Air Greenland ukiup affaani siullermi amigartooruteqareerluni kisitsisinik naleqqussaasoq

Air Greenlandip siulersuisuisa ukiup affaani angusat “iluarisimaarnartutut” nalilerpaat, naak akileraarutit suli ilanngaatiginagit 21,1 millionit koruuninik amigartooruteqaraluarlutik. Siorna piffissami tassani timmisartuutileqatigiiffik 8,2 millionit koruuninik sinneqartooruteqarpoq, tamannali timmisartorsuup A330 Norsap aamma qulimiguuliup B212-ip tunineqarnerannit angusarissaartoqarluni.

Ilimagineqartumiit ineriartorneq annikinnerusoq

2024-mi timmisartuussinerit amerlisimasut ilimagisatulli amerlatigisimanngitsut siulersuisuni siulittaasoq Malik Hegelund Olsen timmisartuutileqatigiiffiup nittartagaani ilisimatitsivoq. Timmisartuussinerit sila pissutigalugu aamma unammillernarsimapput, tamatumalu kingunerisaannik angalasunut ingerlariaqqissinnaanngitsunut timmisartuutileqatigiiffimmut aningaasanik naleqarsimalluni.

Ukiup qaammataani siullerni arfinilinni timmisartuussinerit 4000-ingajaat sila pissutigalugu taamaatiinnarneqarsimapput, ukiulli siulianut sanilliullugu taamaaginnarluni.

- Aamma 2024-mi angallannerit pilersaarutaasut ingerlannissaannut sila unammillertitsingaatsiarpoq, tamannalu ilaatigut pisinnaasat atorneqarnerinik annikillititsivoq aningaasartuutinillu amerlisitsilluni, taamatullu sila peqqutigalugu aningaasartuutissat eqqoriarnissaat ajornakusuungaatsiarluni, Malik erseqqissaavoq, taanna oqarpoq.

Naleqqussaaneq akeqartoq

Saniatigut ingerlatsinermut tunngasut aningaasartuutit ilaatigut iluarsaaqqinnermut nutaamik atortulersuutinullu aamma aserfallatsaaliuinermut pilersaarutigineqanngitsumut qaffariarsimapput, paasissutissiissutigineqarpoq.

Ingerlatsinermit avataaniit isertitat allat ukiup siulianut sanilliullugit 25 millionit koruunit sinnerlugit ikileriarnerannit ukiup affaani angusat aamma sunnerneqarput. Tamatuma saniatigut sulisunut aningaasartuutit 22,8 millionit koruuninik qaffassimapput. Timmisartortitseqatigiiffiup sulisut 3,6 procentimik amerleriarsimavai, katillugit 704-nik piffissami tamakkiisumi sulisoqalerluni.

Air Greenland pingaartumik ukiup affaani kingullermi aningaasarsiorluartarpoq, taamaattumillu naatsorsuutigineqarpoq ukiup affaani siullermi amigartooruteqarneq ukiup affaani kingullermi sinneqartooruteqarnermik taarserneqarsinnaassasoq. Ukiulli aallartinnerani ilimagineqartutut annertutiginngitsumik.

Kisitsisit naleqqussarneqartut

Siulersuisut naatsorsuutigigaluarpaat Air Greenland ukioq manna 90 aamma 105 millionit koruunit akornanni angusaqarsinnaassasoq. Ukiulli affaani angusat amigartoorfiusut tunngavigalugit naatsorsuutit naleqqussarlugit ukiumut angusat 50 aamma 65 millionit koruunit akornanniissasut ilimagineqalerpoq.

Timmisartortitseqatigiiffik "aningaasaatitigut tunngavissaasa patajaanneri“ erseqqissarneqarpoq, 31,1 procentimik akiliisinnaassuseqarluni.

- Nammineerluni aningaasaatinut upalungaarsimanitsinni aningaasalersuinermi pisussaaffigut malippagut, aammalu tunngaviusoq suli patajaatsumik inissisimasutut isigineqarpoq. Suliffeqarfissuaq aallaqqaammut Nuummi nunani tamalaani mittarfiup ammarnerani, kingusinnerusukkullu aamma Ilulissani Qaqortumilu mittarfiit ammarnissaannut attaveqaatinut nutaanut ikaarsaarnissamut piareersarpoq. Taamaalilluni Air Greenlandip nunattalu tamarmiusup ukiut nutaat aallartissavai, tassanilu unammilleqatigiinneq malunniutingaatsiartussaavoq. Siunissaq pissangalluta ornipparput, Malik Hegelund Olsen naggasiivoq.

Kisitsisit pingaarnerit mio. kr.- (2023-mit kisitsisit ungaluusat iluanni)

• Ukiumut naatsorsuutit: -15,9 (6,2)
• Kaaviaartitat ilanngaasereerlugit: 846,5 (813,7)
• Ingerlatsinermi isertitat allat: 11,4 (36,5)
• Avammut aningaasartuutit allat: 536 (529)
• Nammineerluni aningaasaatit: 732 (688)
• Akiitsunut pisussaaffiit: 1.491 (1.604)
• Sulisunut aningaasartuutit: 269 (256)