Air Greenland Icelandairimik isumaqatigiissuteqartoq
Air Greenlandip Icelandairimik suleqatigiinnissamik isumaqatigiissutaa Kalaallit Nunaat Amerikamut Avannarlermut Savalimmiunullu pitsaanerusumik attaveqalersitsissaaq.
Isumaqatigiissut Reykjavikimi sapaatip-akunnerani matumani atsiorneqarpoq. Saamerlermit: Naalakkersuisoq Kalistat Lund, Islandip nunanut allanut ministeria, Thórdís Kolbrún Reykfjörd Gylfadóttir, Air Greenlandip pisortaanera, Jacob Nitter Sørensen, Atlantic Airwaysip pisortaanera, Jóhanna á Bergi, Icelandairip pisortaanera, Bogi Nils Bogason talerpilliuvorlu Hanna í Horni, Savalimmiut Reykjavikimi sinniisoqarfiani pisortaq.
Assiliisoq: Arctic Circle Assembly.
Namminersorlutik Oqartussat timmisartortitseqatigiiffiat Air Greenland Islandimi timmisartortitseqatigiiffimmik Icelandairimik isumaqatigiissummik codesharemik taaneqartatumik isumaqatigiissusiorpoq.
Air Greenland nittartakkamini paasissutissiivoq timmisartuutileqatigiiffiit timmisartuussisarnerminnik avitseqatigiinnerat ilaatigut timmisartuutileqatigiiffiit tuniniaanerminnik avitseqatigiinnerannik kinguneqartoq.
Isumaqatigiissut codeshare Air Greenlandip nittartakkamini ilaatigut ima naasuiarpaa: Angalatitseqatigiiffiit nunat angallavigisartagaat tamarmik nittartakkaminni pisiarineqarsinnaanngussagat. Taamaaliornikkut angalasut aallarfimminniit ornitaminnut angalanerminni pilersaarutaat ataqatigiilerluni ataasiussalluni.
Isumaqatigiissutip 2025-mi aasakkut atuutilernissaa naatsorsuutigineqarpoq, tamannalu Air Greenlandip pisortaanerata Jacob Nitter Sørensenip nuannaarutigaa:
- Allannguutaasussamik taamaattumik isumaqatigiissuteqarnerput nuannaarutigeqaarput, Nunat Avannarliit Issittullu akornanni attaveqaatinik pitsaanerulersitsimmat.
- Icelandair aamma Atlantic Airways suleqatiginerisigut inuiaqatigiit akornanni attaveqalerpugut angalasunullu aqqutit nutaat ammarlugit, taamaalilluni avannaarsuani najukkatsinni kulturit pisuut nunallu alutornaqisut tikeraarnissaat aatsaat taama ajornanngitsigilerluni, pisortaaneq isumaqatigiissut pillugu oqarpoq.
Icelandair-imi pisortaq isumaqatigiissummut nuannaarutiginnippoq
Timmisartuutileqatigiiffiit taakku marluk angallassiffigisagartik Billund – Keflavik aamma Nuuk – Keflavik siullertut aqqutigineqassasoq isumaqatigiissutigaat. Aqqut Air Greenlandimit 2025-mi marsi 18-ianiit oktobarip 23-ata tungaanut timmisartuuffigineqartassaaq.
Icelandair Føroyami Atlantic Airwaysimut assigusumik aamma isumaqatigiissuteqarpoq.
- Nuannaarutigaarputtaaq tuniniaavitsinni siammarterivitsinnilu annertuuni Kalaallit Nunaat Savalimmiullu Amerikamut Avannarlermut Europamullu nunarsuarmilu niuerfinnut allanut soorlu Asiamut attavilersinnaagatsigit, taamaalillutalu takornariarfissaqqissutut alutornartutut saqquminerulersillugit, Bogi Nils Bogason isumaqatigiissutit nutaat pillugit oqarpoq.
