Millionit kalaallit piviusulersaarusianut tunniunneqartut – ilaatigut helikopterimik ajutoorneq pillugu filmiliamut

Kalaallit Nunaanni Filminstituttip siulersuisui piviusulersaarutinut kalaallinit filmiliortartunit suliarineqartunut 10.282.000 koruuninik aningaasaliipput.

Aningaasaliissutit piviusulersaarusianut aqqaneq-marlunnut Kalaallit Nunaanni tamat oqartussaaqataaneranni pereersunut, maanna pisunut siunissamilu pisussanut tunngassunut agguaanneqarput.

Aningaasaliivigineqartut ilagaat helikopteri OY-HAI pillugu piviusulersaarusiornermi filmiliassatut suliaq.

Suliami ima qulequtalimmi 'Truth Withheld' (Ilumoortoq oqaatigiumaneqanngitsoq, aaqq.) Klaus Georg Hansen produceriuvoq, aningaasaliissutilinni 1.000.000 koruuninik tapiissutisivoq.

- Helikopterip Nuup kujatinnguani 1973-imi ajutoornera filmimi sammineqarpoq, Klaus Georg Hansen oqarpoq ilallugulu:

 - Pisup oqaluttuarineqanngitsortai qulaajaavigaagut.

OY-HAI Nuummiit Paamiunut ingerlaarnerminni tammarpoq. Issimasut 15-it tamarmik ajunaarput.

Ajutoornermit ukiut 53-it qaangiunneranni oktobarip 25-ani, qanigisaasut 16-it helikopterip nakkarfianukarput. Taassuma saniatigut Hans Egedep Oqaluffiani ulloq taanna eqqaaniaalluni naalagiartoqarpoq. Taakku tamarmik filmiliorneqarput.

-NunaFondenimiit tapiiffigineqarnissaq anguneqarpoq, Klaus Georg Hansen, susassaqarfimmut kattuffimmi Film.gl-imi 2019-imiit 2026-p tungaanut aamma siulittaasuusoq oqarpoq.

Amerlanertigut ima pisoqartarpoq; suliat assigiinngitsunit tapiiffigineqarnikkut aningaasalersorneqartarput taakkulu katiterneqartarput. 'Truth Withheld'-ip tapiiffigineqarnerata kingorna sanaartorfik Sagafilm maanna aamma pituttorsimalluni filmiliornermik suliamut ilannguppoq.

Tassa piviusulersaarluni filmiliaq maanna piviusunngoraluttuarlerpoq – Kalaallit Nunaanni Filminstituttip qujanartumik aningaasaliinerata kingorna.

- Kalaallit piviusulersaarusiaat aatsaat siullerpaamik taama annertutigisumik ataatsikkut tunniunneqartumik aningaasaliivigineqarpoq, Klaus Georg Hansen oqarpoq.

Tigusisut Kalaallit Nunaanni najugaqarput

Aningaasaliissutit danskit 2025-mi 2026-milu aningaasaqarnermut inatsisaannit illuartinneqarsimasuneersuupput ataasiarlu tunniunneqartussaallutik.

Kalaallit Nunaanni najugaqartuunissaq qinnuteqartunut piumasaqaatinut ilaavoq. Tamatuma saniatigut malittarisassat naapertorlugit suliniut inunnut amerlasuunut saaffiginnittuussaaq, taakkununnga ilaallutik isiginnaartartut kalaallit danskillu.

Kalaallit Nunaanni Filminstituttimi aqutsisoq Inunnguaq Petrussen ilisimatitsivoq qinnuteqaatit 24-t katillugit 19.808.781 koruniusut tigusimagitsik. Tassa imaappoq qinnutigineqartut annertussusaasa affaasa missaat agguaanneqarput.

- Suliniutit annerit minnerillu tapiiffigisinnaagatsigit nuannaarpugut. Kisianni soorunami ilaasa naaggaartariaqarsimanerat ajuusaarutigaarput, taanna Sermitsiaq.AG-mut oqarpoq.

Qinnuteqartorpassuaqarnerata ersersippaa kalaallit filmiliortartut akissaqartinneqanngitsunik filmiliorusussuteqartut.

Filmiliussamaaraanni aamma piviusulersaarusiussamaaraanni Kalaallit Nunaanni Filmistituttimut tapiissutinik qinnutigisinnaasanik suli peqarpoq. Kalaallit filmiliaannik ineriartortitsinissamut, sananissamut aamma siammarterinissamut tapiissutit decembarip sisamata tungaanut qinnutigineqarsinnaapput.

Aningaasaliissutit malittarisassallu pillugit paasissutissat uani atuarneqarsinnaapput.