Qarsoq Naajalu aningaasanut inatsisissatut siunnersuut pillugu ataatsimiinnermi siullermi

Danskit naalakkersuisui 2027-mut aningaasanut inatsisissatut siunnersuut pillugu isumaqatiginninnialeruttorput.

Kalaallit Folketingimut ilaasortaatitai Qarsoq Høegh-Dam (Naleraq) aamma Naaja H. Nathanielsen (IA) aningaasaqarnermut ministerip Peter Hummelgaardip naalakkersuisullu sinniisaata ataatsimeeqatiginissaanut pingasunngornermi ualikkut qaaqquneqarput.

Qallunaat akisussaaffii annertusarneqassapput

Qinigaaffimmi matumani akisussaaffiit Danmarkimit ingerlanneqartut Kalaallit Nunaanni annertusineqarnissaat, Qarsoq Høegh-Damip ataatsimiinnermi pingaarnertut isigaa.

– Danskit akisussaaffiisa allanngortinneqarnerat pineqarpoq, tamannalu qinigaaffimmi matumani annertusarneqassaaq. Isumaqatigiissutit ukiuni pingasuni affarmilu naammassineqarnissaat nukinngutissaavoq. Assersuutigalugu silaannakkut angallannermik nakkutilliineq immallu assingi pillugit isumaqatigiissuteqarpugut suli naammassineqanngitsunik. Isumaqatigiissutinik naammassineqarsimanngitsorpassuarnik takusaqarpunga, Qarsoq Høegh-Dam oqarpoq, aamma kommunefogedit tigusanut eqqortumik atortussaqanngitsut eqqaavai.

– Nammineq takuara inuit quini umiatsialerivinnilu tigummigallarneqartartut, pisarialinnik atortorissaaruteqannginnertik pissutigalugu. Tamanna qallunaat akisussaaffigaat, uagulli annikitsualuit aaqqiivigisariaqarpavut — inuiaqatigiit mikinerpaartaat ilanngullugit, Qarsoq Høegh-Dam oqarpoq, taassumalu maluginiarpaa naalakkersuisooqatigiinnermut tunngaviusumik isumaqatigiissut aallaavigalugu iliuuseqarnissamut piumassuseqartoqartoq.

- Oqaatsilli iliuutsinut ikaartinneqartariaqarput. Neriorsuuterpassuaqaraluarpugut isumaqatigiissuterpassuaqarlutalu, sulili naammassineqarnissai amigaatigaavut.

Atlantikup Avannaanut aningaasaliissutit annertusarneqassapput

Qarsoq Høegh-Dam naapertorlugu Atlantikup Avannaanut aningaasaliissutit ukiuni kingullerni ukiumut 30 million koruuniusut – imaluunniit ukiuni sisamani naalakkersuinerup ingerlanerani 120 million koruuniusut – qaffanneqassapput. Atlantikullu Avannaani suliniutinut toqqaannartumik attuumassuteqassallutik.

Naaja H. Nathanielsenip aamma danskit akisussaaffiisa nalitsinni atuuttunut naleqqussarnissaat pingaartippaa.

– Naalakkersuisooqatigiinnissamut isumaqatigiissummi neriorsuutigineqarpoq Danmarkip Kalaallit Nunaanni akisussaaffii ullutsinnut tulluarsarneqassasut. Tamanna aningaasanik akeqassaaq, paaserusupparalu qanoq tamanna aningaasalersorneqassanersoq.

Qarsoq Høegh-Dam assigalugu Naaja H. Nathanielsenip Atlantikup Avannaani aningaasaateqarfiup qaffaavigineqarnissaa kissaatigaa.

– Atlantikup Avannaani aningaasaateqarfik ukiorpassuarni aaqqivigineqarneq ajorpoq, naak aningaasat naleerukkiartuinnaraluartut. Aningaasanik qaffaanissamik siunnersuuteqarnerput tigulluarneqartoq malugisinnaavara. Naja Nathanielsen oqarpoq, taassumalu ilanngullugu inuussutissarsiornermi suliassaqarfiit tapersersorneqartariaqartut ilanngullugu eqqaavaa.

– Assersuutigalugu aningaasanik mikrolåninik taarsigassarsisitsisarneq nunaqarfinni suliffissanik pilersitsisinnaavoq, nunaqarfinnilu mikinerusuni aningaasaqarneq nukittorsarlugu. Isumaqarpunga tamanna iliuuseqarfiginerusariaqaripput. Tamanna imminut pilersornermi aamma atuuppoq. Namminersorlutik Oqartussat imminut pilersornermut aningaasaliissutaannut killeqartunut qinnuteqartut amerlasarput, taamaattumik danskit naalakkersuisuinut siunnersuutigaara amerlanerusut ikiorserneqarsinnaanissaat anguniarlugu aningaasanik ilasoqassasoq, oqarpoq.

Nunat Inoqqaavisa Pisinnaatitaaffii pillugit Allattoqarfik

Naaja H. Nathanielsenip aamma nunap inoqqaavisa pisinnaatitaaffii ministeriaqarfinnilu assigiinngitsuni ataqatigiissaarinerup amigaataanera sammivai.

– Ministereqarfiit tamarmik iliuuseqarusupput, ataqatigiissaarinerli amigaataavoq. Kommuni ataasiinnaanngitsoq tallimanut assigiinngitsunut attaveqartuassappat sulineq sunniuteqangaarunnanngilaq. Taamaattumik siunnersuutigaara nunap inoqqaavisa pisinnaatitaaffiinik suliniutinik naalagaaffeqatigiit akimorlugit katersuisussamik allaffeqartariaqarnera. Tamakkiisumik tamanna paasissutissiissaaq, suliniutit ataqatigiissaassallugit qulakkeerlugulu kommunit sumiiffiillu pisariaqartumik tapersersorneqarnissaat. Akisussaaffik tamanna naalakkersuisut namminneq tigusariaqarpaat, Naaja H. Nathanielsen oqarpoq.