Akerliussutsimik takutitsisoqaqqittoq

Qallunaat oqartussaat pillugit naammaginninngittoqartuarsinnarpoq. Marlunngornermi Nuummi, Ilulissani, Reykjavikimi, Københavnimi Aarhusimilu akerliussutsimik takutitsisoqaqqimmat oqaatsit makku suaartaatigineqarput: ”FKU unitsilli”, ”Meeqqagut utertinneqarlik”, Nunasiaatillit meeqqagut alarsigit” aamma ”Inuit pingaaruteqarput”. Aaqqissuisut naapertorlugit kalaallit ilaqutariit meeqqallu kulturikkut naleqqutinngitsumik angajoqqaatut piginnaasanik misissuinermi misilitsinneqartarunnaarnissaannik Danmarkimi isumaginninnermut ministerip kommunit kajumissaarinera naammanngilluinnarpoq. Misissuinerit taakku oqaatsinut kulturinullu naleqquttunik nutaanik misiliummik saqqummertoqarnissaata tungaanut atorunnaarluinnarneqassapput.

Angalaqatigiit pilersinneqassasut

 Siunissamut tunngatillugu Kalaallit Nunaannit immikkut ilisimasalinnik angalasartunik pilersitsisoqartariaqartoq, taakkualu kommunit meeqqamik angajoqqaanit kalaallinit pinngitsaaliissummik arsaarnissamik eqqarsaateqaraangata misissuisassasut kattuffiit SILA 360, MAPI aamma Mentor Immanuel isumaqarput. Danmarkimi inuit nunap inoqqaavisut ILO-p isumaqatigiissutaa naapertorlugu illersorneqarnissartik pisariaqartikkaat aamma isumaqarput.

– Suliniutit aallartinneqartut sunniutaat innersuussutigineqaannaqqullugit politikerit tatineqartuarnissaat qulakkeerniarlugu akerliussutsimik takutitsineq ingerlanneqarpoq. Kinguneqarsimanngilaq, taamaammallu kalaallit meerartaat meeqqap pisinnaatitaaffiinut sanilliullugu naleqqutinngitsumik ajorpallaartumillu atugaqartinneqartannginnerat qulakkeerniarlugu iliuuseqartoqarnissaa nukinginnartuuvoq. Ukiuni qulikkuutaani iliuuserineqartartoq pineqarpoq, taamaammat kalaallit meerartaat isumannaatsumik atugaqarnissaat qulakkeerniarlugu suliat tamarmik misissorneqartariaqarput. Suliat aalajangiiffigineqareersut eqqaamasariaqarpavut. Siumut qiviaannartoqarsinnaananilu pinngitsuusaaginnartoqarsinnaanngilaq. “Pitsaanerpaamik isumaqarluni” pisartut uteqattaarput, kalaallilli innuttaasut peqataatinneqanngillat. Nunarsuarmili tamarmi akerliussutsimik takutitsinerit amerlasuut pissutigalugit apeqqutit taakku tusaanngitsuusaaginnarneqartussaajunnaarput, Tina Naamansen, SILA 360-imi siulittaasoq oqarpoq.

Isumaginninnermut ministerip Sophie Hæstorp Andersenip akerliussutsimik takutitsinerit killinneqaatigisimanerai Sermitsiap aperaa. ”Ministeri ajoraluartumik qujaannarpoq,” naalakkersuisoqarfimmit akissutigineqarpoq, taamatuttaarlu Naalakkersuisut ministerilu sapaatip akunnerani qaangiuttumi ataatsimeeqatigiissimannginnerarneqarput.