,
Kalistat Lund, Inuit Ataqatigiit, paasissutissiivoq.
Nutaarmiuni Naajaani Qeqertanilu
pisiniarfiliortoqarsinnaaneranut periarfissat pillugit misissuisussamik
suleqatigiissitaq pilersinneqarnikuusoq, taannali misissuinerit inernerinik
qaqagu saqqummiussissanersoq suli oqaatigineqarsinnaanngikkallartoq
Naalakkersuisoq ilanngullugu paasissutissiivoq.
Tamanna nunaqarfinni innuttaasunik inuuniarnikkut
ilungersunartorsiortunik sumiginnaanerusoq, Inatsisartunut ilaasortaq Adam
Kristensen, Inuit Ataqatigiit, isumaqarpoq.
Misissuinerit ingerlasut
2022-mi Inatsisartuni partiit tamarmiusut 2023-mut
aningaasanut inatsisissaq atsioqatigiissutigimmassuk, Nutaarmiuni Naajaani
Qeqertanilu KNl-p nioqqutissanik pilersuinera siuarsaavigineqassasoq
siunniunneqarpoq, suliarlu maannakkut sumut killinnersoq pillugu Inatsisartunut
ilaasortaq Adam Kristensen paragraf 37 atorlugu upernaaq Naalakkersuisunut
apeqquteqarpoq.
Aningaasanut inatsimmut isumaqatigiissummut 2023-mi KNI-p
Naajaanut, Nutaarmiunut Qeqertanullu kiffartuussinera ilaasoq, tassanilu
Nutaarmiuni aamma Naajaani kioskiliortoqarsinnaaneranut, kiisalu Qeqertami
kioskimut toqqorsivimmik nutarterinissamut pilersitsisoqarnissaa pineqartoq,
Kalistat Lund akissuteqarluni paasissutissiivoq.
- Naajaanut Nutaarmiunut Qeqertanullu pitsaanerusumik
kiffartuussinissamut naatsorsuinerit tunngaviusut kingulliit 2017-imi
naammassineqarput, najugaqarfinnili pineqartuni suut
atorfissaqartinneqarnersut, matumani imermik innaallagissiorfinnillu
pilersuineq, talittarfiit aamma ujaqqanik aqquserniorneq ilanngullugit qulaajarnissat
Namminersorlutik Oqartussat atorfissaqartippaat.
- Tamanna aallartisarnissamut, sanaartornermut,
ukiumut ingerlatsinermut assigisaannullu tigussaasumik aamma tunngaviusumik
naatsorsuinermik suliassamut naammassinninnissamut pingaaruteqarpoq. Taamaammat
maannakkorpiaq misissuinerit, suliassanut naatsorsuinernullu suliassanut
naammassinninnissamut suliaqartoqarpoq, Kalistat Lund akissuteqarluni allappoq.
Suleqatigiissitaq KNI-mit, Siulittaasup
naalakkersuisoqarfianit aamma aningaasanut akileraarutinullu
naalakkersuisoqarfimmit inuttalersugaavoq, sulialli killiffiat pillugu
Naalakkersuisut suli saqqummiussisinnaanngikkallartut aammalu sapaatip akunnera
kingulleq Avannaata Kommuniata Nutaarmiormiunut nioqqutissanik immikkut
ikiorsiissuteqarnerat ilisimasaqarfiginngikkitsik, Kalistat Lund ilanngullugu
paasissutissiivoq.
Nunaqarfimmiuniuk sumiginnarneqartut
Nunaqarfinni pineqartuni pisiniarfiliortoqarnissaanut
pilersaarummik suli saqqummiussoqannginnera akuersaarneqarsinnaannngitsoq,
tamannalu nunaqarfiummiunik sumiginnaanerusoq, Adam Kristensen parteeqatini
Kalistat Lund isornartorsiorlugu oqarpoq.
- Suleqatigiissitap suliaa tatiginaranilu
saqquminngippallaarpoq, nunaqarfinnilu pineqartuni ajornartorsiutit
aaqqiiviginiarlugit pimoorussisoqannginneranut tamanna ersersitsivoq.
- Assersuutigiinnarlugu Nutaarmiuni innuttaasut
ukiup ataatsip ingerlanerinnaani qulinik ikileriarput, taamaakkaluartorli suli
iliuuseqartoqanngilaq, tamannalu nunaqarfinnik inuerusaanertut allaat immaqa
taaneqarsinnaavoq, taanna oqarpoq.
Royal Greenland Nutaarmiuni aalisakkanut
suliffissuaateqarpoq, nunaqarfimmili pisiniarfeqannginera pissutaalluni
nunaqarfimmi aalisartut ikiliartortut, tamatumalu kingunerisaanik tunisat aamma
ikiliartortut Arctic Fish Greenlandimut siornatigut oqaatigineqarpoq.
