Air Greenlandip timmisartuussisarnini annertusilerpaa
Air Greenlandip timmisartuussisarnini 2025-mi annertusissavaa. Nuuk-Billundillu akornanni timmisartuussinerit Keflavikkoorluni sapaatip akunneranut ataasiarluni timmisartuussinermik ilaneqarput, aamma Nuup Aalborgillu akornanni toqqaannartumik timmisartuussisoqartalissalluni.
- Aalborg – Kangerlussuaq, København aqqusaarlugu 2024-mi timmisartuussisarpugut, misissuinerpullu naapertorlugu aqqut atuisunit soqutigineqarluarpoq. Ilaasut amerlasuut toqqaannartumik timmisartuussisoqarnissaa kissaatigisimavaat, Nuullu mittarfiata ammarneqarnerata kingorna aasaanerani timmisartuussinermi toqqaannartumik timmisartuussisoqarsinnaalerpoq, Jacob Nitter Sørensen oqarpoq.
Assiliisoq: Leiff Josefsen
Nuummi mittarfissap nutaap novembarip 28-ani ammarnissaanut timmisartuussisarnerit allanngornerannik aqqutillu nutaat ammarneqarneranik kinguneqarpoq.
Air Greenlandip suliniutit allat 2025-mi aasaanerani timmisartuussinissamut pilersaarutinut sunniuteqartussat maanna aamma saqqummiuppai.
Timmisartuutileqatigiiffik piffissami juunip 18-ianiit aggustip 27-ata tungaanut sapaatip akunneranut marloriarluni Nuummiit Aalborgimut toqqaannartumik timmisartuussisarniarpoq.
Aamma piffissami marsip 18-ianiit oktobarip 23-ata tungaanut Nuup Billundillu akornanni sapaatip akunneranut ataasiarluni, Keflavikkikkoorluni, timmisartuussisoqartassasoq Air Greenland tusagassiuutinut nalunaarummi ilisimatitsivoq.
Aalborgimit toqqaannartumik aqqummik kissaateqarneq
Aalborgimiit toqqaannartumik timmisartuussisoqarnissaa ujartorneqartoq Air Greenlandip pisortaa Jacob Nitter Sørensen oqarpoq:
- Aalborg – Kangerlussuaq, København aqqusaarlugu 2024-mi timmisartuussisarpugut, misissuinerpullu naapertorlugu aqqut atuisunit soqutigineqarluarpoq. Ilaasut amerlasuut toqqaannartumik timmisartuussisoqarnissaa kissaatigisimavaat, Nuullu mittarfiata ammarneqarnerata kingorna aasaanerani timmisartuussinermi toqqaannartumik timmisartuussisoqarsinnaalerpoq, Jacob Nitter Sørensen oqarpoq.
Kangerlussuup Billundillu akornanni timmisartuussineq soqutigineqarluarmat Air Greenland Keflavikkikkoorluni sapaatip akunneranut marloriarluni Nuummiit Billundimut timmisartuussisalissaaq:
Jettime timmisartuussisassasoq
- Nuup Billundillu akornanni Keflavikkikkoorluni sapaatip akunneranut timmisartuussisarnermik ilassuteqarnikkut angalasut Amerika Avannarliup nunattalu akornanni timmisartornissamut periarfissaqalerput
- Icelandair suleqatigalugu Billundip Keflavikillu akornanni timmisartumut issiaviit tuniniarpavut. Soqutigineqarnera ineriartortoq takusinnaavarput, inuppassuillu Jyllandimiit Islandimut killormullu angalarusupput, neriuppugullu tamanna atuisunit aamma tigulluarneqassasoq, Jacob Nitter Sørensen nassuiaavoq.
Air Greenland naapertorlugu timmisartut taakku marluk Jettime Boeing 737-800 atorlugu angalaffiusassapput, sapaatip-akunneratalu tulliani inniminnerneqarsinnaalissallutik.
