Jens-Frederik Nielsen: Nunarsuarmut aqqut nutaaq pilersinneqarpoq

Jens-Frederik Nielsen (D) timmisartorsuaq siulleq ilaaffigalugu Ilulissanut miqqammerpoq, mittarfeqarfimmilu oqalugiarluni.

Naalakkersuisut siulittaasuata oqalugiaataa oqaluttuarisaanermut tunngatillugu allanneqarpoq. Mittarfitoqaq 1984-imi taamanikkut ammarneqarmat, kapitalik nutaajuvoq, kapitali alla maanna 2026-mi aallartippoq.

- Ulloq manna anguniarlugu amerlasuut sivisuumik sulisimapput, Siulittasoq oqarpoq.

Taamaattumik Jens-Frederik Nielsen naapertorlugu inuppassuit qujaffigneqartariaqarput:

- Qujanaq suleqataasimasorpassuarnut. Issittumi, taartumi anorlertumilu sulisimasunut. Greenland Airports-mi sulisunut qujanaq. Air Greenlandimut qujanaq. Qallunaat Naalagaaffiannut qujanaq, suliami uani suleqatigiiffigisimasatsinnut. 

- Iluliarmiunullu qujanaq. Sanaartorneq qanimut malinnaaffigisimavarsi, kiisalu sivisuumik utaqqisimallusi. 

Jens-Frederik Nielsenip nangilluni oqaatigaa attaveqaatit Kalaallit Nunaannut qanoq pingaaruteqartigisut, aamma nuna tamakkerlugu ataqatigiissaarinissaq pineqartoq.

- Nuummi mittarfiup ammarneqarnerani misilittakkagut ilinniarfigisimavagut, qularinngilaralu maani sulisut suliassaminnut piareersimasut. Iluliarmiut - pilluangaaritsi. Nunatsinnilu innuttaasut – mittarfittaarnitsinni pilluangaaritsi, oqarpoq.