Air Greenland isumannaallisaanermut ajornartorsiummut aaqqiissutissarsivoq
Greenland Airportsip timmisartoqarfiup illorsuartaavanut isumannaallisaanermut akuersissutaa minnerpaamik sapaatip-akunnerini marlunni atorunnaarsinneqareernerata kingorna, Canadami Iqalunnut Islandimilu Keflavikip mittarfianut timmisartumik angalasut Nuummut apuukkumallutik allamut timmisartoqqaartariaqarput.
Nuummi mittarfiup iillorsuartaavata isumannaallisaanikkut akuerineqarnissaanut ajornartorsiut Jacob Nitter Sørensenip uggoraa, tamannami aningaasartuuteqarnerulersitsillunilu Canadamut Islandimullu angalanissamik sivisunerulersitsivoq.
Leiff Josefsen
Greenland Airports mittarfiup illorsuartaavata isumannaallisaanermut akuersissutaanik ajornartorsiuteqalernerata malitsigisaanik timmisartumik angalasut Canadamut Islandimullu timmisartorsinnaaniassammata timmisartortitseqatigiiffik aaqqiissutissarsisimasoq, Air Greenlandimi pisortaaneq Jacob Nitter Sørensen Sermitsiamut ilisimatitsivoq.
- Aaqqiissutissarsigallarpugut, tassa Nuummit Kangerlussuaq imaluunniit Kulusuk aqqusaarlugit Iqalunnut Islandimullu timmisartuussisarniarluta, Jacob Nitter Sørensen oqarpoq nangillunilu:
- Taamaalilluta ilaasut tamarmik isumannaallisaanikkut akuerisaanissaat taamaalillunilu pilersaarutit malillugit apuussinnaanissaat qulakkiissavarput – kinguaattoornertalimmilli.
Aningaasartuuteqarneruneq
Nuummit toqqaannartumik nunanut tamalaanut timmisartuussinerit minnerpaamik sapaatip-akunnerini marlunni unitsinneqarnerata malitsigisaanik timmisartornerup sivisunerulerneratigut, taamaalillunilu orsussamik atuineruneq inuttallu sulinerunissaat pissutigalugit aningaasartuuteqarnerulernissaq, pisortap uggoraa.
Angallannermut aqutsisoqarfiup misissuiartornerani isumannaallisaanermut tunngatillugu kukkunerit amigaatillu paasineqarput, tamatumalu kingunerisaanik nunat tamalaat akornanni timmisartuussinerit erngertumik unitsinneqarput. Ilaatigut matut parnaarneqanngitsut sumiiffinnullu aalajangersimasunut akuersissuteqarnani isertoqarsinnaanera misissuinermi paasineqarput.
Iluarsiinissat pisariaqartut ilaatigut immikkut ilisimasallit, piffissaq sivisunerulaartoq atorlugu apuunniartussat pisariaqartinneqarput, taamaattumillu siusinnerpaamik sapaatip-akunnerani 36-mi misissuiartortoqarsinnaavoq, immaqalu angallannermut aqutsisoqarfimmit isumannaallisaanermut piumasaqaatit tassani akuerineqassapput.
Nuummit nunap iluani timmisartuussinerit eqqorneqanngillat.
