SARFAARSUIT CENTER

Nuummi aamma ammaanersiortorsuupput: Inuit hunnorujulikkaat tunuleriiaallutik utaqqisut

Ilulissani mittarfissuartaarlutik nalliuttorsiuleruttortut Nuummi aamma nuannattunnguaqarpoq. Pisiffiummi pisiniarfeqarfittaava Sarfaarsuit Center ullaaq ammarpoq. Inuppaaluit nalunaaquttap akunnera ataaseq sinnerlugu utaqqerrapput, allaallu ilai atuarfimmit qimaallutik Burger Kingimukarsimallutik oqaluttuarput.

Pisiniarfeqarfissuaq illugiillugu utaqqisorpassuarnik tulleriiaattoqarpoq.

Assiliisoq: Mette Kierstein

Arnaq Nielsen Arnaq Nielsen Tusagassiortoq

Mette Kierstein Mette Kierstein Journalist Tusagassiortoq

Saqqummersinneqarpoq 29. Oktobari 2026 - 15:30

- Minutsit arfineq-pingasuinnanngorput!

Sarfaarsuit Centerip ammarnissaanut tunuleriiaattut hunnorujulikkaat saarlersaaniittut ilaat suaarpallappoq.

Ussassaarut

- Minutsit arfineq-pingasuinnanngorput!

Sarfaarsuit Centerip ammarnissaanut tunuleriiaattut hunnorujulikkaat saarlersaaniittut ilaat suaarpallappoq.

Taama suaartorlu utaqqisorpassuit akillugu nillerrapput. Pisussaq pigaluttuarpoq, inuillu pilerinerat malunnarsiartuinnarpoq.

Siuleriiaat siornatungaannut pinissaminut qulakkeerinnissimasut ilagaat Marianne Alaufesen.

- 1 tiimi sioqqullugu ammarnissaanut maaneereerpunga, taanna oqarpoq.

Marianne Alaufesen ammarsiilluni akunneq ataaseq utaqqivoq. Taanna pisiniarfeqarfittaap ungasinngisaani najugaqarami nuannaarpoq.

Balloneqarluarmat nalliuttorsiortoqarnera qularutissaanngilaq.

Marianne Alaufesen Nuup Nuussuartaani innuttaasut 7.000-t missaanniittut ilagaat. Centeritaap ungasinngisaani najugaqarami pisiniarfissaqalernini qujamasuutigaa, allanut aamma iluaqutaassasoq qularinngilaa.

Ussassaarut

- Imaallaammi inuit illoqarfiliarunnaarlutik qanittorsiornerulissapput maani najugaqartorpassuit. Aamma amigaatigalugu malunnarpoq, Marianne Alaufesen oqarpoq.

Kiisami tassa ammaannaleqaaq. Pisiffiup pisortaanera Per Steen Larsen ammaanngitsiarnermi najuuttorpassuarnut oqalugiarpoq.

Kinguninngualu qalersaq tungujortoq kuultitalinnik allalersorneqarsimasoq qiorneqarmat inuit arpaliutiinnaq pisiniarfeqarfittaamut iserniuupput.

- Ammarnissaa qilanaarinikooqaarput, Hannah Linderoth taama oqarpoq. Taassuma Caleb Claralu peqatigalugit Sarfaarsuit Centerip ammarnera najuuffigiartorpaa. - Manna immaqa aamma inussiffigilluartalissavarput, taanna oqarpoq.

Petrine Jungersen, JYSK-imi ILVA-milu pisiniarfinnut akisussaasuugami pisiniarfiit ammarnissaat qilanaarisimaqaa. Ammarnissaannullu ulapissimaqalutik oqaluttuaraa.

Burger Kingimukarniaannarluni atuariartunngitsoortoq

Pisiniarfissuup saatungaani uivernersuartut ittumik pisoqaleruttornerani centerip illuatungaa eqqissisimaneruvoq.

Biili ataaseq tamaani utaqqivoq. Biiliniiginnarluni nerisassanik inniminniisarfik, aamma drive-inimik taaneqartartoq, nunatsinni siullerpaaq atoqqaartissallugu angutit marluk biilit iluani utaqqipput. Taakku Burger Kingip biilinit niunngikkaluarluni inniminniisarfiani atoqqaartitsiniarput.

Kiisamilu højttaleri nippariasaarpoq:

- Sunik inniminniiniarpisi?

Angutit taakkua marluk apersorneqarnissartik kissaatiginngilaat, kisianni inniminniisinnaanissaminnut utaqqisimanerarput. Inniminneeriarlutik pisiaminnik aallissallutik ingerlaqqipput.

Minutsit marluk utaqqereersulu burgerissaat Oreo-shakessaallu piareeriikatapput.

Nunatsinni biilinit niunngikkaluarluni neriassanik inniminniisarfik siulleq tassaavoq Burger King.

Burger Kingimut utaqqisorpassuit allat tassaapput nukappiaqqat meeqqat atuarfianeersut. Ammaanersiorneq najuuffiginiarlugu atuarfimmit pjækkersimallutik oqaluttuaraat.

Oqaloqatigaagut, saqqummiutissanngilagulli. Taakkua ilaasa oqaluttuaraa atuarfimmit qimaasinnaanerluni anaanaminut sianerluni aperisimalluni. Akuerineqarsimallunilu oqaluttuarpoq.

Oliver Bertelsenip suleqatinilu pisiniarfeqarfittaaq sanaqataaffigaat, ammarneralu nalliussiniarlugu Burger Kingimeersunit neripput.

Neriniartarfimmi ingerlaqqikkatta kiisami oqaloqatissarsivugut.

Taakkua ilagaat sanasoq Oliver Bertelsen. Taanna siullermeerluni pisiniarfimmiinngilaq, sanaartorneranimi suleqataavoq.

Piareerniagassat kingulliit naammassiniarlugit ullaaq ilanngullugu ulapissimallutik oqaluttuaraa. Qulilli qaangilaaginnaraa siusissukkut ulloqeqqasiornissaminut qujanartumik piffissaqarpoq.

Oliver Bertelsen suleqatini peqatigalugit issiavoq, Burger Kingillu sassaalliutigisartagaanik misileereersimalluni.

- Double Whopper Cheesetorpunga, pommes fritesit Cola Zerolu. Mamavipput.

- Nuummiut periarfissarissaaqaat

Pisiffiup pisiniarfissuartaavani aamma inugasaaqaaq.

Taakkua akornanniippoq Niels Ole Utuaq. Taanna Kulusummi, ataasiinnarmik pisiniarfilimmi, najugaqarpoq. Angerlareersimasussaagaluarpoq, timmisartussanili taamaatiinnarneqarmat centeritaap ammarneqarneranut peqataasinnaalerpoq.

Inuppassuit takkussimanerat maluginiarpaa. Inuimmi takkuttut nunaqarfiani najugaqartunit amerlanerupput.

- Inuit amerlaqaat, alutornaqaat.

Kulusummiup Niels Ole Utuap pisiniarfissuarmi pisiassarpassuit arajutsinngilai. Nuummiullu taama periarfissaqarmata qutsappai.

Aamma pisiniarfissuartaami nioqqutissat assigiinngitsut qanoq amerlatiginerat tupaallaatigaa.

- Peqaqaaq, periarfissarissaaqaat nuummiut, usornaqaat pisiniarfinnik taama periarfissalinnik ammaassisarmata, Niels Ole Utuaq oqarpoq.

Inuit hunorujulikkaat, ilaat nalunaaquttap akunnera ataaseq sinnerlugu utaqqisimasut, pisiniarfimmut matut ammarneqarmata arpaliutiinnaq isaapput.

Sulisut ulloq nalliuttorsiorfigaat

Pisiniat pisiassat sumiinneri naniniarlugit pisiniarfimmi sumi tamani angalaarput.

Pisiniarfiulli qanoq inneranik allanut sanilliullugu ilisimasaqarnerusoq pisiniat akornaniippoq. Taanna tassaavoq Pisiffiiup pisortaanera, Per Steen Larsen.

Ullup massuma nalliunnissaa suleqatinilu utaqqisimavaat. Centerip ammarneqarnissaanut akuersissut ippassaq pingasunngornermi ualingaatsiartoq aatsaat pissarsiaraat.

- Ammaasinnaalernissatsinnut akuersissut ippassaq ualingaatsiartoq pissarsiaraarput. Taamaattumik pisiniartartorpassuit piffissaq sivikitsuararsuaq atorlugu periarfissaqaraluarlutik takkussinnaammata nuannaaqaagut.

Centeri pilersaarutigineqaqqaalermalli ukiut tallimat qaangiussimalermata sulisunut ulloq pingaartorsiorfiuvoq.

Per Steen Larsen kalaallisut oqaatsigut atorlugit oqalugiarpoq.

- Suleqatikka peqatigalugit ulloq naallugu nalliuttorsiussaagut. Ullumikkuinnarli nalliuttorsiussanngilagut. Pisisartugummi nutaat aqagu aamma piareersimaffigissavagut, Per Steen Larsen oqarpoq.

Nukappiaqqat ilaat Burger Kingimik niaqoruserluni nalliuttorsioqataavoq.

Pisiniat siulliit tupaallaatissaat piumaneqaqalutillu nuannarineqaqaat.

Pisartagaqarneq

Allaaserisaq tamaat atuarniarukku atuisunngortariaqarputit! Iserit!

Sermitsiaq.gl – Nittartagaq

Sermitsiaq.gl-imi allaaserisat tamakkiisumik atuarsinnaalissavatit
Qaammammut kr. 59.00
Ukiumut kr. 650.00

ATUISUNNGORIT

Asasarput atuartartoq, Sermitsiaq.gl-imut – Kalaallit Nunaanni nutaarsiassanik isornartorsiuisumillu tusagassiornermik saqqummiussiffimmut – tikilluarit. Kiffaanngissuseqarluni tusagassiornerup siuarsarneqarneranik suliniuteqartuarsinnaajumalluta, itisiliillutalu isornartorsiuilluta tusagassiortuarsinnaajumalluta, allaaserisat aalajangersimasut akeqalersippavut. Tamanna iluaqutigalugu allaaserisat pitsaassusaat qulakkeersinnaavarput, tusagassiortuttalu pikkorissut oqaluttuanik pingaarnerpaanik saqqummiussinissaannut tapersersorsinnaavavut. Allaaserisat akillit qaammammut taamaallaat 59 koruuninit akeqarput. Pisineq ajornanngitsuararsuuvoq – ataaniittoq toorlugu saqqummiussavut tamakkiisumik iserfigisalersinnaavatit. Paasinninnerit tapersersuinerillu qujamasuutigaavut. Pituttorsimanngitsumik isornartorsiuisumillu Kalaallit Nunaannut tusagassiortarnissamik suliniuteqartuarnissamut akiliutivit ikiorpaatigut.