Akiligassanik akiliisitsiniartarneq inatsisip nutaap pisariillisassavaa

Pisortanut akiitsut akilersinniarlugit suliat pisariunerusut atorunnaarsinneqarnissaannik, inatsisissatut siunnersuut tusarniaassutigineqartoq imaqarpoq.

- Ullumikkut akiligassiissutit akileraaruseriffiup tigusai arlallit akilersinniarneqarnerat eqqartuussiviit ikiortigalugit ingerlanneqartarput. Tamatumani akileraaruseriffimmi atortoqarani suleriaatsit isumalluutinik atuiffiusartut akuutinneqartarput, taamatullu eqqartuussivinni isumalluutit killeqartut atorneqartarlutik. Tamatuma saniatigut nunap karsia tamatumunnga atasumik toqqaannartumik aningaasartuuteqartinneqartarpoq, suliakkiissutinut tamaginnut eqqartuussivimmut akitsuutitut ilusilimmik, tamanna inatsisissatut siunnersuutip oqaaseqaataani, Aningaasaqarnermut Akileraartarnermullu Naalakkersuisoqarfimmit suliarineqartumi, atuarneqarsinnaavoq.

Sunniuteqarluarnerulersitsinissamut siunnersuutigineqartut inatsisitigut isumannaatsuutitsinermut pitsanngorsaataassasut tunngavilersuutigineqarsinnaassasoq, taamaaliornikkummi suliassani arlalinni, ullumikkornit sukkanerusumik suliassat suliarineqartalissasut, Naalakkersuisut isumaqarput.

Ingammik ingerlaannartunngortitsinissap digitalinngorsaanerullu annertunerusup tapersersorneqarnissaa sammineqarsimapput.

Ilanngaatiginnissinnaatitaaneq annertusineqassasoq

- Sunniuteqarluarnerulersitsinissap ilungersuutigineqarneranut nangissutigalugu,  akiligassiissutit ullumikkornit ingerlaannartumik ingerlanneqarnerulersumik akilersinniarneqarsinnaanngorlugit ilanngaatiginnissinnaatitaaneq annertusineqassasoq siunnersuutigineqarpoq. Ullumikkut suliassani amerlasuuni akiligassiissutit atortoqarani suleriaatsit isumalluutinik atuiffiusussat atorlugit akilersinniarneqartariaqartarput. Ukiumoortumik akileraarutit sippuutaannik tunniussisoqartussanngornerani ilanngaatiginnissinnaaneq sakkussaavoq, akileraaruseriffiup angusaqarfiulluartumik atortagaa. Siunnersuutigineqarpoq aamma akiligassiissutinik pisortat akiliisarnerat pineqartunut ilaatilerlugu sakkussaq taanna annertusitinneqassasoq. Taamaaliornermi akileraaruseriffiup akiliisitsiniarnermik suliaqarnerata ilaa annertooq ingerlaannartunngortinneqarsinnaalissalluni, oqaaseqaatini allassimavoq.

Akiliisitsiniartarnermut suliassaqarfimmi atsiornissamut piumasaqaatip ilaatinnginnissaanut Naalakkersuisut piginnaatinneqassasut Naalakkersuisut siunnersuuteqarput.