Minik Rosing aallussilluartutut nersornaaserneqartoq

Minik Rosing, ujarassiooq professorilu, Bent Melchiorip nersornaasiuttagaanik marlunngornermi novembarip qulingani nersornaaserneqarpoq.

Nersornaat aallussilluartunut nersornaataavoq, Brobyggeriniillu (aqqutissiuussisut, aaqq.) tunniunneqartarpoq.

- Minik Rosingip ilisimatusarnermigut ilisimatuussutsimillu siammarterinerminik soqutiginninnermikgt nunarsuarmik paasinninnissatsinnut iluaqutaasunik paasisaqarnerulissutigaarput, Brobyggerne nittartakkaminni allapput.

Nersornaasiineq Københavnip Universitetiata inersuaani pivoq, tassanilu Özlem Cekic, Anja C. Andersen aamma Adam Melchior oqalugiarput. Jakob Skovgaard-Petersen nersornaasiinissamut kajumissaasutut oqalugiartuuvoq.

- Nunani arlalinni ilisimatuussutsip innuttaasullu akornanni aqqutissiuussisutut pingaartinneqarpoq. Tamanna soorunami ilisimatusarnerup immikkut ittup nalinginnaasumik paasineqarsinnaanngortinnissaanut piginnaassuseqarlunilu piumassuseqarneranik, aammali pingaarutilinnik tamatsinnullu attuumassuteqartunik paasisaqarsimaneranik pissuteqarpoq, Jakob Skovgaard-Petersen ilaatigut oqarpoq.

Qujaniarluni oqalugiaammi nipaassimaarneq pingaarnersaatinneqartoq

Minik Rosingip qujaniutini aallarnerlugu tusiaperaarnini ajuusaarutigalugu ima oqarpoq:

- - Ujarassiuutut Geologisk Museumimi ujaqqamut naallunga orlugama seeqqora pillussimallugu kanngusuutigingaarlugu nassuerutigisariaqarpara. Nunarsuatsinni isumannaatsumik angalanissamut pisinnaasannut immaqa ersiutaavoq, Minik Rosing oqaluttarfimmi oqarpoq.

Minik Rosingip oqalugiarnermini inuunini tamaat nunarsuatsinnik paasinnittarneri assigiinngitsut imminnut qanoq attuumassuteqarnerat paasiniarlugu ilungersorsimalluni oqaluttuaraa.

- Immaqa assigiinngissutsitta naapeqatigiittarnerat ilisimassuseqarnerulissutigisarparput, taanna oqarpoq.

Oqalugiarnermini oqaloqatigiinneq ataatsimiinnermut aalajangiisuuginnanngitsoq aamma erseqqissarpaa: Aamma nipaallisimaneq aqqutissiuisinnaavoq.

- Tamatta kiffaanngissuseqarluta oqaaseqarsinnaaneq, isumatsinnik oqaatiginnissinnaaneq pillugu ilikkagaqarluarsimavugut. Immaqali aamma oqaaseqartariaqannginnerup kiffaanngissuseqalersippaatigut. Nipangersimaannarluni suulluunniit pillugit isummertariaqanngikkaluarluni inuit allat akornaniissinnaatitaaneq. Isummagut kisimik inuttut ajunngitsunngortitsisuunngillat. Aamma assigiinngitsuugaluarluta peqatigisinnaanerput inuttut ajunngitsunngortitsisuuvoq, oqarpoq taamaalillunilu tusarnaartut oqaatsit pingaarnerpaajuaannarneq ajortut eqqaasippai.

- Ilaannikkut oqaatigineqanngitsut oqaatigiumanngisagulluunniit taamatulli pingaaruteqartigisarput, taanna oqarpoq.

Bent Melchiorip nersornaasiuttagaa siullerpaamik 2022-mi tunniunneqarpoq. Siusinnerusukkut nersornaaserneqarsimasut tassaapput assiliisoq Jacob Holt, katersugaasiviup pisortaa Sarah Smed, professori Jakob Skovgaard-Petersen kiisalu ilinniarfiup pisortaa Henrik Vestergaard Stokholm.