Naatitsiviliarsuaq tamat ornittagaat matoriarlugu golfertaffiliorniarnerminik Trump itigartinneqartoq

USA-p naalagaaffiisa ataatsimoorullugu illoqarfiisa pingaarnersaanni naatitsiviliarsuaq East Potomac Park, Washington D.C.-miittoq, pulaartunut tamanut ammaannassaaq.

Taamak arfininngornermi aalajangerpoq naalagaaffiit akimorlugit eqqartuussisoq Ana Reyes, taassumalu tamat ornittagaata taassuma naatitsiviliarsuup matuneqarnissaanik pilersaarutit itigartippai.

USA-p præsidentia, Donald Trump, oktoberip qiteqqunnerani tamanut ilisimatitsivoq nammineq attaveqaqatigiittarfimmini, Truth Social-imi, naatitsiviliarsuup iluarsartuunneqarnera aallartinneqassasoq novembarip 15-iani.

Trump naapertorlugu golfertarfik East Potomac Park-imiittoq allanngortinneqassaaq, taamaaliornikkut nunarsuarmi golferluni unamminerit annersaasa ilaat soorlu Ryder Cup aamma US Open unammiffimmi tassani ingerlanneqarsinnaalissammata.

Trump-ip naalakkersuisoqarfianit pisortatigoortumik tunngavilersuisoqarnikuuvoq East Potomac Park-ip matuneqarnissaa avaqqunneqarsinnaannginnerarlugu, ilaatigut atortulersuutit arlallit aserfallassimangaaramik inunnut tassaniittunut ulorianartorsiortitsisinnaallutik.

Ana Reyes aalajangernermini tunngavilersuutigaa matusinissamik allanngortiterinissamillu pilersaarummi tunngavilersuutigineqartut ”patsisissarsiornerinnaasut”, tassami naatitsiviliarsuup taassuma matuneqarnissaanut patsisiviit nassuiaatigineqanngimmata.

Toqqaannartumik nassuiaatigineqanngilaq, naalakkersuisoqarfiup matusinissamik pilersaarutaa sumerpiaq patsiseqarnersoq.

Tamatuma ilutigisaanik aamma Trumpip naalakkersuisoqarfianit inatsit naalagaaffinnut tamanut atuuttut minnerpaamik marluk unioqqutinneqarsimapput piffissalersuineq pillugu aalajangersaanermi tunngavilersuutigineqartut pillugit.

- Naalakkersuisut siunnersuuteqarput naatitsiviliarsuaq oqaluttuarisaanermut attuumassuteqartoq matuneqassasoq, taannalu ulluinnarni innuttaasunit Washington D.C.-mi najugaqartunit qanorluunniit inissisimagaluartunit ornigannaarineqarpoq, qaqugorsuarmut aamma taamaattariaqarpoq Ana Reyes aalajangiinini pillugu allappoq.

Siusinnerusukkut taassuma naalagaaffiit akimorlugit eqqartuussisup Trump-ip naalakkersuisoqarfia isornartorsiornikuuaa, oktobarimi orpiit hunnorujulikkaat golfertarfimmit East Potomac Park-imiittumit piiarneqarsimammata.

Ana Reyes naapertorlugu orpinnik 430-nik piiaasimaneq iliuusaavoq isumakkeerfiginnissutigineqarsinnaanngitsoq.

Golfertarfik tamanit atrorneqarsinnaasoq East Potomac Golf Links, naatitsiviliarsuarmi tassaniittoq, ukiuni 100-ni tassaniissimavoq. Taanna ataatsimoorussamik naalakkersuisunit pigineqarpoq National Park Service-miillu ingerlatarineqarluni, taannalu nunamut namminermut naalakkersuisoqarfiup ataaniippoq.

Trump oktobarimi Truth Social-imi allaaserinninnermini oqaluttuarpoq, iluarsaassineq qaammatini 15-ini ingerlanneqassasoq naatsorsuutigineqartoq.

Golferneq Donald Trump-ip nuannarisavissuisa ilagaat, taamaammallu amerikamiut præsidentiat taanna sapaatip akunnerisa naanerini tamatigorluinnangajak golfertarfimmiittarpoq. Taannalumi USA-mi Europamilu arlalinnik golfertarfiuteqarpoq unnuisarfittalinnik.

RITZAU/Reuters