Air Greenland Upernavimmut angalaneq pillugu: Naalakkersuisoqarfik pitsanngorsaataasinnaasut pillugit oqaloqatigaarput

Ilulissanit Upernavimmut Air Greenlandip timmisartuutaanut ilaalluni angalassagaanni pilersaarusiorluarnissaq pisariaqassaaq.

Ilulissani atlantiku qulaallugu mittarfiup ammarnerata kingorna Ilulissanit Upernavik kisiat tunaartaralugu timmisartuussinerit pingasunngorniinnakkut pisalertut, Air Greenlandimi attaveqaqatigiinnermut pisortaq, Inga Dóra G. Markussen, Sermitsiamut uppernarsaavoq.

Timmisartoq dash-8 Ilulissanit Upernavik aqqusaarlugu marlunngornikkut Qaanaamukartarpoq. Aqqummulli tassunga ilaalluni Ilulissanit Upernaviliarnissaq ajornarluinnanngajappoq. 

- Ilulissanit Upernavimmut marlunngornerit tamaasa timmisartuussinermi tuniniaasoqanngilaq. Timmisartuussineq Upernavimmit Qaanaamut kiffartuussinermik isumaqatigiissut naapertorlugu sapaatip-akunneranut ataasiarluni ingerlanneqartarpoq. Ilulissanit Qaanaamut angalasut inissaqarnissaat qulakkeerniarlugu Ilulissanit Upernavimmut ilaasussat aatsaat aallarnissaq sapaatip-akunneranik ataatsimik sioqqullugu inniminniisinnaanngortinneqartarput, Inga Dóra G. Markussen allappoq.

Taassuma aamma oqaluttuaraa inissat pilerigineqarnerat peqqutaalluni timmisartuussinerit amerlanerutinneqartartut. Ukiup qanoq ilinera apeqqutaalluni timmisartuussinerit marluk-tallimallu akornani amerlassuseqartartut, Inga Dóra G. Markussen ilisimatitsivoq.

Naalakkersuisoqarfik oqaloqatigineqartoq

Air Greenlandip Upernavimmit Qaanaamut timmisartuussineri kiffartuussinissamut isumaqatigiissut najoqqutaralugu ingerlapput. Taamaattumik Upernavimmut angallannikkut allannguisoqassappat piginnittut, tassa kiffartuussinermut isumaqatigiissusiorfigineqarsimasut, Namminersorlutik Oqartussat, isumaqatigiissusiorfigineqaqqaassapput.

Air Greenlandip Ilulissanit Upernavimmut sapaatit akunneranut timmisartuussinerit marlunngornissaat kissaatigigaluaraa, attaveqatigiinnermut pisortaq allappoq. Tassa imaappoq, timmisartoq Ilulissanit Upernavik aqqusaarlugu Qaanaamukartartoq pisarunnaarluni timmisartut marluk atorlugit Ilulissanit illoqarfiit taakkua marluk immikkut tikinneqartalernissaat, timmisartuutileqatigiiffiup anguniarpaa.

- Naalakkersuisoqarfik kiffartuussinissamut isumaqatigiissut aqqutigalugu timmisartuussinerit aqqutaasa allanngortinneqarnissaat pillugu oqaloqatigaarput. Anguniarneqarpoq avannamut timmisartuussinerit marluk ingerlanneqartalernissaat: Ilulissanit Upernavikimut timmisartuussineq ataaseq aamma Ilulissanit Qaanaamut timmisartuussineq ataaseq.

Atsiornernik katersineq

Upernavimmut timmisartuussinerit taama ilinerat Upernavimmi innuttaasut pitsaanngitsumik maanna nalilerpaat. Nittartakkakkullu atsiornernik maanna katersisoqarpoq. Atsiortitsineq ima qulequtaqarpoq "Upernavimmi timmisartuussisarneq sapaatit akunnerannut amerlanerusut uterteqqinneqassapput."

Atsiornernik katersineq atiorfissatut immersuiffissami ilaatigut ima nassuiarneqarpoq:

- Upernavimmiit Upernavimmullu timmisartuussisarnerup sapaatip akunneranut ataasiinnanngortinneqarnera innuttaasut amerlanersaannut eqquinerluppoq. Angallassineq taamatut killilersorneqarpat, najugaqartut pisariaqartitaat, suliffeqarfiit, ilinniartut kiisalu meeqqat angajoqqaallu tamarmik naapertuunnerusumik periarfissaqartinneqarnissaat ajornarnerulissaaq.

- Napparsimasut nakorsarneqartariaqartut, erniartortut, kiisalu immikkut katsorsarneqartussatut pisariaqartitsisut taamaalillutik piffissaq eqqorlugu angalasinnaanerat annikillivoq.

Atsiortut allaaserisap suliarineqarnerani 340-it missaannik amerlassuseqarput.