Nunat tamalaat akornanni timmisartuussisinnaaneq kinguarteqqinneqartoq
Nuummiit nunanut tamalaanut timmisartuussisinnaanerit aqagu marlunngornermi aallartinnissaat naatsorsuutigineqaraluartoq iluatsinngitsoq Greenland Airports nalunaarpoq.
Trafikstyrelsenip misissuinerani Nuuk Mittarfiata nutaap terminaliata isumannaallisaanermut qaffasissusia amigaateqartoq paasineqarpoq
Assiliisoq: Kalaallit Nunaata Mittarfiit
Sillimaniarnermi kukkunerit amigaatillu peqqutaallutik Nuummi mittarfimmit nunat tamalaat akornanni timmisartuussinerit minnerpaamik sapaatip-akunnerini marlunni unitsinneqarallarput.
- Tamatumunnga ilaatigut pissutaavoq, iluarsiinissat pisariaqartut ilaanni immikkut ilisimasallit, piffissaq sivisunerulaartoq atorlugu apuunniartussat, pisariaqartinneqarnerat, Greenland Airports tusagassiutinut nalunaarummi nassuiaavoq.
Misissuilluni takusaaneq
Angallannermut aqutsisoqarfik sapaatip-akunnerani 36-mi misissuiartorumaartoq isumaqatigiissutigineqarnikuuvoq, tassani neriuutigineqarluni timmisartoqarfik isumannaallisaanikkut piumasaqaatinik naammassinnittutut akuerineqarsinnaassasoq, taamaalilluni nunat tamalaat akornanni timmisartuussinerit aallarteqqissinnaalissallutik.
- Kukkunerit iluarsinissaat aallullugu suliaraagut, taamaalilluta isumannaallisaaneq annertuumiiteqqilersinnaaniassagatsigu aammalu nunanut allanut timmisartuusseqqissinnaalerniassagatta. Sullitatsinnut ilaasunullu tamatuma akornusiinera ajuusaarutigisorujussuuarput, oqarpoq Greenland Airportsimi attaveqaqatigiinnermut pisortaq Mikkel Bjarnø Lund.
Eqqugaasut
Tamanna Air Greenlandip Canadami Iqalunnut timmisartuussisarneranut Islandimilu Keflavikip mittarfianut timmisartuussisarneranut sunniuteqarpoq.
Angallannermut aqutsisoqarfiup misissuiartornermini isumannaallisaanermut tunngatillugu kukkunerit amigaatillu paasineqarput, tamatumalu kingunerisaanik nunat tamalaat akornanni timmisartuussinerit unitsinneqarput.
Ilaatigut matu paarnaarneqanngitsut aamma sumiiffinnut aalajangersimasunut akuersissuteqarnani isertoqarsinnaanera misissuinermi paasineqarput.
Ajornartorsiut aaqqinniarlugu timmisartortitseqatigiiffiit qanimut oqaloqatigineqartut, ilaasullu tamarmik apuuffissaminnut apuussinnaanissaat qulakkeerniarneqartoq Greenland Airports ilisimatitsivoq.
